Ukraina pahadziłasia na ździełku z ZŠA pa vykapniach, kali Vašynhton źmiakčyŭ svaje patrabavańni

Kijeŭ spadziajecca, što pahadnieńnie ab sumiesnaj raźviedcy resursaŭ dapamoža palepšyć adnosiny z administracyjaj Trampa i adkryje šlach da doŭhaterminovych abaviazacielstvaŭ ZŠA ŭ halinie biaśpieki.

Uładzimir Zialenski i Donald Tramp padčas sustrečy ŭ vieraśni 2024 hoda ŭ ZŠA. Fota: Alex Kent /Getty Images

Jak paviedamlaje Financial Times, ukrainskija ŭłady zajavili, što ciapier jany hatovyja padpisać pahadnieńnie ab sumiesnym raźvićci svaich minieralnych resursaŭ, uklučajučy naftu i haz, paśla taho, jak ZŠA admovilisia ad patrabavańniaŭ atrymlivać 500 miljardaŭ dołaraŭ ad patencyjnych dachodaŭ ad ich ekspłuatacyi.

Ukrainskija ŭłady padkreślili, što im udałosia damahčysia značna bolš spryjalnych umoŭ i jany razhladajuć pahadnieńnie jak sposab pašyreńnia adnosin z ZŠA, kab umacavać pierśpiektyvy Ukrainy paśla troch hadoŭ vajny.

«Pahadnieńnie ab minieralnych resursach — heta tolki častka ahulnaj karciny. My šmat razoŭ čuli ad administracyi ZŠA, što heta častka bolšaj stratehii», — zajaviła ŭ intervju Financial Times vice-premjerka i ministarka justycyi Ukrainy Volha Stefanišyna, jakaja kiravała pieramovami.

Pieršapačatkovy prajekt pahadnieńnia, jaki prezident ZŠA Donald Tramp prapanavaŭ jak sposab viartańnia Ukrainaj amierykanskaj dapamohi ŭ vajskovaj i finansavaj śfierach paśla poŭnamaštabnaha ŭvarvańnia Rasii ŭ 2022 hodzie, vyklikaŭ abureńnie ŭ Kijevie i inšych jeŭrapiejskich stalicach.

Paśla taho, jak Uładzimir Zialenski adchiliŭ pieršapačatkovy tekst, Tramp nazvaŭ jaho dyktataram i pasprabavaŭ uskłaści na Ukrainu vinu za pačatak vajny.

Kančatkovaja viersija pahadnieńnia, jakaja datavanaja 24 lutaha i ź jakoj aznajomilisia žurnalisty FT, praduhledžvaje stvareńnie fondu, u jaki Ukraina budzie ŭnosić 50% dachodaŭ ad «budučaj manietyzacyi» dziaržaŭnych minieralnych resursaŭ, uklučajučy naftu i haz, a taksama łahistyčnaj infrastruktury. Hety fond budzie inviestavać u prajekty va Ukrainie.

Paviedamlajecca, što novaje pahadnieńnie nie zakranaje resursy, jakija ŭžo prynosiać dachody ŭ dziaržaŭnuju kaznu Ukrainy. Heta značyć, što jano nie budzie tyčycca dziejnaści kampanij «Naftohaz» i «Ukrnafta», jakija źjaŭlajucca najbolšymi vytvorcami nafty i hazu ŭ krainie.

Adnak pahadnieńnie nie ŭklučaje spasyłki na harantyi biaśpieki z boku ZŠA, jakija Kijeŭ pieršapačatkova nastojliva patrabavaŭ u abmien na pahadnieńnie. Taksama nie vyznačanyja važnyja pytańni, takija jak pamier doli ZŠA ŭ fondzie i ŭmovy «sumiesnaj ułasnaści», jakija pavinny być vyrašanyja ŭ dalejšych pahadnieńniach.

U tekst uniesiena jašče adna źmiena, jakoj damahaŭsia Kijeŭ, — pałažeńnie ab tym, što ZŠA buduć padtrymlivać ekanamičnaje raźvićcio Ukrainy ŭ budučyni.

Ukrainskija čynoŭniki zajavili, što pahadnieńnie było ŭchvalena ministerstvami justycyi, ekanomiki i zamiežnych spraŭ, i nie vyklučyli mahčymaści vizitu Uładzimira Zialenskaha ŭ najbližejšyja tydni ŭ Bieły dom dla cyrymonija padpisańnia pahadnieńnia z Trampam.

Čynoŭniki adznačyli, što pahadnieńnie źjaŭlajecca «ramačnym», i što realnyja pieradačy dachodaŭ adbuducca tolki paśla stvareńnia fondu, što daść čas na vyrašeńnie mahčymych roznahałośsiaŭ.

Siarod niavyrašanych pytańniaŭ zastajecca jurysdykcyi pahadnieńnia — jaki sud budzie razhladać mahčymyja sprečki.

Urad Zialenskaha taksama pavinien budzie atrymać zhodu ad parłamienta Ukrainy, dzie apazicyjnyja deputaty ŭžo dali zrazumieć, što, prynamsi, adbudziecca ažyŭlenaja dyskusija pierad ratyfikacyjaj.

Kamientary da artykuła