Шпакоўскі пра саўладальніка «Варгеймінга» Кацалапава: Прафінансаваў пратэсты на 296 тысяч даляраў
У пачатку красавіка з'явілася інфармацыя, што саўладальніка «Варгеймінга» Мікалая Кацалапава абвінавачваюць у данатах апазіцыйным структурам на сотні тысяч даляраў і заводзяць супраць яго спецвытворчасць. Аднак канкрэтная сума была невядомая. Цяпер прапагандыст Аляксандр Шпакоўскі яе назваў.
Мікалай Кацалапаў. Фота з ягонага LinkedIn
Шпакоўскі пісаў у сваім тэлеграм-канале на больш агульныя тэмы, але мімаходзь згадаў і пра Кацалапава, што
«адзін з топ-менеджараў кампаніі Wargaming, які пастаянна жыве на Кіпры, прафінансаваў няўдалую спробу дзяржаўнага перавароту на суму $296 тысяч».
У выдадзеным раней прапагандысцкім кіно сцвярджалася, што Кацалапаў зрабіў «дзясяткі пераводаў у крыптавалюце» на «сотні тысяч даляраў» у розныя ініцыятывы, прызнаныя экстрэмісцкімі.
У студзені 2023 Кацапалава ўнеслі ў спіс «тэрарыстаў». Тады яму закідалі фінансаванне «тэрарыстычнай дзейнасці», то-бок ахвяраванне на адну з чатырох прызнаных тады тэрарыстычнымі ініцыятываў: «Байпол», рух «Супраціў» (уключна з «Кіберпартызанамі»), Атрады грамадзянскай самаабароны і «Нехта».
Чытайце таксама:
Беларускія кампаніі ў Літве працягваюць скарачаць каманды. Wargaming — у топе па адтоку