«Праціўнік імітуе рэжым цішыні, але штурмы працягваюцца». Украінцы расказалі пра стан на фронце на Вялікдзень
Даклад галоўнакамандуючага Украіны Аляскандра Сырскага па сітуацыі на фронце па стане на 6:00 20 красавіка апублікаваў канал прэзідэнта Украіны.
Ілюстрацыйны здымак. Украінскія вайскоўцы адпачываюць каля лініі фронту, Данецкая вобласць, Украіна. Фота: Oleg Petrovich / Ukraine's 24th Mechanised Brigade via AP
Паводле паведамлення, станам на 6 гадзін раніцы расійскія войскі здзейснілі ўжо 59 абстрэлаў і пяць спробаў прарыву на розных участках фронту.
На напрамках, за якія адказваюць асобныя аператыўна-тактычныя групоўкі (АТГ), зафіксавана:
— у сектары «Старабільск» — адно баявое сутыкненне,
— у сектары «Данецк» — тры сутыкненні на Покроўскім і Навапаўлаўскім напрамках,
— на Запарожжы — яшчэ адно, у раёне Стэпавога.
Расіяне актыўна выкарыстоўваюць FPV-дроны. На Куршчыне былі артылерыйскія абстрэлы.
«Нашы воіны паўсюль адказваюць так, як вораг гэтага заслугоўвае ў канкрэтных баявых абставінах. Украіна будзе дзейнічаць і далей люстрана», — гаворыцца ў паведамленні.
Як піша ўкраінскае камандаванне, на раніцу Вялікадня «ствараецца ўражанне», што Расія імкнецца дэманстраваць перамір’е. Але лакальныя атакі сведчаць пра іншае — яны працягваюць штурмаваць.
Украінскі бок выступае за поўную цішыню і прапанаваў працягнуць перамір’е яшчэ на 30 дзён — пасля поўначы. Аднак рэальныя дзеянні расіян будуць вызначаць і ўкраінскі адказ, адзначаецца ў паведамленні.