Трамп заявіў, што Зяленскі гатовы да перамоваў аб міры
Прэзідэнт ЗША ў звароце да Кангрэсу заявіў, што атрымаў ліст ад прэзідэнта Украіны Уладзіміра Зяленскага, у якім ён заяўляе пра гатоўнасць да мірных перамоваў, піша Бі-бі-сі.
Фота: AP Photo / Ben Curtis
«Сёння я атрымаў важны ліст ад прэзідэнта Украіны Зяленскага. У лісце гаворыцца: «Украіна гатовая як мага хутчэй сесці за стол перамоваў, каб наблізіць трывалы мір. Ніхто не хоча міру больш, чым украінцы», — сказаў Трамп.
З ягоных слоў, Зяленскі таксама заявіў пра гатоўнасць падпісаць пагадненне аб здабычы карысных выкапняў «у любы час».
«Я нястомна працую, каб завяршыць жорсткі канфлікт ва Украіне, — заявіў Трамп. — Мільёны ўкраінцаў і расіянаў былі дарэмна забітыя ці параненыя ў гэтым жахлівым і жорсткім канфлікце, канца якому не відаць. ЗША накіравалі сотні мільярдаў даляраў на падтрымку абароны Украіны».
«Вы хочаце, каб гэта працягвалася яшчэ пяць гадоў?» — спытаў Трамп і зноў заявіў, што ЗША выдаткавалі на падтрымку Украіны значна больш, чым Еўропа.
«На жаль, Еўропа выдаткавала больш грошай на куплю расійскай нафты і газу, чым на абарону Украіны. Падумайце пра гэта».
Некаторыя дэмакраты пакінулі залу, калі Трамп казаў пра Украіну.