Elemienty maŭrytanskaha stylu. U teatry imia Horkaha raskazali, jak źmienicca jahony budynak

Ramont minskaha teatra imia Maksima Horkaha staličnyja ŭłady płanujuć zaviaršyć užo ŭ nastupnym hodzie, paviedamili ŭ efiry telekanała STB.

Fota: STB

U vyniku ramontu źniešniaje abličča teatra, jak śćviardžajecca, značna pamianiajecca.

U im ŭžo praviali raboty pa demantažy. Idzie prakładka novych inžyniernych sietak, zalityja padłoha i bieton pad asnovu dla novaha hanka. Rabočyja praviali hidraizalacyju padmurka, zamianili dach i pačali stavić sceničnuju miechaniku.

U efiry telekanała raskazali, što hałoŭny fasad teatra atrymaje elemienty maŭrytanskaha stylu, a na ŭvachodnaj hrupie źjaviacca afišnyja słupy i lapnina.

«Nie tak daŭno byŭ praviedzieny kapitalny ramont u 2021 hodzie, ale jon byŭ kropkavy, my zakranuli tolki płanšet sceny i śvietłavoje abstalavańnie, u teatry kulhaŭ huk», — kanstatavała pieršaja namieśnica dyrektara teatra Natalla Hramyka.

Pavodle jaje słoŭ, paśla rekanstrukcyi ŭ teatry źjavicca vysakakłasnaje hukavoje abstalavańnie, jakomu treba prajści śpiecyjalnyja akustyčnyja vyprabavańni.

«Vierchniaja miechanizacyja štankietnych haspadarak u nas budzie novaja, jana ŭ nas była supraćvahavaja, budzie pieraviedzienaja ŭ viertykalnaje, budzie lohkaja va ŭpraŭleńni», — udakładniła namieśnica dyrektara.

Natalla Hramyka asabliva adznačyła, što ciapier hetym abstalavańniem možna budzie kiravać ź pieršaha paviercha, a raniej supracoŭnikam teatra davodziłasia kiravać miechanikaj na pierachodnych mastkach.

Kali ŭsie raboty ŭ teatry buduć zavieršanyja, u hladzielnaj zale pastaviać 380 kamfortnych kresłaŭ. Na stoli źjavicca aŭtentyčny rośpis, a na partale sceny adnoviać lapninu.

«Dla naviedvalnikaŭ adkryjuć raniej niedastupnuju častku faje. Taksama adnoviać histaryčny rośpis na cokalnym paviersie. Zaviaršyć ramont płanujuć da lutaha 2026 hoda», — padkreślili ŭ siužecie STB.

Kamientary da artykuła