«Пытанне закрытае». Кіт Келаг заявіў, што Украіна не стане членам НАТА

Украіна не стане членам НАТА, і пытанне яе ўступлення ў альянс з'яўляецца закрытым. Пра гэта ў эфіры Fox News заявіў Кіт Келаг — спецыяльны пасланнік прэзідэнта ЗША Дональда Трампа па Украіне.

Кіт Келаг. Фота: Siavosh Hosseini / SOPA Images / LightRocket via Getty Images

«Мы выказаліся максімальна выразна: сяброўства ў НАТА — па-за абмеркаваннем. Украіна не ўвойдзе ў альянс. Гэта не навіна, мы гаворым пра гэта з 2008 года», — падкрэсліў Келаг.

Ён нагадаў, што яшчэ 17 гадоў таму тагачасны пасол ЗША ў Расіі Уільям Бёрнс папярэджваў дзяржаўнага сакратара Кандалізу Райс, што ідэя далучэння Украіны да НАТА з'яўляецца «недасяжнай мэтай».

Пра тое, што Украіне не суджана стаць часткай НАТА, раней неаднаразова заяўляў і сам Дональд Трамп. Паводле яго сцвярджэнняў, менавіта абяцанні папярэдняй адміністрацыі, у прыватнасці прэзідэнта Джо Байдэна, даць Кіеву гарантыі ўступлення ў альянс сталі адной з прычын пачатку расійскай агрэсіі. Гэтая рыторыка адпавядае ключавым тэзісам, якія Масква выкарыстоўвае для апраўдання ўварвання.

У той жа час Кіт Келаг мяркуе, што перамовы адносна заканчэння расійска-ўкраінскай вайны знаходзяцца «на добрым шляху», нягледзячы на словы дзяржаўнага сакратара Марка Рубіа пра тое, што ЗША могуць адмовіцца ад пасярэдніцтва.

«Я ад нараджэння аптыміст. Таму я веру, што мы дабяромся да патрэбнага месца. Словы [Рубіа] цяжкія, але яны павінны былі быць, таму што мы стаміліся ад таго, што адбываецца. У нас шмат іншых праблем у свеце», — патлумачыў Келаг.

Паводле яго слоў, рашэнне аб спыненні агню ў найбліжэйшыя тэрміны будзе абмяркоўвацца на наступным тыдні падчас сустрэчы амерыканскай, еўрапейскай і ўкраінскай дэлегацый у Лондане. Раней яно абмяркоўвалася на сустрэчы амерыканцаў і еўрапейцаў у Парыжы.

«І менавіта таму мы адпраўляемся ў Лондан на наступным тыдні, каб фактычна зафіксаваць гэта. І я думаю, што перад намі адкрываюцца велізарныя магчымасці», — сказаў Келаг.

Каментары да артыкула