Kiraŭnik Dziarždepa: Zialenski pavinien vybačycca za toje, što pieratvaryŭ pieramovy ŭ fijaska

Dziaržaŭny sakratar ZŠA Marka Rubia zaklikaŭ prezidenta Ukrainy «vybačycca za toje, što pieratvaryŭ heta [pieramovy ŭ Biełym domie] u fijaska dla siabie».

Marka Rubia. Fota: Alex Brandon / AP

Paśla taho jak sustreča Zialenskaha ŭ Biełym domie z Trampam i vice-prezidentam Džej Dzi Vensam pierarasła ŭ pierapałku, Rubia skazaŭ, što ŭkrainskamu lidaru nie treba było «stanavicca antahanistam». Kiraŭnik amierykanskaj dypłamatyi taksama adznačyŭ, što «moža być, Zialenski nie choča mirnaha pahadnieńnia»: «Jon kaža, što choča, ale, moža być, nie choča», piša Bi-bi-si.

Raniej Tramp, kamientujučy pierapałku ź Zialenskim u Avalnym kabiniecie, vykazaŭ niezadavalnieńnie tym, što ŭkrainski lidar choča «vajavać i vajavać», i dadaŭ: «Niachaj viartajecca, kali budzie hatovy da miru». Zialenski ŭ intervju Fox News adkazaŭ, što Ukraina bolš za ŭsich choča miru — ale z harantyjami biaśpieki.

Rubia taksama raskrytykavaŭ ton Zialenskaha adnosna Vensa padčas sustrečy, kali apošni skazaŭ, što šlach da miru i roskvitu «moža lažać praz dypłamatyju». U adkaz ukrainski prezident nahadaŭ, što vioŭ pieramovy z prezidentam Rasii Uładzimiram Pucinym u 2019 hodzie i padpisvaŭ ź im pahadnieńni ab spynieńni ahniu na Danbasie, ale Pucin ich parušyŭ. «Pra jakuju dypłamatyju, Džej Dzi, ty kažaš?» — spytaŭ Zialenski.

Pavodle Rubia, z hetaha momantu sustreča «pajšła nie pa płanie». «Hety aktyŭny, adkryty padryŭ namahańniaŭ pa dasiahnieńni miru nadzvyčaj zasmučaje ŭsich, chto byŭ zadziejničany ŭ kamunikacyjach ź imi da siońniašniaha dnia, i ja liču, što jon pavinien vybačycca za toje, što zmarnavaŭ naš čas na sustreču, jakaja skončyłasia tak, jak jana i skončyłasia», — zajaviŭ dziaržaŭny sakratar.

«Jak ty źbiraješsia prymusić Uładzimira Pucina i Rasijskuju Fiederacyju sieści za stoł pieramovaŭ, kab abmierkavać navat mahčymaść miru? — skazaŭ Rubia. — Ty nie zrobiš hetaha, abzyvajučy jaho».

Karespandentka CNN u adkaz nahadała Rubia, što toj sam kazaŭ pra toje, što Pucinu nielha daviarać. Dziaržsakratar zapeŭniŭ, što padychod ZŠA ŭ hetaj situacyi budzie pa pryncypie «daviaraj, ale praviaraj», a Trampa nie ŭciahnuć u iłžyvaje pahadnieńnie.

Rubia taksama zajaviŭ, spasyłajučysia na nienazvanaha jeŭrapiejskaha ministra zamiežnych spraŭ, što płan Jeŭropy — praciahvać vajnu jašče hod, paśla čaho Rasija budzie nastolki asłablenaja, što sama paprosić ab zaklučeńni miru. Dziaržaŭny sakratar ZŠA ličyć hety płan nierealistyčnym.

Pavodle Rubia, Zialenski moh padpisać ramkavaje ekanamičnaje pahadnieńnie z ZŠA ab ukrainskich nietrach jašče piać dzion tamu, ale «nastojvaŭ na vizicie ŭ Vašynhton». Abvinavačvajučy Zialenskaha ŭ pierapałcy ŭ Avalnym kabiniecie, dziaržsakratar zajaviŭ, što było vialikaj pamyłkaj «pačać čytać nam lekcyi pra toje, što dypłamatyja nie spracuje».

Kamientary da artykuła