«Kali hramadstvy rychtujuć da vialikaj vajny, to ekspłuatujuć i bojaź jaje»

Napeŭna, kožny, chto bolš-mienš sočyć za navinami, źviarnuŭ uvahu, nakolki časta Donald Tramp paŭtaraje frazu, pra toje, što kali b jon byŭ prezidentam u tyja časy, jak Pucin napadaŭ na Ukrainu, to hetaja vajna nikoli nie pačałasia b.

U litaralna lubym jahonym vystupleńni, datyčnym Rasii i Ukrainy, hety tezis tak ci inakš hučyć, prytym časta ŭ zusim rytualnaj formie: dzie pavodle łohiki i zdarovaha sensu patrabujecca skazać prosta «vajna», Tramp abaviazkova skaža «vajna, jakaja b nikoli nie pačałasia, kali b ja byŭ prezidentam».

Ekanomija dziaržaŭnych vydatkaŭ — heta lubimy kaniok 47-ha prezidenta ZŠA, ale voś pra ekanomiju słoŭ havorka, naadvarot, nie idzie. Prytym hrašyć častym paŭtareńniem hetaha vykazvańnia nie tolki sam Tramp, ale i jahonaje atačeńnie — jaho možna znajści navat u aficyjnych zajavach pres-słužby.

I heta nie vypadkova ŭsio, viadoma, a metanakiravana robicca, u miežach farmavańnia aŭtarytarnaha režymu na čale z łapidarnym hienijem.

Łapidarnuju hienijalnaść pravadyra hetaja fraza maje akurat i padkreślivać, a pastajannaje jaje paŭtareńnie da miesca i nie da miesca skiravanaje na toje, kab ludzi da hetaha tezisu pryvykali i pačynali ŭsprymać jak nieabvieržnuju aksijomu, jakaja jak takaja apryjory nie patrabuje nijakich dokazaŭ.

Bo nasamreč ža ni dakazać, ni abvierhnuć hetaje vykazvańnie absalutna niemahčyma, jano moža być tolki pradmietam viery, i nie bolš taho. Nu voś jaho śviadoma i robiać nie tolki pradmietam viery, ale i jaje simvałam.

Paradaksalna, ale kali hramadstvy rychtujuć da vialikaj vajny, to siarod inšaha zvyčajna ekspłuatujuć i bojaź jaje. Adno druhomu nie nadta supiarečyć.

A Tramp da vialikaj vajny hramadstva biezumoŭna rychtuje. Jahonyja mała radziejšyja ŭ paraŭnańni z vyšejnazvanym, pastajannyja i paśladoŭnyja vykazvańni pra žadańnie vałodać Hrenłandyjaj, Kanadaj i inšymi terytoryjami pryvučajuć nie tolki amierykancaŭ, ale i ŭvieś śviet da dumki, što heta nie fantastyka, a całkam sabie mahčymy ŭ ciapierašnim śviecie varyjant.

I kali chaj nie zaŭtra, a paślazaŭtra Tramp abjavić, što idzie brać Atavu za try dni, to bahata chto budzie heta padtrymlivać, bo ŭ hałovach užo zasiadzie tezis pra «51-šy štat». A raz tak, to što vy chacieli, jon ža nasamreč chacieŭ mirna vas dałučyć, a vy supraciŭlalisia, to što ž ciapier…

I ŭvohule heta ŭsio Bajden, i kab Tramp byŭ prezidentam u 2021-2024 hadach, to hetaja vajna nikoli nie pačałasia b. Nie zachacieli łapidarnaści tady — nu to atrymajcie ciapier voś heta vo ŭsio.

Płanavanaje nieŭzabavie pryznańnie z boku ZŠA zakonnaści rasijskaj anieksii Kryma zabje apošni ćvik u trunu staroha śvietu, jaki mnohim, kaniešnie, nie padabaŭsia, ale dazvoliŭ dabicca ŭnikalnaha dla suśvietnaj historyi stanu, kali prynamsi ŭ značnaj častcy śvietu cełaje pakaleńnie ludziej zmahło naradzicca, vyraści, sastareć i svajoj śmierciu spakojna pamierci, nie zaznaŭšy na ŭłasnaj skury, što takoje vajna.

Paśla realizacyi łapidarnaha mirnaha płana pracesy, padazraju, stanuć absalutna niezvarotnymi i nazad ničoha adkrucić užo budzie zusim nielha.

Zrešty, tut nie varta havaryć u budučym časie, bo ŭ novym śviecie my ŭžo apynulisia daŭno i viarnucca nazad niemahčyma. Prosta nie ŭsie heta pakul da kanca zrazumieli i ŭśviadomili.

Pakul ža jašče zbolšaha ŭsiudy mirnaje nieba nad hałavoj i bolš-mienš zvykły ład žyćcia — Treciaja suśvietnaja daŭno idzie ŭ hibrydnaj, ale pakul nie ŭ haračaj formie. Hladziš, kali Pucina ciapier ščodra pakormiać terytoryjami, źniaćciem sankcyj i «cudoŭnymi ździełkami», to i ŭ nieščaślivaj Ukrainie, jakaja volaj losu pryniała na siabie pieršy ŭdar, pacišeje na niejki čas.

Ale pierad źniščalnymi burami taksama zvyčajna byvaje zacišša.

• 9
• 2
• 0
• 0
• 4
• 5
• 1
• 0