Ściapan Puciła: Zdajecca, Pratasievič robić navat krychu bolš, čym ad jaho patrabavałasia

— U minułych intervju vy kazali, što na momant pačatku pratestaŭ 2020-ha ŭ kamandzie było ŭsiaho čatyry čałavieki. Ci zastaŭsia chto-niebudź z toj čaćviorki?

— Tolki ja zastaŭsia. Ale z usimi, akramia Ramana Pratasieviča, my ŭ dobrych adnosinach. Časam raimsia, pierakidajemsia paraj słoŭ.

— Sočycie za losam Ramana?

— Nie mocna. Apošni raz ja sačyŭ, kali byŭ vypad Ramana Pratasieviča ŭ moj bok. Na žal, heta nielha było pakinuć biez adkazu — treba było abvierhnuć niepraŭdzivuju infarmacyju. Jon vyklikaŭ mianie na boj. Ja čałaviek mirny. My, tak skažam, lepš budziem pa faktach, pa ličbach hladzieć, a nie pa kolkaści ŭdaraŭ pa hałavie. Heta krychu prymityŭna.

U intervju Ksienii Sabčak Pratasievič zajaviŭ, što padčas pracy ŭ Nexta «zrabiŭ samaje čytanaje ruskamoŭnaje ŚMI ŭ śviecie». Redakcyja adkazała: «Pratasievič prapracavaŭ u prajekcie mienš za hod, jon byŭ zvyčajnym supracoŭnikam, naroŭni z astatnimi. Jon nie źjaŭlajecca ni zasnavalnikam, ni suzasnavalnikam prajekta Nexta». Puciła žartam zaprasiŭ Pratasieviča ŭ Varšavu dla atrymańnia ordena, toj u adkaz vyklikaŭ byłoha kalehu na pajadynak «u luboj niejtralnaj krainie pa praviłach kułačnaha boju».

— To-bok kułačnaha boju nie było?

— Nie było i naŭrad ci budzie. A moža, heta byŭ niejki jahony klič, kab vyjechać ź Biełarusi? Ale chaj pasprabuje inšymi sposabami.

— Ciapier vy nijak nie majecie znosin niepasredna?

— Nie.

— Ale vy ź im usio ž taki pracavali razam praciahły pieryjad. Jak dumajecie, jon sapraŭdy pamianiaŭ pohlady ci prosta havoryć toje, što treba ŭ jaho stanoviščy?

— Składana skazać. Mnie zdajecca, jon prosta hłyboka nieščaślivy. Jon sam kazaŭ, što ŭ depresii, [pje] tabletki, [bačyć] strašnyja sny i hetak dalej. Usio rassudzić čas.

Dla pačatku treba dačakacca taho momantu, kali jon sam zmoža całkam ad pačatku i da kanca ŭsio raskazać biez taho, kab u jaho za śpinaj chtości stajaŭ i padkazvaŭ, što kazać. Viadoma, niepryjemna toje, što, jak mnie zdajecca, jon robić trochi bolš navat, čym ad jaho patrabavałasia. Nu, jak jość.

— Jak dumajecie, toje, što jaho pradstaŭlaje prapahanda jak byłoha redaktara Nexta, heta niejak naškodziła vašamu prajektu? Jon vas dyskredytavaŭ?

— Nie, jon ža były. [Prapracavaŭ] krychu mienš za dzieviać miesiacaŭ.

— Pavodle adnoj z teoryj, za stvareńniem telehram-kanała Nexta stajaŭ žurnalist Uładzimir Čudziancoŭ. Ci tak heta?

— Usie kanały Nexta stvaraŭ asabista ja. U rozny čas źjaŭlalisia tyja, chto tak ci inakš spryjaŭ, dapamahaŭ kanałam — chtości z prasoŭvańniem, chtości z hrafikaj, chtości tekstami, jak i Uładzimir Čudziancoŭ. Ja prosta nie chaču zaraz udavacca ŭ padrabiaznaści, tamu što čałaviek, nakolki ja razumieju, ciapier znachodzicca ŭ Biełarusi, i kožnaje majo słova moža być vykarystana suprać jaho.

Ja ŭžo kazaŭ, što jon dapamahaŭ sa stvareńniem filma «Łukašenka. Kryminalnyja materyjały» ŭ 2019 hodzie. Za heta, ułasna, jamu i padkinuli, jak mnie zdajecca, narkotyki na biełaruska-polskaj miažy, heta była pomsta.

21 listapada 2019 hoda bresckija mytniki źniali žurnalista Uładzimira Čudziancova ź ciahnika, jaki ruchaŭsia ŭ Polšču. Jak paviedamlałasia, u sumcy ŭ jaho było znojdziena 0,87 hrama marychuany. Paśla narkotyki znajšli i doma ŭ mužčyny. Sam Čudziancoŭ admaŭlaŭ, što rečyvy naležać jamu. Praz amal hod jaho prysudzili da piaci z pałovaj hadoŭ kałonii pa kryminalnaj spravie ab nabyćci i zachoŭvańni narkotykaŭ biez mety zbytu, zamachu na pieramiaščeńnie narkotykaŭ praź miažu i zachoŭvańni z metaj raspaŭsiudžvańnia i raspaŭsiudzie zaviedama niepaŭnaletniamu parnahrafičnaha materyjała praź internet.

U kastryčniku 2024 hoda stała viadoma pra vyzvaleńnie Čudziancova. Niezadoŭha da hetaha Raman Pratasievič paabiacaŭ apublikavać vialikaje intervju z «realnym stvaralnikam Nexta», adnak u vyniku «vykryvalny» materyjał tak i nie źjaviŭsia.

— Jon nie tak daŭno vyzvaliŭsia. I była dziŭnaja zajava, nibyta jon choča «vyrašyć pytańnie z Nexta». Ci vyrašyŭ jon niešta?

— Nie, mnie na hety kont ničoha nie viadoma. Heta treba spytać u tych, chto pra heta pisaŭ. Jakim čynam vyrašyć pytańnie? Čamu jany mnie nie paviedamili, kab ja moh niejak abaranicca ad vyrašeńnia pytańnia? Niejki nakid byŭ.

— Ale jon nie vychodziŭ z vami na suviaź?

— Nie. Ja ciapier naohuł nie viedaju, dzie jon znachodzicca i čym zajmajecca. 

• 18
• 2
• 0
• 5
• 0
• 1
• 0
• 0