Doktarka, jakaja pracavała ŭ škłoŭskaj kałonii na momant śmierci Ašurka, zvolniłasia adtul miesiac tamu

Natalla Dabradzieraviec była načalnicaj miedycynskaj čaści papraŭčaj ustanovy PK-17 u Škłovie — skandalna viadomaj biełaruskaj kałonii, dzie krychu bolš za dva hady tamu ŭ ŠIZA pry niavyśvietlenych abstavinach pamior palitviazień Vitold Ašurak.

Surazmoŭcy «Našaj Nivy» paćvierdzili fakt zvalnieńnia doktarki. Pa atrymanaj infarmacyi, jana zvolniłasia z PK-17 u mai hetaha hoda.

Na siońnia dakładna nieviadoma, dzie jana ciapier pracuje.

Adnak jaje muž Siarhiej Karčeŭski, jaki pa słovach byłych palitźniavolennych zaŭvažany ŭ hvałcie nad inšymi palitviaźniami i moža mieć dačynieńnie da śmierci Ašurka, usie jašče słužyć u škłoŭskaj kałonii ŭ jakaści načalnika režymnaj čaści.

Pavialičyć

Nahadajem, raniej «Aljans rasśledavalnikaŭ Biełarusi» apublikavaŭ zapis telefonnaj razmovy Natalli Dabradzieraviec z pałkoŭnikam milicyi Alaksandram Kazłovym ad 2021 hoda, u jakim tahačasnaja načmied škłoŭskaj kałonii ŭ panicy molić pałkoŭnika Kazłova pieravieści jaje razam z mužam na inšaje miesca słužby (zychodziačy z kantekstu razmovy, žančyna prosić pryniać jaje ŭ Departamient finansaŭ i tyłu MUS Biełarusi na pasadu načalnicy miedycynskaha adździeła).

U jakaści asnoŭnaj pryčyny svajho žadańnia pieravieścisia sa Škłova Natalla Dabradzieraviec nazyvaje «sapraŭdnuju niedarečnaść, jakaja adbyłasia z hetym palitviaźniem», majučy na ŭvazie śmierć Vitolda Ašurka. 

«Situacyja stanovicca nastolki składanaj, što nam ź Siarhiejem, chutčej za ŭsio, daviadziecca zvolnicca. Pa sutnaści, adbyłasia sapraŭdnaja niedarečnaść, adnak hetaja situacyja moža pahražać mnie poŭnym p***com, kali ja zastanusia. Dyj nie fakt, što mianie adpuściać, Škłoŭ — taki abjekt, što chren adpuściać. U nas jakraz idzie pravierka pa hetym palitviaźni, i ja vielmi spadziajusia, što ŭsio ŭ vyniku atrymajecca zahładzić», — kaža Natalla Dabradzieraviec svajmu znajomamu pałkoŭniku milicyi Alaksandru Kazłovu padčas telefonnaj razmovy.

Pry hetym, pavodle poŭnaha zapisu razmovy, tahačasnuju načalnicu miedčaści škłoŭskaj kałonii vielmi spužała nie vina za śmierć nievinavataha čałavieka, a toje, što jana razam ź Siarhiejem Karčeŭskim «padstaviła» načalnika PK-17, jaki ŭ adpłatu za heta moža «značna pahoršyć umovy ich isnavańnia».

Pavialičyć

Choć hetaja razmova adbyłasia ŭ 2021 hodzie, byłyja palitviaźni paviedamili «Našaj Nivie», što doktarka na pačatak 2023 hoda praciahvała pracavać u PK-17.

«Aljans rasśledavalnikaŭ Biełarusi» ŭ mai pisaŭ, što načmied zdoleła zvolnicca, ale, kali heta zdaryłasia, nie paviedamlaŭ.

***

Palitviaźniaŭ utrymlivajuć va ŭmovach, roŭnych katavańniu. Na Akreścina ŭ kamierach, raźličanych na šaściarych, znachodzicca pa 25 čałaviek. U kałonijach palitviaźniaŭ biespadstaŭna źmiaščajuć u ŠIZA, źbivajuć, pazbaŭlajuć pieradač, źniščajuć vychodnuju i ŭvachodnuju karespandencyju, pryznajuć schilnymi da ekstremizmu. Majuć miesca ździeki pa nacyjanalnaj prykmiecie: biełaruskamoŭnych viaźniaŭ prymušajuć razmaŭlać i pierapisvacca pa-rusku. Suviazi ź niekatorymi viaźniami niama miesiacami.

Masavyja palityčnyja represii ŭ Biełarusi praciahvajucca z 2020 hoda, kali Alaksandr Łukašenka, miarkujučy pa źviestkach z učastkaŭ, dzie vybarčyja kamisii dazvolili naziralnikam sačyć za padlikam hałasoŭ, prajhraŭ Śviatłanie Cichanoŭskaj, ale nie addaŭ uładu.

Z 2022 hoda, paśla napadu Rasii na Ukrainu, biełarusaŭ pačali pieraśledavać i za antyvajennyja vykazvańni abo simpatyi da Ukrainy.

Za hety čas u krainie adbyłosia nie mienš za 50 tysiač palityčna matyvavanych zatrymańniaŭ, zaviedziena nie mienš za 12 tysiač palityčna-kryminalnych spraŭ i adkinutyja bazavyja normy zakonnaści i marali. 

• 2
• 0
• 3
• 1
• 1
• 3
• 27
• 0