Biełaruskija turysty pryjechali na mora ŭ AAE, ale miascovyja plažy akazalisia ŭ mazucie

«Pryvieźli na plaž, dzie nielha zaharać i kupacca»

U redakcyju źviarnuŭsia čytač Mikita. 18 krasavika jon prylacieŭ na adpačynak u Fudžejru. Jašče da vyletu jon viedaŭ, što za tydzień da hetaha ŭ toj miascovaści adbyŭsia raźliŭ mazutu.

— Naš turahient rabiŭ aficyjny zapyt turapierataru prymajučaha boku, i nas zapeŭnili, što plaž Ambreła ačyściać da 19 krasavika, a pakul buduć vazić na inšy. I sapraŭdy, 19-ha čysła nas advieźli na susiedni plaž Kalba — jaho ad mazutu ačyścili, choć usio roŭna zastavalisia nievialikija plamy. Ale kala 12 hadzin usich, chto znachodziŭsia na plažy, vyhnali, pasadzili ŭ aŭtobusy i pavieźli ŭ hateli. Jak akazałasia, hety plaž znachodzicca ŭ inšym emiracie — Šardža, z samymi strohimi praviłami.

Niekatoryja adpačyvali ŭ cieni palmaŭ, a heta ŭžo ličyłasia nie terytoryjaj plažu. Na samim plažy ŭsiaho 4 nievialikija padstreški, pad jakimi źmiaščajecca pa 6-8 čałaviek. Ale jakich-niebudź tabličak z praviłami ci vusnych papiaredžańniaŭ ad hatela nie było.

Paźniej situacyju prakamientavali ŭ kamitecie pa turyźmie emirata. U viedamstvie vykazali zdahadku, što turysty nie pahladzieli na ŭkazalniki i pajšli na haradski plaž Family beach, jaki adviedzieny dla piknikoŭ. Tam nieabchodna vykonvać dres-kod i nielha znachodzicca ŭ kupalnikach. Dla zaharu vydzielena nievialikaja zona.

A kupacca i zusim zabaroniena. Ale niekatoryja turysty ŭsio roŭna pasprabavali kupacca ŭ vopratcy — heta taksama nie spracavała. Pa słovach Mikity, tranśfiery na hety plaž admianili.

«Kali siadzieć na piasku, budzieš uvieś u mazucie»

Sam plaž Ambreła pa-raniejšamu začynieny, a tranśfier na inšyja plažy nie praduhledžany. Za 4 dni ŭ Emiratach čytaču ŭdałosia pravieści na zalivie ŭsiaho try hadziny. Ale siońnia statystyka musić palepšycca. Turystam prapanavali samastojna dabracca na plaž Chor-Fakan — za 30 kiłamietraŭ ad hatela. Mienavita tak jany i zrabili.

— Unačy, pryblizna ŭ 4 hadziny, jak skazali na resepšenie, byŭ čarhovy vykid mazutu. Z-za źjedlivaha pachu my adčuli atručvańnie. Tamu vyrašyli źjechać na daloki plaž na taksi, ale tut taksama šmat mazutu i alejnaja plonka miescami. Dzie-nidzie — plamy pamieram z dałoń. Ale na śpiakocie + 37 u cieni nie kupacca prosta niemahčyma. Kali siadzieć na piasku, budzieš uvieś u mazucie. Admyć jaho ź cieła vielmi składana, a z rečaŭ — nierealna.

Turystam prapanavali pierasialicca ŭ inšyja hateli ŭ susiedni emirat Ras-el-Chajma, ale z dapłataj. Pakul jany čakajuć paćviardžeńnia ad hatelaŭ. Kali pierajezd i adbudziecca, to zaŭtra. Košt tranśfieru ŭ adzin bok — $100 za dvaich, dapłata za hatel — $110 z pakoja. Vylecieć nazad turysty pavinny praz tydzień — 29 krasavika ranicaj.

Adkaz turapieratara: «U Emiratach zaraz vysoki siezon i šmatlikija hateli całkam zaniatyja»

Redakcyja źviarnułasia da turapieratara «Tajm Vajaž» za kamientarom. Na pytańnie adkazała namieśnik dyrektara Volha Jaromienka:

— Emirat Fudžejra dastatkova vialiki, incydent z raźlivam mazutu zakranuŭ nie ŭsiu jaho terytoryju. U asnoŭnym razmova pra plažy, kudy pryvoziać turystaŭ z demakratyčnych pa košcie haradskich atelaŭ. Niekalki dzion turystaŭ vazili na bolš addaleny plaž, ale ŭ jaho akazaŭsia farmat, jaki nie praduhledžvaje adpačynak u kupalnikach. Tamu miascovyja ŭłady spynili takuju ​​mahčymaść. Na dadzieny momant my čakajem infarmacyju ad prymajučaha boku, kudy jašče moža być arhanizavany tranśfier. Kožny dzień atrymlivajem ad kaleh spravazdačy ŭ piśmovym vyhladzie ab stanie plažaŭ.

My na suviazi z usimi turahientami, viedajem ab situacyi i prapanujem turystam roznyja varyjanty rašeńnia pytańnia. Składanaść u tym, što ŭ Emiratach zaraz vysoki siezon i mnohija hateli całkam zaniatyja. Ale my šukajem varyjanty, kudy pry žadańni možna pierasialicca chutkim časam, i prapanujem ich turystam. Dalej rašeńnie za imi.

U turystyčny pakiet uvachodzić avijabilet, pražyvańnie ŭ hateli z abranym typam charčavańnia, tranśfier z aeraporta i strachoŭka. Tranśfier ad hatela da plažu pradastaŭlajecca jak kamplemientarnaja pasłuha — na mierkavańnie hatela, u dahavory ab akazańni turystyčnych pasłuh hety punkt nie prapisany. Tym nie mienš my imkniomsia zrabić usio mahčymaje dla kamfortnaha adpačynku turystaŭ.

Na pytańnie, ci prapanujuć zaraz turystam tury ŭ Fudžejru, Volha nie moža adkazać: jany supracoŭničajuć tolki z turahientami, a tyja ŭžo ŭ svaju čarhu z klijentami. Adnak ab situacyi z raźlivam usim turahientam dobra viadomaja. Sami ž hateli ŭ emiracie praciahvajuć pracavać u zvyčajnym režymie.

• 1
• 0
• 1
• 5
• 1
• 0
• 1
• 0