Лукашэнка абвінаваціў у праблемах на «Амкадоры» ягонага былога ўладальніка

Падчас сённяшняга наведвання Аршанскага раёна Лукашэнка заявіў, што ўладам трэба «вырашаць не толькі пытанне ўласнасці, але і даўгоў» на машынабудаўнічым прадпрыемстве «Амкадор». У праблемах жа прапрыемства ён абвінаваціў яго ўладальніка, якім да нядаўняга часу быў праўладны бізнэсмен Аляксандр Шакуцін.

Аляксандр Шакуцін — справа, на фота, якім падзялілася з журналістамі Тут.бай цешча Аляксандра Лукашэнкі 

17 красавіка Лукашэнка заяўляў, што найбліжэйшым часам «давядзецца вельмі моцна працаваць на «Амкадоры».

«З «Амкадорам» у нас вялікія праблемы. Таму трэба прыводзіць гэтае прадпрыемства да прытомнасці. І ні ў якім разе нельга загубіць», — сказаў ён, падкрэсліўшы перспектыўнасць прадпрыемства.

Раней стала вядома, што шматгадовага кіраўніка «Амкадора» Аляксандра Шакуціна, якога называлі адным з набліжаных да Лукашэнкі бізнэсменаў, адхілілі ад кіраўніцтва прадпрыемствам. Дзяржава адабрала ў Шакуціна кампанію, аддаўшы яе пад кантроль БелАЗа.

Цяпер жа Лукашэнка адкрытым тэкстам сказаў, што «прадпрыемства знаходзіцца ў складаным становішчы праз дзеянні ўладальніка».

ААТ «Амкадор» — беларуская машынабудаўнічая кампанія. Яна займаецца вытворчасцю і рэалізацыяй спецыяльных машын для дарожна-будаўнічай, лагістычнай, торфаздабыўной, камунальнай, лясной, сельскагаспадарчай галін. Па стане на 2022 год у структуру холдынгу «Амкадор» уваходзіла 26 прадпрыемстваў, у тым ліку 17 заводаў у Беларусі і Расіі. 

Каментары да артыкула