Першыя «калючыя» агуркі, буякі па 120 рублёў і маладая бульба. Што і па колькі цяпер на Камароўцы?

Супрацоўнікі выдання Myfin.by праверылі, ці ёсць на Камароўскім рынку маладая бульба і па колькі, як змяніліся цэны на клубніцы і першую зеляніну і за колькі прадаюць першыя «пінскія» агурочкі.

Фота: Myfin.by

У суботу на галоўным рынку Мінска было шматлюдна. Прычыны дзве — па-першае, перад святам мінчукі актыўна закупляліся, і, па-другое, — візіту на Камароўку спрыяла цудоўнае, практычна летняе, надвор'е.

Яшчэ на падыходзе журналістаў традыцыйна сустрэлі бабулі, якія заўсёды ў гэтую пару прадаюць чарамшу. Цана ў іх аказалася такой жа, як і на гандлёвых радах — рубель-паўтара за пучок аднаго з першых вясновых зялёных вітамінаў.

Акрамя чарамшы, на прылаўках густа «вырасла» і іншая зеляніна, прывезеная з беларускіх цяпліц. Роскід цэнаў салідны — 100-грамовы пучок цыбулі можна купіць за 1,2 рубля.

Радыску прадаюць як на вагу (па 6-8 рублёў за кіло), так і традыцыйна пучкамі — па 4-6 рублёў.

Яшчэ адзін тавар, які не ўчора стаў сезонным у гэтую пару — клубніцы. Мяркуючы па цэнніках, прыбылі яны ў Беларусь з некалькіх краін. Ягады адрозніваецца знешнім выглядам і памерам, але кошт у большасці гандляроў прыкладна аднолькавы, 18-20 рублёў.

Цікава было зірнуць і на тое, колькі ж каштуе ў сярэдзіне красавіка бульба. За дробную просяць 2,5 рубля, за прыстойнага выгляду і памеру — па 3,5-4,5 рубля. Даражэй за многія яблыкі.

Знайшлася бульба і за 18 рублёў! Але гэта маладая, з цяпліцы ў Крупскім раёне.

Вельмі вялікі роскід цэнаў на памідоры. Зразумела, што іх мноства гатункаў, відаў і памераў, але часам за несамавітыя з выгляду таматы просяць па 10 рублёў, а за пунсовых буйных прыгажуноў — па 6.

Можна купіць памідоры і ў слоіках — як расказаў прадавец, па 25 рублёў за кіло.

Побач выбіваюцца з агульнага шэрагу цаной агуркі, — 20 рублёў за кіло, калі па рынку паўсюдна яны каштуюць 6-7 рублёў. «Дык гэта ж мае», — ёміста адказаў няўсмешлівы прадавец. Аказалася, што пухірыстыя прыгажунчыкі прыбылі ў сталіцу з пінскай цяпліцы. Для тых, каго не пужаючць іх калючуі, але палохае цэннік, у тым жа самым радзе ёсць «заспакаенне»: з выгляду агуркі такія ж (і на цэнніку «пінскія»), але таннейшыя на 5 рублёў.

Кусаецца і цана на буякі, якая даходзіць да 120 рублёў. Атрымалася знайсці, хай і толькі ў адным месцы, маліны — фасаваныя ў скрыначкі па 100 грам, за якія прасілі 10 рублёў.

Шмат на рынку розных відаў капусты, засталася яшчэ (у асноўным пераспелая) пітахая, радуюць вока іранскія кавуны (па 10 рублёў) і кітайскія дыні (па 17).

У бабулі, якая прадае розныя травы (ад 5 рублёў за шклянку), ёсць чага. І яе цана ўражвае — 10 рублёў за 100 грамаў. Нямала каштуе і карэнішча калгана — тыя ж 100 рублёў за кіло.

«Гэта груша ці фарэль?» — гулліва пытаецца ў прадавачкі за суседнім прылаўкам малады чалавек. Аказалася і тое, і другое: «Гэта сорт такі, вельмі сакавітая і салодкая», — не саромеецца ў рэкламе прадавачка.

Крыху наводдаль — прылавак з якаснай і дарагой садавіной. Велізарны іспанскі апельсін — 15 рублёў за кіло, мандарыны з ПАР — па 20 рублёў, залацісты ананас з Коста-Рыкі — па 40. Айва па 13,5 — з Азербайджана, італьянскае ківі — па 35 і 50 рублёў за кіло, важкія перуанскія авакада і манга — па 10 і 25 рублёў за штучку адпаведна.

Тут жа прапануюць гранатавы сок. У такую спякоту здаволіць смагу някепска, але кашалёк супраць, — 25 рублёў за 550 грамаў.

Побач велізарныя манга (разы ў 4 большыя па памерах за садавіну з сеткавай крамы) — па 45 рублёў за штуку.

Выклікала захапленне кемлівасць адной з прадавачак, якая горкай расклала на двух прылаўках пакеты з цыбульным шалупіннем — хадавым, як аказалася, таварам перад Вялікаднем. Меншы пакет — за рубель, большы — за два.

Але больш за ўсё здзівілі не цэны, а адна з бабуль-прадавачак. Размаўляючы з кліентамі, яна нейкімі дзіўнымі словамі называла цыбулю ды бульбу, — зусім не падобнымі на «лук» і «картошку»… Ды і цэны называла дзіўныя нейкія.

Аказалася, пакупнікі — пара кітайцаў. «А куды дзецца, іх усё больш, — вывучыла назвы ды лічбы», — патлумачыла жанчына.

Каментары да артыкула