Еўракамісія выдае 3 мільёны еўра на падтрымку беларускага бізнэсу за мяжой. У кансорцыум уваходзяць ABBA, Imaguru і Belbiz
Запушчаны праект Беларуская дыяспарная ініцыятыва, які «імкнецца садзейнічаць пераемнасці і росту беларускай бізнэс-супольнасці ў выгнанні».
Кіраўніцтва ABBA — Серж Наўродскі, Марына Гірын і Яўген Буры
12—13 лютага ў Бруселі адбыўся запуск праекта Belarusian Diaspora Initiative (Беларуская дыяспарная ініцыятыва, BDI). Еўракамісія дасць яго стваральнікам 3 мільёны еўра на тры гады.
«У рамках гэтага праекту [беларуская бізнэс-асацыяцыя] ABBA далучылася да вядучага кансорцыўму пад кіраўніцтвам Еўрапейскай гандлёва-прамысловай палаты. Партнёрамі кансорцыўму сталі Польская гандлёва-прамысловая палата, Літоўская гандлёвая палата, Эстонская гандлёва-прамысловая палата, Каўнаская палата гандлю, прамысловасці і рамёстваў, а таксама Imaguru Global», — гаворыцца ў прэс-рэлізе ABBA.
Сярод мэтаў новай ініцыятывы — садзейнічаць пераемнасці і росту беларускай бізнэс-супольнасці ў выгнанні. «Акрамя таго, дзейнасць праекта будзе спрыяць устойліваму росту і стабільнасці бізнэсу, лепш падрыхтоўваючы іх да паспяховай рэінтэграцыі на радзіму ў будучыні», — абяцаюць стваральнікі.
Што ад гэтай падтрымкі Еўракамісіі атрымае бізнэс з беларускімі каранямі? Кіраўніцтва ABBA пералічвае вось такія тры пункты:
- Выхад на еўрапейскі рынак праз супрацоўніцтва з ключавымі гандлёва-прамысловымі палатамі.
- Падтрымка і лабіраванне на еўрапейскім узроўні.
- Фінансаванне і адукацыйныя магчымасці для развіцця і маштабавання бізнэсу.
Чытайце таксама:
Яўген Буры з ABBA расказаў, колькі яго бізнэс-асацыяцыя атрымала ад Еўрасаюза і на што патраціла
Бізнэсу аддалі 10-15% ад дапамогі Еўрасаюза Беларусі — Ягораў адказвае на крытыку з боку Латушкі