Biełaruskija siłaviki vyvieźli zatrymanaha rasijskaha komika ŭ les i katavali elektrašokieram
Aryštavany ŭ Biełarusi za žart pra biaznohaha mužčynu komik Arciemij Astanin zajaviŭ, što biełaruskija siłaviki paśla zatrymańnia źbili jaho dubinkami i katavali tokam, piša «Ostorožno, novosti» sa spasyłkaju na pravaabaroncu Jevu Mierkačovu.
Jak raspaviała člen rasijskaha Savieta pa pravach čałavieka Jeva Mierkačova (da jaje źviarnułasia advakat komika), padčas kanvairavańnia ź Biełarusi ŭ Rasiju mašyna z Astaninym zajechała ŭ les.
Stendapiera vyvieli z aŭtamabila i stali źbivać try čałavieki — jany ŭžyvali dubinki i elektrašokier.
Paśla pieradačy ŭ Rasiju mužčynu nie bili.
Užo ŭ Maskvie Astanin padaŭ zajavu ab złačynstvie i paprasiŭ pravieści miedahlad, dla jakoha jaho advieźli ŭ balnicu. Daktary dyjahnastavali ŭ komika pierałom pazvanka, udary, a taksama vyjavili prablemy ź lohkimi.
Ciapier stendapier znachodzicca ŭ maskoŭskim SIZA-7 — tam jon «ledź pierasoŭvajecca».
17 sakavika ŭ Biełarusi byŭ zatrymany komik Arciemij Astanin i pieradadzieny ŭ Rasiju. U RF suprać jaho zaviali kryminalnuju spravu za žarty. Pavodle rasijskaha SK, na kancercie Astanin «vykazvaŭ niehatyŭnyja i abraźlivyja kamientary na adras udzielnika śpiecyjalnaj vajennaj apieracyi».
Kryminałku suprać komika zaviali, imavierna, praz žart, u jakim Astanin raspaviadaje, jak u pierachodzie mietro jon sutyknuŭsia z mužčynam, jaki straciŭ nohi. Komik nie zhadvaje vajnu, ale kaža, što mužčyna biez noh «na minie padarvaŭsia».
Biełaruskija ž siłaviki paśla zatrymańnia pryčapili na zatrymanaha stendapiera miasarubku.
Arciemij Astanin žartavaŭ pra adzin z rasijskich rehijonaŭ, dzie maci zahinułych akupantaŭ atrymali ŭ padarunak miasarubki. Ale nasamreč takaja historyja sapraŭdy była. U Murmanskaj vobłaści «Adzinaja Rasija» padaryła maci zahinułych udzielnikaŭ vajny miasarubki — u partyi śćviardžajuć, što žančyny sami pra heta paprasili.
Taksama ŭčora stała viadoma, što biełaruskija siłaviki złamali rebry i chrybietnik Astaninu padčas zatrymańnia.
Ciapier čytajuć
Vieniesuełka, jakaja pracuje na BT, raspaviała, čamu jaje siamja dumaje, što jana ŭ Biełarusi vielmi bahataja. Pryčyny vas ździviać13
Kamientary
18 čisła kotoryje k tomu žie močili dień vnutrieńnich vojsk so vsiemi vytiekajuŝimi.