У фонду, куды прыходзілі грошы для Каардынацыйнай рады, з'явіўся новы кіраўнік замест зніклай Мельнікавай
Віталь Пацехін — былы вайсковец, прысуджаны ў Беларусі да завочных 24 гадоў зняволення за атаку на базу АМАПу ва Уруччы. У Польшчы ён займаецца аптовым гандлем.
Анжаліка Мельнікава
Новым старшынёй праўлення фонду BIAŁORUŚ LIBERTY стаў беларус Віталь Пацехін. Замена кіраўніка адбылася 9 красавіка 2025 года.
Раней фондам, на рахунак якога прыходзілі грошы на дзейнасць Каардынацыйнай рады і «Кіберпартызанаў», кіравала Анжаліка Мельнікава, якая, нагадаем, знікла ў сакавіку 2025 года. Дзе яна цяпер, дагэтуль незразумела.
Капітан Віталь Пацехін — той чалавек, каго беларускія сілавікі абвінавацілі ў атацы на базу АМАПа ў 2021 годзе.
Паводле матэрыялаў следства, былы вайсковец Пацехін пры дапамозе кантрабандыстаў перамясціў з Украіны дрон з вялікай грузападымальнасцю і на працягу некалькіх месяцаў вучыўся ім кіраваць. У ноч на 25 верасня 2021 года ён з дапамогай беспілотніка скінуў дзве пяцілітровыя бутэлькі з запальнай сумессю на базу АМАП. Пасля гэтага выехаў з Беларусі па падрыхтаваных шляхах адыходу.
Якіх-небудзь значных пашкоджанняў выбухі базе не нанеслі, аднак Пацехіну завочна прысудзілі 24 гады зняволення за тэракт.
Мяркуючы па інфармацыі з базы польскіх юрыдычных асобаў, Пацехін узначальвае фонд SNB. Гэта кампанія займаецца аптовым гандлем.
Чытайце таксама:
З акаўнта зніклай Мельнікавай былі спампаваныя файлы Каардынацыйнай рады
Маці Анжалікі Мельнікавай: «Унукам кажу, што яна ў камандзіроўцы»