Na adnu z najstarejšych cerkvaŭ Kapylskaha rajona pastavili załatuju cybulinu i ruskija kakošniki

Carkva ŭ honar Pakrova Praśviatoj Baharodzicy ŭ vioscy Paciejki, jakaja zaśpieła jašče časy Rečy Paspalitaj, zamiest adnaŭleńnia źviedała hvałtoŭnuju rusifikacyju. 

Carkva ŭ Paciejkach paśla pierabudovy z załatym kupałam i ruskimi kakošnikami. Fota: «Słava Pracy»

Źmieny ŭ vyhladzie carkvy zaŭvažyŭ telehram-kanał «Spadčyna».

Pomnik narodnaha dojlidstva byŭ pabudavany jašče ŭ 1793 hodzie, niezadoŭha da druhoha padziełu Rečy Paspalitaj. U 1868 hodzie na srodki prychadžan draŭlanuju carkvu kapitalna rekanstrujavali. Vyjavić histaryčnyja zdymki chrama nie ŭdałosia, ale viadoma, što ščyt chrama byŭ upryhožany kartušam, a zvanica stajała asobna.

Byłaja carkva, pieraabstalavanaja pad viaskovy kłub, u 2008 hodzie. Fota: Hłobus Biełarusi

U 2010-ja hady budynak byŭ całkam ašalavany sałatavym sajdynham. Fota: sobory.ru

Paśla Druhoj suśvietnaj vajny carkvu kančatkova zakryli i prystasavali pad sielski kłub. Paźniej pierad hałoŭnym fasadam carkvy źjaviłasia muravanaja prybudova, u jakoj raźmiaščałasia biblijateka. 

U takim vyhladzie carkva isnavała da 2010-ch hadoŭ, kali budynak ašalavali sałatavym sajdynham. Staradaŭniaja carkva stała nieadroznaj ad viaskovaj chaty paśla jeŭraramontu. 

Paśla viartańnia carkvy viernikam ź jaje źniali sajdynh, a ścieny pafarbavali ŭ jarka-sini koler. Fota: «Minskaja praŭda»

U 2023 hodzie budynak byłoha chrama pieradali Biełaruskaj pravasłaŭnaj carkvie. Amal adrazu pačalisia budaŭničyja raboty pad kiraŭnictvam sierba Miładzina Łučyča. Unutry była padšytaja drevam stol, stvorany novy ikanastas, zasłana dyvanami padłoha.

Załatyja kupał-cybulina i baraban ź nitrydu tytanu. Fota: Słuckaja jeparchija

Załaty kupał-cybulina ź nitrydu tytanu. Fota: Słuckaja jeparchija

Zvonku źniali sajdynh, ścieny muravanaj prybudovy ašalavali drevam i pafarbavali ŭvieś budynak va ŭltramarynavy sini koler. Takoha ž štučnaha koleru zroblena i kryćcio novaha dachu chrama. Narešcie, na dach pasadzili załatyja cybulepadobnyja kupały z upadabanaha RPC nitrydu tytanu i trochłopaścievyja kakošniki. Ništo z hetaha, naturalna, nikoli nie vykarystoŭvałasia i navat nie isnavała ŭ časy budaŭnictva carkvy ŭ Paciejkach.

Carkva, niahledziačy na svoj pavažny ŭzrost, nijak nie maje statusu historyka-kulturnaj kaštoŭnaści i nijak nie achoŭvajecca, a značyć ułaśnik moža rabić ź joju što zachoča. 

Kamientary da artykuła