Турэцкія заўзятары збіраюцца масава паказаць «воўчае вітанне» на матчы Турцыя — Нідэрланды
Футбольныя фанаты з Турцыі заклікалі заўзятараў, якія будуць у суботу на стадыёне ў Берліне падчас матчу Турцыя — Нідэрланды, паказаць так званае «воўчае вітанне», за якое дыскваліфікавалі героя паядынка абаронцу Мерыха Дэмірала, які вызначыўся дублем у гульні.
Гледачам прапануюць прадэманстраваць гэты жэст падчас выканання нацыянальнага гімна Турцыі, піша Bild.
«Цяпер увесь свет будзе глядзець прамую трансляцыю таго, як 50 тысяч чалавек робяць знак шэрага ваўка! І няхай яны паспрабуюць забараніць гэта!» — піша ў каментарах адзін з карыстальнікаў.
У мінулым матчы гулец зборнай Турцыі Мэрых Дэмірал адсвяткаваў забіты гол у вароты Аўстрыі, паказаўшы «воўчае вітанне». Гэты жэст выкарыстоўваюць турэцкія праваэкстрэмісты, якія прытрымліваюцца ідэалогіі расавай перавагі. Пасля гэтага інцыдэнту УЕФА адхіліла Дэмірала на два наступныя матчы.
Афіцыйна Анкара ніяк не асудзіла жэст футбаліста — наадварот, Міністэрства замежных спраў Турцыі назвала расследаванне УЕФА супраць Дэмірала непрымальным. Турэцкія ультрас, у сваю чаргу, заяўляюць, што «воўчае вітанне» — гэта «нацыянальны сімвал турэцкага народа», які не мае дачынення да расізму.
У Германіі за рухам Ülkücü, чальцы якога выкарыстоўваюць «воўчае вітанне», сочыць Упраўленне па абароне канстытуцыі. У Турцыі гэтае прывітанне выкарыстоўваецца, напрыклад, ультранацыяналістычнай «Партыяй нацыяналістычнага руху», якая лічыцца партнёрам урада Рэджэпа Эрдагана.
На фоне скандалу з Дэміралам прэзідэнт Турцыі аб'явіў пра свой візіт на чвэрцьфінал у Берлін у суботу.
Чвэрцфіналы стартуюць сёння матчамі Германія — Іспанія (19:00) і Францыя — Партугалія (22:00).
Цяпер чытаюць
Венесуэлка, якая працуе на БТ, распавяла, чаму яе сям'я думае, што яна ў Беларусі вельмі багатая. Прычыны вас здзівяць12
Каментары