Японскі вытворца матацыклаў прэзентаваў робата-каня

Кампанія Kawasaki прадставіла канцэпт-кар, якога яшчэ ніхто не бачыў, — двухмеснага чатырохногага робата, кіраванне якім робіцца з дапамогай рухаў цела ездака.

Робат-конь Corleo ад кампаніі Kawasaki. Скрын відэа: KawasakiGroupChannel / YouTube

Як паведамляе New Atlas, на выставе Osaka Kansai Expo 2025 японская карпарацыя Kawasaki Heavy Industries паказала, якім можа быць транспарт заўтрашняга дня — і гэта зусім не лятаючы аўтамабіль, а робат-конь з вадародным рухавіком. Мадэль атрымала назву Corleo.

Як сцвярджае вытворца на сваім сайце, гэта новая катэгорыя персанальнага пазадарожнага транспартнага сродку, які спалучае праходнасць з устойлівасцю матацыкла.

Фота: khi.co.jp

Асноўная асаблівасць — чатыры незалежныя робатызаваныя нагі, кожная з якіх абсталяваная «капытом» з гумовай паверхняй, што адаптуецца да рэльефу.

Блок задніх ног можа балансаваць уверх і ўніз незалежна ад перэдняга блока, што дазваляе лепш гасіць удары падчас руху. Corleo можа хадзіць, скакаць, уздымацца па прыступках і пераадольваць перашкоды.

«Скарыце горы, дыхайце свежым паветрам і атрымлівайце асалоду ад панарамных краявідаў», — заклікае вытворца.

Фота: khi.co.jp

Карыстальнік кіруе Corleo, паварочваючы руль і перамяшчаючы вагу цела. Датчыкі ціску на педалях і рулі фіксуюць сілу гэтых рухаў. Для камфорту прадугледжаная магчымасць рэгулявання вышыні страмёнаў і вугла нахілу. Усё гэта для таго, каб карыстальнік адчуваў сябе не проста пасажырам, а часткай машыны.

Замест звычайнага рухавіка ў Corleo вадародны генератар аб’ёмам 150 см³. Вадарод падаецца з балонаў, устаноўленых ззаду, а атрыманая энергія сілкуе электрапрывады ў кожнай назе.

Перад ездаком — інфармацыйная панэль, на якой адлюстроўваюцца ўзровень вадароду, становішча цэнтра цяжару, кірунак маршруту і іншыя паказчыкі. Уначы Corleo праектуе стрэлкі на зямлю, каб абазначыць бяспечны шлях наперад.

Пакуль што Corleo — гэта толькі прататып, які ўмее стаяць, хадзіць і пазаваць. У Kawasaki заяўляюць, што робат-конь можа паступіць у масавую вытворчасць да 2050 года.

Каментары да артыкула