Biełarusy ź vizami ŭ Litvie zastajucca biez bankaŭskich rachunkaŭ. Jakija ŭ ich varyjanty

Litoŭski anłajn-bank Paysera ŭ krasaviku razasłaŭ karystalnikam z hramadzianstvam Biełarusi i Rasii papiaredžańni pra zakryćcio rachunkaŭ praz 14 dzion. Kab hetaha paźbiehnuć, nieabchodna pradstavić jeŭrapiejski DNŽ. Nacyjanalnaj vizy, naprykład, niedastatkova.

«Jak možna zabłakavać rachunak, kali čałaviek nie moža viarnucca dadomu?»

Biełaruska Darja (imia źmieniena) raspaviał, jak joj druhi raz mohuć zabłakavać litoŭski bankaŭski rachunak, na jaki pastupajuć srodki za pracu.

Rachunak u Paysera jana adkryvała ŭ kancy 2022 hoda. Tady inšyja banki ŭžo admaŭlali biełarusam, i Paysera zastavałasia adzinym varyjantam. Kab stać klijentam, dastatkova było vizy katehoryi C.

U siaredzinie krasavika hetaha hoda Darji pryjšoŭ list ad banka na ruskaj movie: prasili pradstavić DNŽ abo mihracyjny siertyfikat, vydadzieny ŭ ES abo Šviejcaryi, inakš praz 14 dzion z momantu atrymańnia lista srodki na rachunku zamaroziać.

U Darji niama DNŽ — tolki humanitarnaja viza D, atrymana na terytoryi Litvy. Jana vyjechała ź Biełarusi ŭ siaredzinie 2024 hoda. Jašče nie padavałasia na DNŽ, bo pakul vyrašaje, dzie choča žyć dalej.

Darja ličyć, što heta niespraviadliva — sankcyi zakranajuć zvyčajnych ludziej, jakija nie padtrymlivajuć vajnu.

«Humanitarnaj vizy D užo niedastatkova! Pryčym atrymać takuju vizu na terytoryi Biełarusi ciapier amal niemahčyma. Toj, chto jaje atrymlivaje, znachodziačysia ŭ Litvie, dakładna nie padtrymlivaje vajennuju ahresiju. Hetaha čałavieka treba padtrymlivać!», — aburajecca jana.

Na jaje litoŭski rachunak pastupajuć jeŭrapiejskija srodki za kulturny prajekt dla biełarusaŭ. Da rachunku pryviazanyja servisy, naprykład, pracoŭny Zoom.

«Budzie tolki keš. Arhanizacyja, jakaja płacić mnie, abmiežavanaja ŭ mahčymaści pracavać z najaŭnymi. Ja zmahu atrymlivać zarobak tolki častkami, mnie pryjdziecca pastajanna jeździć u Vilniu. Ja navat nie zmahu kupić kvitok na samalot abo aŭtobus.

Jak možna pazbavić čałavieka pracoŭnaha instrumienta i biez taho ŭ składanaj situacyi? Čałaviek nie moža viarnucca dadomu, nie žyvie ŭ svajoj krainie amal hod, i hety rachunak — adziny sposab atrymlivać apłatu i pakryvać bazavyja vydatki. Suprać kaho nakiravanyja sankcyi?!», — nie razumieje jana.

Dadatkovuju składanaść stvaryła toje, što papiaredžańnie pryjšło napiaredadni Vialikadnia, a termin ličycca ŭ kalandarnych dniach.

«Z-za doŭhich vychodnych ja abmiežavanaja ŭ mahčymaści padrychtavać dakumienty i adpravić, kab skarystacca vyklučeńniami z rehłamientu», — kaža jana.

Sproba skarystacca vyklučeńniami

Darja vyrašyła skarystacca vyklučeńniami z rašeńnia ES, u miežach jakich adkryćcio rachunku mohuć dazvolić.

Pa-pieršaje, kali srodki nieabchodnyja dla zadavalnieńnia bazavych patrebaŭ — charčavańnia, arendy žylla, kamunalnych pasłuh, lačeńnia. Pa-druhoje, kali jany pryznačanyja «vyklučna dla vypłaty prafiesijnych hanararaŭ» (artykuł 1v, punkty a i b).

Jana nakiravała ŭ techpadtrymku Paysera niekalki listoŭ z abhruntavańniem, čamu jaje rachunak nie varta błakiravać, spasyłajučysia na vyklučeńni.

Adnak atrymała adkaz z tym samym patrabavańniem pradstavić DNŽ.

Keš

Zaraz na rachunku ŭ Darji hrošaj chopić na 2—3 miesiacy ekanomnaha žyćcia. Jana płanuje zdymać najaŭnyja. Ale i heta składana, bo jana nie ŭ Litvie.

«Dumaju, kudy pieravieści hrošy. Damaŭlajusia sa znajomymi. Spadziajusia, jany zdymuć keš i pieradaduć. Składany šlach, ale ja pracuju nad hetym», — kaža jana.

Darja płanuje padać na vid na žycharstva ŭ červieni. Čakaje, što vydaduć vosieńniu. A značyć, minimum niekalki miesiacaŭ jana budzie biez rachunku i bankaŭskaj kartki.

Hod tamu rachunak udałosia razbłakavać (zaraz naŭrad ci)

Heta ŭžo druhi vypadak, kali Darji mohuć zabłakavać litoŭski rachunak. Pieršy byŭ u śniežni 2023 hoda, napiaredadni Kaladaŭ. Tady joj paviedamili ŭžo postfaktum, što rachunak zabłakavany. Nibyta papiaredžvali, ale jana śćviardžaje, što nijakich paviedamleńniaŭ nie atrymlivała.

Na toj momant Darja znachodziłasia ŭ Biełarusi i pracavała nad kulturnym prajektam za srodki jeŭrapiejskaj arhanizacyi. Jaje hrošy byli zamarožanyja, i častka kamandy nie zmahła atrymać apłatu.

«Heta była vialikaja suma dla mianie i prajekta», — kaža jana.

Srodki byli zamarožanyja na čatyry miesiacy. Uvieś hety čas Darja i donar prajekta viali pieramovy z Paysera. Častka hranta ŭžo pajšła na zarobki. Paysera prapanavała viarnuć uvieś hrant donaru, ale na rachunku hetych hrošaj užo nie było. Unieści reštu na zamarožany rachunak było b składana — u kamandy ŭžo nie zastałosia srodkaŭ.

«Heta byŭ poŭny tryndziec. Nijakija damoŭlenaści, tłumačeńni, što heta kulturny prajekt pry padtrymcy viadomaj jeŭrapiejskaj arhanizacyi — nie spracavali. Navat donar ničoha nie zmoh zrabić. Usie pajšli ŭ adpačynki. Da Kaladaŭ zastavaŭsia dzień-dva», — uzhadvaje jana.

Tady Paysera prapanavała Darji dać inšy zamiežny rachunak dla pieravodu srodkaŭ.

Na toj momant u Darji nie było vizy, jana žyła ŭ Biełarusi. Rachunak razbłakavali paśla pierajezdu i atrymańnia vizy D.

«My atrymlivajem dapamohu jak palitviaźni, ciapier hetaha niedastatkova»

Biełaruska Alona(imia źmieniena) raspaviała, što taksama atrymała ad Paysera papiaredžańnie pra mahčymuju błakiroŭku rachunku, adkrytaha ŭ 2021 hodzie.

«My atrymlivajem dapamohu jak [eks] palitviaźni, dzieciam na Novy hod, da škoły. Pakul šukajem rašeńnie», — raspaviadaje jana.

Raniej jany pakazvali Paysera dakumient, jaki paćviardžaŭ taki status siamji, i heta ratavała rachunak. Ciapier ža adkaz byŭ: hetaha niedastatkova.

Tolki DNŽ, inšych varyjantaŭ nie zastałosia

Juryst, kiraŭnik jurydyčnaj firmy Legal Status Aleś Michalevič kaža, što mahčymaść mieć jeŭrapiejski bankaŭski rachunak bieź jeŭrapiejskaha vidu na žycharstva dla hramadzian Biełarusi i Rasii ŭžo ŭ minułym.

«Kali ŭ vas niama DNŽ — bajusia, vas zabłakuje lubaja jeŭrapiejskaja płaciežnaja sistema. Vy — zanadta ryzykoŭny klijent. Dla takich klijentaŭ zastajucca tolki VIP-banki ŭ Šviejcaryi, dzie pahodziacca pracavać u abmien na vielizarnyja depazity», — tłumačyć jon.

Siarod apieracyj, što vyklikajuć padazreńni bankaŭ i mohuć pryvieści da błakiroŭki rachunku, Michalevič nazyvaje:

• vyvad kryptavaluty, asabliva sum ad niekalkich tysiač jeŭra;
• płaciažy ad 5—10 tysiač jeŭra;
• mnostva drobnych pieravodaŭ zapar z adnolkavymi sumami (naprykład, pa 5 jeŭra);
• apieracyi z «umoŭna biaśpiečnymi» krainami pa-za miežami ES (naprykład, Hruzija, AAE).

Błakiroŭka časta adbyvajecca aŭtamatyčna — tak pracuje sistema baraćby z admyvańniem hrošaj i finansavańniem teraryzmu. Banki abaviazanyja praviarać klijentaŭ, inakš im pahražajuć miljardnyja štrafy. Situacyja paharšajecca z 2022 hoda.

«Situacyja budzie paharšacca i dalej, u mianie niama sumnieńniaŭ», — prahnazuje jon.

• 3
• 0
• 0
• 3
• 0
• 1
• 0
• 0