23-гадовая беларуска выжыла ў жудасным ДТЗ, але цяпер не можа хадзіць. Яе гісторыя даказвае, што каханне існуе

Нарадзілася Іна ў Браславе. Пасля школы паехала скараць сталіцу — паступіла ў педагагічны ўніверсітэт. Планавала стаць дэфектолагам. Яна каталася на скейтбордзе і каньках, вандравала і шмат пасміхалася…

Было і каханне: маладая дзяўчына падпрацоўвала ў рэстаране барменшай і там пазнаёмілася са сваім будучым хлопцам Кірылам, які быў афіцыянтам. Але ўсё раптам змянілася ў маі 2023 года — Іна была якраз на апошнім курсе ўніверсітэта.

Павялічыць

Разам з сям'ёй дзяўчына паехала на свята — у яе дзядзькі быў дзень нараджэння. Але сесці за святочны стол ніхто з тых, хто быў у машыне, не змог. Адбылося жудаснае ДТЗ. Кіроўца фуры паварочваў налева і не прапусціў «Фіят» з сям'ёй Іны.

Іна сядзела на пасажырскім сядзенні і чамусьці не прышпілілася — хоць звычайна робіць гэта.

У адным з інтэрв'ю дзяўчына распавядала, што памятае трагедыю ўрыўкамі, бо не ўвесь час была ў прытомнасці.

— Добра захавалася ў памяці тое, як мяне прывезлі ў прыёмнае аддзяленне Браслаўскай цэнтральнай раённай бальніцы, як зашывалі раны на галаве, як вызвалялі ад адзення. Мне стала шкада, што разрэзалі маю новую прыгожую спадніцу.

Дзяўчына атрымала траўмы рознай ступені цяжкасці і лакацыі, але самай сур'ёзнай аказаўся пералом шыйных пазванкоў.

Павялічыць

У Браслаўскую бальніцу тэрмінова выклікалі нейрахірурга з Мінска, які прааперыраваў дзяўчыну. Усе тыя, хто быў у машыне разам з Інай, трапілі ў бальніцу ў розным стане. Калі Кірыл апынуўся ў звычайным аддзяленні і адносна хутка аднавіўся, то мама дзяўчыны загінула. У той жа аварыі загінуў і яшчэ адзін сваяк Іны.

У бальніцах дзяўчына правяла шмат часу, бо была паралізавана на 80%. Але на відэа таго перыяду Іна пасміхаецца. Кажа, галоўную ролю ў гэтым сыгралі сваякі і сябры, якія кожны дзень прыходзілі і дапамагалі не здавацца.

Кірыл таксама не кінуў каханую. У інтэрв'ю ён казаў:

— Калі ўсё здарылася, я таксама трапіў у бальніцу, але ў звычайнае аддзяленне. Іна ж знаходзілася 9 дзён у рэанімацыі. Я не бачыў яе і не ведаў, у якім яна стане. Дактары казалі: усё нармальна, стан стабільны. Але кожны разумее, што калі чалавек у рэанімацыі, то становішча не самае лепшае, — успамінае Кірыл. — Тады я проста чакаў і верыў у тое, што ўсё будзе добра. Ды і наогул: дзякуй Богу, што жывая.

Калі сказалі, што ў Іны зламаная шыя, мяне гэта не напалохала. Па-першае, у мяне стрыечны брат вось ужо 8 гадоў перасоўваецца ў інваліднай калясцы, таму я ўсё гэта ўжо бачыў і пражываў. Па-другое, Іна засталася той жа дзяўчынай, якую я пакахаў. У яе галаве і душы нічога ж не змянілася. Калі яна прыйшла ў прытомнасць, гэта мяне падбадзёрыла. Усё тая ж мая Іна, а пералом хрыбетніка — справа другасная.

Павялічыць

Тата Іны хацеў, каб дачка засталася ў родным Браславе — усё ж там сваякі побач. Але пара вырашыла вярнуцца да свайго звыклага жыцця ў Мінску. У Іны дрэнна варушацца пальцы, ёй давялося нанова вучыцца такім простым рэчам, як трымаць сталовыя прыборы і чысціць зубы.

Watch on TikTok

Дзяўчына паказвае ў тыктоку свае будні. Бачна, з якой пяшчотай Кірыл клапоціцца пра яе. Хлопец таксама суправаджае Іну падчас яе рэабілітацый у розных цэнтрах Беларусі і Расіі.

Дактары пакуль не даюць ніякіх прагнозаў: проста раяць кожны дзень выконваць фізічныя практыкаванні.

Часам Іна не можа ўстрымацца ад параўнання таго, якой яна была і якой стала. Напрыклад, выклала відэа свайго шпацыру ля плошчы Перамогі — кажа, што некалі лічыла, што ў яе «жудасная хада». Таму цяпер заклікае ўсіх любіць сябе і не шукаць недахопы.

Watch on TikTok

Дзяўчына жартуе са свайго становішча і робіць шмат іранічных ролікаў. Найбольш папулярнае яе відэа набрала 1,5 мільёна праглядаў — у ім Іна паказвае, як праходзіць яе дзень.

«Усе будуць пісаць: «Бедны хлопец, навошта яму гэта трэба», — ці сур'ёзна, ці жартуючы кажа яна ў роліку.

Большасць людзей у каментарах пішуць ёй словы падтрымкі і кажуць, што такая гісторыя прымушае паверыць у тое, што сапраўднае каханне існуе.

Павялічыць

• 18
• 0
• 0
• 0
• 0
• 14
• 0
• 11