Chto staić za pravakatyŭnaj supołkaj DoŁHB? Zdajecca, niepałochanyja školniki

U ciapierašniaj dyktatarskaj Biełarusi padobnyja publičnyja zakliki mohuć rabić albo naiŭnyja ludzi, albo pravakatary, albo siłaviki (jakija mohuć praz takija inicyjatyvy identyfikavać patencyjnych udzielnikaŭ pratestaŭ). Da jakoj katehoryi možna adnieści stvaralnikaŭ DoŁHB?

Najchutčej, pravilny adkaz — naiŭnyja ludzi. Pryčym naiŭnyja jany pieradusim praz svoj uzrost.

Pa infarmacyi «Našaj Nivy», stvaralniki supołki — zvyčajnyja školniki. Jany ličać siabie patryjotami Biełarusi, ale padkreślivajuć, što źjaŭlajucca apalityčnymi. Da padziej 2020 hoda jany staviacca, chutčej, abyjakava, ale hetamu jość prostaje tłumačeńnie — na momant haračaha supraćstajańnia hramadstva i siłavikoŭ jany vučylisia jašče ŭ pačatkovaj škole i zusim nie cikavilisia palitykaj. 

Ci cikaviacca joj ciapier? Heta rytaryčnaje pytańnie. Kali b nasamreč cikavilisia b, to viedali, jak dziaržava abychodzicca z tymi, chto adkryta demanstruje svoj niepadkantrolny intares da palityčnych pracesaŭ. I badaj užo bačyli b «prabačeńni» ad tych, chto nieaściarožna vykazvaŭsia ŭ tyktoku i inšych sacsietkach na temu Pakistana.

Stvaralniki DoŁHB nazyvajuć metaj ruchu abaronu krainy ad hvałtu. Dzieci chočuć ličyć siabie «reziervam biaśpieki» na toj vypadak, kali ŭ Biełarusi budzie adbyvacca niešta nietypovaje.

Tryhieram — i nahodaj pachajpavać — dla hetaha jakraz stała navina pra mahčymy pryjezd pakistancaŭ, ale dzieci płanujuć zmahacca z hvałtam «nie tolki z boku mihrantaŭ».

Rasšyfroŭvajecca DoŁHB jak «doŭh adstajać asobu hramadzian Biełarusi».

Pavialičyć

Kanał abjadnańnia stvorany 19 krasavika, ale apošnimi dniami jaho pačali pijaryć najbolš aktyŭna. Paviedamleńni ŭ supołcy źjaŭlajucca vielmi abryvista. Kab dałučycca da ruchu, treba nazvać svajo imia, uzrost, vobłaść, poł i zhadzicca z praviłami.

Pieršyja zborki maładych ludziej zapłanavanyja na subotu ŭ Breście, Minsku i Homieli. Školniki padrychtavali kryčałki, jakija nibyta nie padpaduć pad 130 artykuł Kryminalnaha kodeksu ab raspalvańni varožaści: «Doŭh stukaje — vorah maŭčyć, za narod naš ščyt staić!», «Daŭhoŭcy tut — voraha nie źličyć, my zachoŭvajem rodny honar!», «Doŭhaviec, ty małajčyna, za narod staiš chrabrec!».

Padajecca, stvaralniki inicyjatyvy ščyra nie razumiejuć, čamu ŭ siłavikoŭ mohuć uźniknuć pytańni da ich.

Pavialičyć

Ułady pahražajuć zatrymańniami tym, chto budzie rezka vykazvacca na temu pryjezdu pakistanskich mihrantaŭ, ale mienavita pra dziejnaść DoŁHB pakul nie vykazvalisia.

Prapahandyst Ryhor Azaronak paraŭnaŭ ich z «ČVK Redan». Rasijskaja moładzievaja subkultura «ČVK Redan» aktyŭničała pa Biełarusi ŭ 2023 hodzie. Tady na z-za ich sustreč milicyja zatrymlivała ludziej, usiaho — kala 300 čałaviek.

• 0
• 0
• 12
• 10
• 2
• 0
• 1
• 1