Praŭładny kanał: Kali dziaržaŭnyja vydańni nie mohuć vyčyścić zabaronienyja spasyłki, to jak patrabavać hetaha ad zvyčajnych rabaciah
«Nieparadak».
Za staryja reposty navin zabłakavanych resursaŭ ludziej kidajuć na sutki, ale takich spasyłak proćma na sajtach dziaržaŭnych miedyja i orhanaŭ. Ilustracyjnaje fota: «Naša Niva»
Praŭładny telehram-kanał «Hrafač» źviarnuŭ uvahu na stary artykuł u «SB. Biełaruś siehodnia», dzie zastałasia spasyłka na Tut.by i fota z łahatypam partała, jaki ŭłady pryznali ekstremisckim.
Tak vyhladaŭ artykuł na sajcie «SB. Biełaruś siehodnia»
«Kali ŭžo dziaržaŭnyja vydańni z cełymi redakcyjami nie mohuć u siabie vyčyścić usie spasyłki i zhadki ciapier zabaronienych ŚMI, to jak možna patrabavać hetaha ad zvyčajnych rabaciah abo babul u «Adnakłaśnikach».
A to lubiać u nas pradjaŭlać pretenzii za staryja reposty, łajki i padpiski. Nieparadak», — napisaŭ «Hrafač».
Aŭtar kanała pažartavaŭ, što kali b jon byŭ turbapatryjotam, to ŭžo kryčaŭ by, što «bečebešniki i prychilniki dziaržpieravarotu praleźli ŭ śviataja śviatych», i patrabavaŭ pravieści čystki.
«SB» u tym artykule nieŭzabavie vydaliła spasyłki na Tut.by.