Ci moža Ihar Sierhiejenka, jaki znachodzicca ŭ sankcyjnym śpisie Jeŭrasajuza, trapić u Vatykan? Akazvajecca, lohka!
A ci zmoh by sam Alaksandr Łukašenka skarystacca takoj nahodaj jak pachavańnie Papy Rymskaha, kab źlatać u Italiju? Spytali ŭ ekśpierta.
Stała viadoma, što Alaksandr Łukašenka daručyŭ prysutničać na pachavańni Papy Rymskaha ŭ Vatykanie byłomu kiraŭniku svajoj administracyi Iharu Sierhiejenku, jaki ciapier zajmaje pasadu śpikiera Pałaty pradstaŭnikoŭ.
Ale jość važny niuans: Ihar Sierhiejenka z 2020 hoda ŭvachodzić u sankcyjny śpis Jeŭrasajuza i tearetyčna nie maje prava naviedvać krainy ES. A trapić u Vatykan, nie trapiŭšy ŭ Italiju, niemahčyma.
«Naša Niva» paprasiła advakata, śpiecyjalista pa mižnarodnym pravavym supracoŭnictvie ŭ kryminalnych spravach Alesia Michaleviča prakamientavać hetu situacyju.
Ekśpiert ličyć, što chutčej za ŭsio ŭ padsankcyjnaha čynoŭnika sapraŭdy atrymajecca naviedać Italiju.
— Voźmiem, naprykład, AAN, hałoŭny ofis jakoj znachodzicca ŭ Ńju-Jorku. Na jaje pasiadžeńni pryjazdžajuć kiraŭniki Irana, KNDR i inšych niedemakratyčnych krain. U takich vypadkach davoli časta padsankcyjnym palitykam vydajuć vizu, jakaja dazvalaje naviedvać nie ZŠA, a tolki Ńju-Jork ci navat kankretnuju častku hetaha horada.
Advakat adznačaje: u mižnarodnaj praktycy z takimi kiejsami ŭsio davoli składana. Unutry Jeŭrapiejskaha sajuza znachodzicca šerah krain, jakija ŭ jaho nie ŭvachodziać — naprykład, Andora, Manaka ci toj samy Vatykan.
— Kali Vatykan zrobić asabistaje zaprašeńnie na pachavańnie Papy Rymskaha dla Ihara Sierhiejenki, ja dumaju, što ź vialikaj dolaj vierahodnaści italjanskaja ambasada vydaść jamu vizu, a italjanskija pamiežniki prapuściać na terytoryju krainy. Sankcyi — heta nie pra kryminalnaje prava i kryminalnaje pakarańnie. Heta administracyjnaja reč, jakaja stvorana, kab sprabavać źmianić pavodziny čałavieka. Na žal, u vypadku palityčnaj nieabchodnaści, takija rečy dastatkova lohka abychodziacca.
Advakat ličyć, što viza ŭ Sierhiejenki budzie adnarazovaja ź vielmi abmiežavanaj kolkaściu dzion. Ale ž jon upeŭnieny, što pytańnie vizitu biełaruskaha čynoŭnika ŭžo ŭzhodniena pamiž Vatykanam i italjanskimi ŭładami.
Na pytańnie, ci mahčyma takoje, što ŭ Vatykan palacieŭ by sam Łukašenka, kali b zachacieŭ hetaha, Aleś Michalevič adkazvaje admoŭna.
— Heta byŭ by vialiki skandał. Chutčej za ŭsio, u takim vypadku zaprašeńnie dasłali b u apošni momant, kali niemahčyma zrabić vizu.
Ciapier čytajuć
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj4
33-hadovy Daniła Harkavy, jaki niečakana pakinuŭ Ofis Cichanoŭskaj, raskazaŭ pra svaju ankałohiju i siem apieracyj
«Minimalny zarobak doktara ŭ Polščy bolšy, čym ja mieła ŭ biełaruskim pryvatnym centry». Doktarka Markiełava — pra pracu ŭ polskaj balnicy i vyrab naturalnaj kaśmietyki1212
Kamientary