Rasijskija prapahandysty pakazali Pucina ŭ Kurskaj vobłaści

Rasijskija dziaržaŭnyja ŚMI apublikavali kadry, na jakich, jak śćviardžajecca, Uładzimir Pucin naviedvaje adzin z kamandnych punktaŭ u Kurskaj vobłaści. 

Valeryj Hierasimaŭ sustrakaje Pucina kala ŭvachodu ŭ budynak. Skrynšot ź videa

Na prademanstravanych videa Pucin u vajskovaj formie, jaho sustrakaje načalnik Hienieralnaha štaba US RF Valeryj Hierasimaŭ.

Ahienctva TASS padkreślivaje, što Pucin upieršyniu naviedaŭ Kurskuju vobłaść z momantu ŭvarvańnia ŭkrainskich vojskaŭ u hety rehijon, jakoje adbyłosia 6 žniŭnia 2023 hoda.

Valeryj Hierasimaŭ zajaviŭ, što na siońniašni dzień rasijskija vojski kantralujuć bolš za 86% ad płoščy, zaniataj raniej USU ŭ Kurskaj vobłaści. Pa słovach načalnika Hienštaba, za apošnija piać dzion rasijskaja armija ŭziała pad svoj kantrol 24 nasielenyja punkty i 259 kv. km terytoryi.

U svaju čarhu, Uładzimir Pucin zajaviŭ, što Kurskuju vobłaść «treba całkam vyzvalić» i «padumać pra stvareńnie zony biaśpieki ŭzdoŭž dziaržmiažy».

Pucin u vajskovaj formie padčas narady. Skrynšot ź videa

U toj ža čas u niezaležnych rasijskich ŚMI vykazvajucca sumnievy, što videa z Pucinym sapraŭdy źniataje ŭ Kurskaj vobłaści i źviartajuć uvahu na niezvyčajnyja momanty ŭ im. Tak, kamientujučy poŭnaje videa z narady Pucina, vystaŭlenaje supracoŭnikam telekanała «Rasija» Paŭłam Zarubinym, vydańnie «Mieduza» adznačaje:

«Na im u prezidenta Rasii niezvyčajna vysoki hołas, jaki da taho ž nie supadaje z karcinkaj».

Praŭda, u aficyjnym telehram-kanale Kramla paśla vykłali videa vystupleńnia Pucina, na jakim u jaho ŭžo narmalny hołas.

Kamientary da artykuła