Jak adreahavała biełaruskaje hramadstva i prapahandysty na svarku Trampa i Zialenskaha
Sustreča Uładzimira Zialenskaha z Donaldam Trampam i vice-prezidentam Džej Dzi Vensam u Biełym domie ŭ piatnicu pierarasła ŭ sprečku na pavyšanych tonach, što mnohich šakavała. «Naša Niva» sabrała reakcyi biełaruskaha hramadstva i prapahandy.
Palityk Pavieł Łatuška
Pavieł Łatuška vykazaŭ słovy padtrymki ŭkrainskamu narodu i Uładzimiru Zialenskamu.
«Prezidentu Ukrainy Uładzimiru Zialenskamu nie patrebna dapamoha prezidenta ZŠA Donalda Trampa, kab addać Rasii akupavanyja terytoryi Ukrainy, skaracić vojski, admovicca ad ustupleńnia ŭ NATA i denacyjanalizavać Ukrainu. Kali ŭ jaho było b žadańnie kapitulavać, to jon by pajechaŭ u Maskvu, a nie ŭ Vašynhton», — napisaŭ Pavieł Łatuška.
Palitołah Alaksandr Frydman
«Haračaja sprečka pamiž Zialenskim, Trampam i Vensam pakazała, što ŭ vašynhtonskim śviecie ździełak niama miesca honaru i čałaviečaj hodnaści, jakija adstojvaje Ukraina z samaha pačatku vajny. Zialenskamu treba addać naležnaje: ad svajoj pazicyi jon nie adstupaje navat u samych ciažkich situacyjach. Honar nie pradajecca», — napisaŭ palitołah Alaksandr Frydman.
Były dypłamat Valer Kavaleŭski
«Maja poŭnaja padtrymka prezidentu Ukrainy Zialenskamu. Jon prezident vajennaha času, jaki pradstaŭlaje i viadzie ŭkrainski narod u jaho baraćbie za isnavańnie svajoj nacyi. Jak i narod Ukrainy, jon zasłuhoŭvaje pavahi, u toj čas jak ZŠA majuć palityčnyja abaviazacielstvy i abaviazacielstvy ŭ halinie biaśpieki.
Usie vočy ciapier skiravanyja na Jeŭropu. My pavinny dapamahčy Ukrainie abaranicca i pieramahčy Rasiju», — napisaŭ były dypłamat Valer Kavaleŭski.
Komik Michaś Iljin
«Siońnia ŭ Biełym domie možna było pabačyć dyktatara. Zaŭtra taksama možna budzie. I paślazaŭtra», — napisaŭ komik Michaś Iljin.
Dypłamat Pavieł Śluńkin
«Urok, jaki zasvoili biełarusy za apošnija piać hadoŭ. Heta budzie karysna dla maich jeŭrapiejskich i amierykanskich siabroŭ, jakija ŭvieś čas pytajucca: «Dzie dno?!» Dna niama. Rychtujciesia — budzie tolki horš. I horš. I horš».
Biznesoviec i miecenat Pavieł Padkarytaŭ
«Krytyki Zialenskaha miarkujuć (albo robiać vyhlad, što miarkujuć), što ŭčora Zialenski abiraŭ pamiž miram i vajnoj dla Ukrainy. Heta zusim nie tak. Jon navat nie abiraŭ pamiž vajnoj i hańboj. Vajnu dla Ukrainy abraŭ Pucin jašče 11 hadoŭ tamu, kali Zialenski plasaŭ na scenie.
Zialenskamu ŭ Biełym domie ŭčora prapanavali tolki hańbu. U hetym i zaklučajecca płan Trampa, uzhodnieny z Pucinym — prymusić Zialenskaha pryniać hańbu kapitulacyi, — vykazaŭsia biznesmien i miecenat Pavieł Padkarytaŭ. —
Pravilna skazaŭ Cimaci Snajder: sens 2025 hoda vyznačajecca nie tym, što skaža Amieryka, a tym, što zrobić Jeŭropa».
Palitołah Roza Turarbiekava
«Vaša niesumnieŭnaja achviara, prava na abaronu svajoj krainy i svaich ludziej źjaŭlajucca biassprečnymi. Rasija napała na Ukrainu. Pucin źjaŭlajecca złačyncam suprać čałaviečnaści. Usich i kožnaha abdymaju. Svaich ukrainskich rodnych i siabroŭ!» — napisała Roza Turarbiekava.
Doktar Andrej Biełavieškin
«Majo ščyraje zachapleńnie i hłybokaja pavaha hodnaści i stojkaściu!» — napisaŭ doktar Biełavieškin pra Uładzimira Zialenskaha.
Byłaja staršynia Biełaruskaha Chielsinskaha kamiteta Taćciana Proćka
«Pahladzieła pieršuju (i jak vyśvietliłasia, apošniuju) častku pramoj publičnaj tranślacyi hutarki (?!) Zialenskaha, Trampa i Vensa. Takoha vidovišča nie toje, što nikoli nie bačyła, ale i ŭjavić sabie nie mahła. Nie ŭdajučysia ŭ źmiest skazanaha.
1. Zaŭsiody — vybary prajšli i što było ŭ pracesie vybaraŭ zabyta. I Tramp, i Vens uvieś čas uspaminali vielmi niadobrym słovam Bajdena. Mnie było nijakavata i časam soramna heta čuć.
2. Vens (jon, ujaŭlajecca, hałoŭnaja fihura!) z padtrymkaj Trampa sprabavaŭ emacyjna źniščyć Zialenskaha. Dva suprać adnaho! Z vykarystańniem, ja b skazała, zabaronienych pryjomaŭ typu «biez nas vy nie majecie nijakich kart na rukach». Heta było niesumlenna i ahidna.
3. Zialenski trymaŭsia. Ja ŭjaŭlała siabie na jaho miescy — źviedać prynižeńnie tvajoj krainy i [ciabie] asabista, niemahčymaść skazać navat nie ŭ abaronu, a pa sutnaści pytańnia. I adkaznaść za nastupstvy.
4. Nikoli z rašeńnia pytańniaŭ vajny i miru nie rabili šou.
Kudy kocicca śviet? Mnie vielmi strašna», — napisała jana.
Praŭładny telehram-kanał «Hrafač», źviazany ź ministram infarmacyi Maratam Markavym
«Tramp i ŭvieś mir pierakanaŭsia, chto nasamreč niedahavorazdolny i choča vajny. Žałasnyja sproby jeŭrapiejskich žoŭtych ŚMI ŭ svoj bok interpretavać padziei ŭ Biełym domie — zajmiejuć tolki zvarotny efiekt na jeŭraabyvaciela».
Prapahandyst Alaksiej Dziermant
«Chamstva Zialenskaha bolš dakładna afarmlaje raskoł pamiž ZŠA i ES. Jeŭrapiejskija lidary demanstratyŭna vykazvajuć padtrymku mienavita ŭkrainskamu boku. Pakul za Trampa tolki Orban, mahčyma, jašče Miełoni. Jeŭrapiejcy razumiejuć, što pieramirje na Ukrainie na ŭmovach Trampa — heta ich paraza, paraza prajekta jeŭrapiejskaj ekspansii na Uschod, jakaja niebiaśpiečna ŭdaram pa ŭsioj kanstrukcyi ES. Jany buduć sprabavać praciahvać vajnu. Ciapier vielmi vierahodna niebiaśpiečnaje abvastreńnie kanfliktu», — napisaŭ Alaksiej Dziermant.
Telehram-kanał «Biełorusskij siłovik»
Kamientary