FSB zajaviła pra zatrymańnie padazravanaha ŭ zabojstvie hienierała Maskalika. Mahčyma, jaho departavali z Turcyi
Rasijskaja Fiederalnaja słužba biaśpieki zajaviła pra zatrymańnie nibyta ahienta ŭkrainskich śpiecsłužbaŭ, padazravanaha ŭ zabojstvie ranicaj 25 krasavika namieśnika načalnika hałoŭnaha apieratyŭnaha ŭpraŭleńnia Hienštaba US RF hienierał-lejtenanta Jarasłava Maskalika.
«U vyniku nieadkładnych mier zatrymany ahient ukrainskich śpiecsłužbaŭ Kuzin Ihnat 1983 hoda naradžeńnia, jaki maje dazvoł na žycharstva va Ukrainie», — cytuje rasijskaje dziaržaŭnaje infarmahienctva TASS paviedamleńnie Centra hramadskich suviaziaŭ FSB.
U FSB śćviardžajuć, što mienavita Kuzin zaminiravaŭ aŭtamabil Volkswagen Golf u padmaskoŭnaj Bałašysie, u vyniku vybuchu jakoha zahinuŭ Maskalik. Nibyta ŭkrainski ahient nabyŭ aŭtamabil, u jakim i pastaviŭ samarobnaje vybuchovaje prystasavańnie. Kampanienty dla vybuchoŭki jon uziaŭ nibyta z tajnika, abstalavanaha śpiecsłužbami ŭ Maskoŭskaj vobłaści.
Pavodle viersii FSB, vybuchovaje prystasavańnie dystancyjna aktyvavali z Ukrainy, kali Maskalik vychodziŭ z padjezda.
Padazravanaha dastavili ŭ rasijski Śledčy kamitet u ramkach kryminalnaj spravy pavodle č. 2 art. 205 (terarystyčny akt), č. 1 art. 222.1 (niezakonnaje zachoŭvańnie vybuchovych rečyvaŭ abo vybuchovych pryład) KK RF.
U dzień padryvu Maskalika blizkija da rasijskich siłavikoŭ telehram-kanały paviedamili, što Kuzin paśpieŭ vylecieć u Turcyju. Mahčyma, jaho departavali.
Kamientary