«U mianie pryjom kaštuje 120 rubloŭ, čamu ja pavinna pracavać za 44, bł**, rubli?!» Daktary abmiarkoŭvajuć rehulavańnie cen

Naprykład, pieršasny pryjom śpiecyjalista, kandydata miedycynskich navuk ź lutaha nie moža kaštavać daražej za 45 rubloŭ, a doktara miedycynskich navuk, a taksama dacenta i kandydata miedycynskich navuk — 47 rubloŭ.

Hučyć niamała zmročnych prahnozaŭ nakont taho, što abmiežavańnie cen na pryjom budzie vyšturchoŭvać vysokakvalifikavanych śpiecyjalistaŭ na rynak pracy susiednich krain.

— Dośvied luboj raźvitoj krainy pakazaŭ, što efiektyŭnaja jakasnaja miedycyna — heta strachavaja miedycyna. Heta halina ekanomiki, jakaja daje zarablać usim, chto zadziejničany ŭ joj. Heta vysokija standarty, adukavanaść, kvalifikacyja, unifikacyja, prazrystaść, zakonnaść, abaronienaść abodvuch bakoŭ i harantyi, — razvažaje adna doktarka.

Jana dadaje:

— U niedaraźvitaj krainie nie dajuć pracavać navat entuzijastam, jakija viedajuć, jak treba, mohuć realizavać hetyja viedy, ale niama kali i za što. Niemahčyma jakasna apytać pacyjenta, vykazać mierkavańnie pra dyjahnaz, pryznačyć daabśledavańnie, terapiju, zapoŭnić papiery za paŭhadziny.

Žančyna sumna žartuje i prapanoŭvaje vypić, nie čokajučysia, za materyjalnuju ŭznaharodu vysokaintelektualnaj pracy.

— Moža, dziejačy ad ułady ličać, što doktar — adzinka nastolki aduchoŭlenaja, što siłkujecca tolki chlebam nadzionnym? I pytańni byćcia jaho cikaviać tolki z punktu hledžańnia pracy mozhu i dvuch kruhoŭ krovazvarotu? I dziaciej u daktaroŭ, napeŭna, nie byvaje. I patreb z žadańniami…

Siarod daktaroŭ jość tyja, chto ŭ zachapleńni ad idei Minzdaroŭja. Viadomaja hiniekałahinia-błohierka vystaviła ŭ storys paviedamleńnie kalehi, jakaja pachvaliłasia, što raniej jaje pryjom u pryvatnym miedcentry kaštavaŭ 38 rubloŭ, a ŭ lutym cana stanie vyšejšaj.

— Ja raniej kazała, što dla bolšaści, moža, ničoha i nie zdaryłasia. Zdaryłasia tolki ŭ mianie, a taksama ŭ blizkich mnie krutych lekaraŭ, u jakich pryjom byŭ 90, 100, 150 rubloŭ. Najlepšyja rozumy i cudoŭnyja ludzi taksama sumujuć, — prakamientavała doktarka.

Doktarka paskardziłasia, što joj vielmi niepryjemna razumieć, što ŭsio, čaho jana dabivałasia doŭhija hady, abiasceniena ŭ hrašovym ekvivalencie jaje rodnaj krainy.

— Jak narmalny śpiecyjalist moža pačać zarablać u try razy mienš? Čamu ja pavinna heta ciarpieć? U mianie pryjom kaštuje 120 rubloŭ, čamu ja pavinna pracavać za 44, bł**, rubli?!

Hiniekałahinia dumaje, što 2025 hod moža stać apošnim u jaje doktarskaj karjery, bo nie hatovaja mirycca z rehulavańniem koštu jaje pracy.

— Siem hadoŭ ja budavała svoj błoh, nabirała papularnaść, była saboj i znajšła amataraŭ mianie jak śpiecyjalista. I niachaj asudziać, što ja znoŭ pra hrošy. A jak ža dapamoha ludziam? Mnie p****j, što padumajuć. Ja žyć chaču narmalna, a časam navat dobra.

Inšyja z aburanych miedyjnych daktaroŭ tłumačać, kolki hrošaj jany ŭkłali ŭ svaju adukacyju paśla taho, jak skončyli miedycynski ŭniviersitet.

Adna vysokazapatrabavanaja doktarka-nieŭrołah adznačyła:

— Vučycca i padvyšać svaju kvalifikacyju mnie padabajecca, ja rablu heta rehularna ŭžo 15 hadoŭ. 10 hadoŭ ja pracuju nieŭrołaham, a vučusia razoŭ u sto bolš, čym va ŭniviersitecie. Šmat pračytanych knih, hadziny prahledžanych viebinaraŭ i kanfierencyj, kursy pierapadrychtoŭki ŭ Biełarusi i Rasii, navučańnie novym mietodykam lačeńnia, pajezdki na vočnyja sieminary ŭ Rasiju — usio heta kruta. Mnie vielmi padabajecca toje, što ja nie spyniajusia na dasiahnutym i idu ŭvieś čas napierad.

Inšaja hiniekałahinia vykazvajecca jašče bolš žorstka:

— Z takimi ŭmovami kleić doma viejki bolš vyhadna i biaśpiečna ŭ płanie adkaznaści, čym pracavać doktaram. Ja nie viedaju, jak my budziem pracavać. Ja nie viedaju, jak i navošta ciapier imknucca raźvivacca, navučacca i dzie brać hetuju čortavu matyvacyju jakasna akazvać miedycynskija pasłuhi. Ciapier jaje nul. Ja viedaju, heta nie vaša prablema zaraz. Ale maŭčać mnie pra heta składana. Ja ŭ rospačy.

Doktarka skardzicca, što na svaju dadatkovuju adukacyju patraciła nie mienš za 2 tysiačy dalaraŭ. Jana śćviardžaje, što dziakujučy hetamu atrymała viedy, jakich joj nie dali ni va ŭniviersitecie, ni na dziaržaŭnych kursach pavyšeńnia kvalifikacyi.

— Heta byŭ moj vybar — navučycca akazvać adekvatnuju dapamohu biez fantazij i zdahadak. Ale kab hetamu navučycca, treba zarabić na navučańnie takoha ŭzroŭniu.

Hiniekałahinia dadała, što vydatkoŭvała na čarhovy miedycynski sieminar hrošy, jakija adryvała ad svajoj siamji.

— Ja raźličvała, što maje viedy, navyki, mahčymaść lepš stavić dyjahnazy, lepš dapamahać ludziam, dapamohuć mnie akupić maje ŭkładańni. A chtości źvierchu ličyć, što ja atrymlivaju zvyšprybytki. Tamu treba ŭrehulavać košt pasłuh, jakija ja akazvaju. Bo niama čaho raźličvać akupić svaje ŭkładańni i naohuł niama čaho davać mahčymaść zarabić na hetyja ŭkładańni.

Jość siarod vysokazapatrabavanych i tyja, chto abiacaje skaracić svoj pracoŭny čas — chacia b u sacyjalnych sietkach. Adna repraduktołah paskardziłasia, što kožny dzień paśla pracy zvyčajna adkazvała na 20-30 paviedamleńniaŭ z pytańniami ad pacyjentaŭ.

Ciapier jana padkreślivaje, što kansultavać budzie vyklučna ŭ pracoŭny čas:

— Ja bolš nie adkazvaju na paviedamleńni ŭ miesiendžarach. I navat kali vy pišacie ŭ instahram ci adminam kliniki «prosta spytać» — kali łaska, zapišyciesia na pryjom i «prosta spytajcie». A svoj asabisty čas ja budu tracić na svajo žyćcio i zdaroŭje, a nie na žyćcio i zdaroŭje pacyjentaŭ.

Cikava i toje, jak pacyjenty reahujuć na navinu ab tym, što ź lutaha ceny ŭ pryvatnych centrach pavinny pajści ŭniz. Viadomaja błohierka-doktarka paskardziłasia, što zaraz u jaje pačalisia masavyja admieny vizitaŭ.

Doktarka pakazała, što ŭ jaje adrazu siem klijentak admianili zapłanavanyja naviedvańni. Jana miarkuje, što žančyny, jakim nie treba terminovaja kansultacyja, vyrašyli pačakać kala dvuch miesiacaŭ, kab sekanomić.

— Praz novyja zakony razumieju, što, mabyć, da lutaha možna prypyniać pryjom, — sumna reziumuje hiniekałahinia. — Usie buduć čakać nizkich cen za tuju ž jakaść.

Pavialičyć

Inšyja ž pacyjenty šukajuć varyjanty padtrymać lubimych daktaroŭ hrašyma i pytajucca, ci možna budzie zapisvacca na dva akiency zapar, kab zapłacić za pryjom bolš.

Adna z papularnych u sacyjalnych sietkach hiniekałahiń napisała ŭ storys:

— Mnie šmat chto pisaŭ, što jany hatovyja na heta. Ale z pazicyi praviaralnych orhanaŭ heta moža być niapravilna rasceniena. Treba atrymać na hety kont aficyjny adkaz Ministerstva achovy zdaroŭja. Budziem adnaznačna pisać zapyt.

• 2
• 0
• 11
• 22
• 3
• 5
• 7
• 0