Budučynia nastupiła: Kitaj płanuje raźvivać latajučy bieśpiłotny transpart
Apošnija hady Kitaj aktyŭna prasoŭvaje kancepcyju nizkavyšynnaha pavietranaha transpartu: bieśpiłotnyja latajučyja taksi i drony-dastaŭščyki. Hetyja technałohii mohuć kardynalna źmianić haradski transpart i łahistyku.
Jak piša brytanskaja daśledčaja i miedyjnaja kampanija Hurun Report, viadomaja svaimi rejtynhami samych bahatych ludziej, najbujniejšych kampanij i inavacyjnych startapaŭ pa ŭsim śviecie, u Kitai nabiraje abaroty honka za «nizkavyšynnuju ekanomiku» (Low-Altitude Economy), jakaja achoplivaje ekanamičnuju dziejnaść u pavietranaj prastory da 1000 mietraŭ nad ziamloj, choć u niekatorych rehijonach jana moža pašyracca da 3000 mietraŭ u zaležnaści ad miascovych umoŭ.
«Nizkavyšynnaja ekanomika» ŭjaŭlaje saboj intehravanuju ekanamičnuju madel, u jakoj naroŭni ź piłatavanymi aparatami šyrokaje prymianieńnie pavinny znajści bieśpiłotnyja latajučyja srodki. Jany vykarystoŭvajucca ŭ roznych siektarach: pasažyrskich i hruzavych pieravozkach, praviadzieńni vyratavalnych apieracyj i inśpiekcyjnych rabot.
Najbolšuju cikavaść apošnija hady vyklikaje kancepcyja eVTOL (electric vertical takeoff and landing) — bieśpiłotnych elektryčnych aparataŭ viertykalnaha ŭźlotu i pasadki. Hety typ pavietranaha transpartu spałučaje biaśpieku vialikich samalotaŭ, zručnaść viertalotaŭ i ekanamičnaść elektramabilaŭ.
eVTOL-aparaty nie vykidvajuć škodnych rečyvaŭ, patrabujuć mienš prastory, a taksama adroźnivajucca nizkimi vydatkami i nizkim uzroŭniem šumu. Poŭnaja aŭtamatyzacyja minimizuje ryzyku čałaviečaha faktaru. Ich asnoŭnaje pryznačeńnie — unutryharadskija i mižharadskija pieravozki na nievialikija adlehłaści.
Raźvićcio «nizkavyšynnaj ekanomiki» aktyŭna padtrymlivajecca inviestycyjami. Pa stanie na kastryčnik 2024 hoda 23 kampanii, jakija zajmajucca raspracoŭkaj dronaŭ i eVTOL, pryciahnuli finansavańnie na sumu kala 13,8 miljona dołaraŭ ZŠA. Pry hetym inviestarami ŭ hety siektar vystupajuć nie tolki bujnyja vienčurnyja fondy, ale i dziaržaŭnyja inviestycyjnyja fondy.
U Kitai ŭ śfiery eVTOL viaduć raspracoŭki jak tradycyjnyja aŭtavytvorcy (GAC, XPeng, Geely), tak i inavacyjnyja kampanii (EHang, Feihang Aviation). Siarod mižnarodnych udzielnikaŭ — Boeing, Airbus, Embraer.
Zhodna z rejtynham Hurun za 2024 hod, čatyry pradprymalniki z «nizkavyšynnaha» siektara ŭvajšli ŭ śpis samych bahatych ludziej Kitaja.
Na dziaržaŭnym uzroŭni raźvićcio «nizkavyšynnaj ekanomiki» padtrymlivajecca stratehičnymi inicyjatyvami. Amal 20 pravincyj i haradoŭ uklučyli hety siektar u svaje płany raźvićcia. Kala 20 rehijonaŭ stvaryli inviestycyjnyja fondy.
Bolš za 100 haradoŭ Kitaja pryniali narmatyŭnyja akty, jakija paskarajuć raźvićcio «nizkavysotnaj ekanomiki». U 15 miehapolisach, uklučajučy Piekin, Šanchaj, Šeńčžeń, Chańčžoŭ i Chefej, raspracoŭvajucca sotni demanstracyjnych prajektaŭ, źviazanych z maršrutami nizkavyšynnych palotaŭ i ich ukaranieńniem.
Kitajskaja prahrama «Zialonaja avijacyja» praduhledžvaje zapusk kamiercyjnych apieracyj eVTOL užo ŭ hetym hodzie, pačynajučy z turystyčnych zon i pryharadaŭ.
Pavodle prahnozaŭ, abjom kitajskaha rynku «nizkavyšynnaj ekanomiki» sioleta dasiahnie 1,5 tryljona juaniaŭ (kala 200 miljardaŭ dołaraŭ), a da 2035 hoda pieravysić 3,5 tryljona juaniaŭ (kala 470 miljardaŭ dołaraŭ).
Da 2030 hoda Kitaj płanuje ŭkaranić 100 000 latajučych aŭtamabilaŭ.
Kamientary