Čatyry krainy NATA nie vyklučyli adpraŭki svaich vojskaŭ va Ukrainu
Čatyry jeŭrapiejskija krainy nie vyklučyli mahčymaści adpraŭki vojskaŭ va Ukrainu, kamientujučy słovy francuzskaha prezidenta Emanuela Makrona pra toje, što krainy Jeŭrasajuza mohuć u najbližejšaj budučyni zrabić heta, piša The Moscow Times.
Čatyry krainy, pradstaŭniki jakich užo vykazalisia adnosna taho, što pry peŭnych umovach mohuć pajści na hety krok — Estonija, Litva, Niderłandy i Vialikabrytanija.
Premjer-ministarka Estonii Kaja Kałas zajaviła, što kraina razhladaje «ŭsie mahčymaści» biez vyklučeńnia, kab dapamahčy Ukrainie pieramahčy Pucina.
Litoŭskija čynoŭniki taksama razhladajuć mahčymaść adpraŭki litoŭskich vajskoŭcaŭ va Ukrainu dla navučańnia vojskaŭ krainy, zajaviŭ daradca prezidenta Litvy Kiastucis Budrys. Jon adznačyŭ, adnak, što padtrymka ŭ vyhladzie zbroi i bojeprypasaŭ pakul zastajecca hałoŭnym pryjarytetam.
«My havorym pra takuju mahčymaść i robim heta całkam adkryta. Jość šmat niuansaŭ adnosna taho, jak heta moža adbycca i pry jakich umovach, — zajaviŭ jon. — Bojeprypasy — heta hałoŭny instrumient, jaki patrebny siońnia i jaki byŭ patrebny ŭčora, ale ŭsio ŭžo na stale».
Niderłandy nie ličać niemahčymaj adpraŭku sałdat va Ukrainu, ale dla hetaha «pakul nie čas», zajaviŭ hienierał Ona Ejchielschajm, kiraŭnik abarony Niderłandaŭ. «Ja dumaju, varta pakinuć usie varyjanty adkrytymi», — skazaŭ jon, dadaŭšy, što pakul Niderłandy nichto nie prasiŭ pra takuju dapamohu i hetaje pytańnie nie staić na paradku dnia.
U Vialikabrytanii niama płanaŭ bujnamaštabnaha raźmiaščeńnia vojskaŭ va Ukrainie, zajaviŭ pradstaŭnik premjer-ministra krainy Ryšy Sunaka, ale ŭ krainie ŭžo znachodzicca nievialikaja kolkaść brytanskich vajskoŭcaŭ.
«Akramia nievialikaj kolkaści asabovaha składu, jaki ŭ nas jość u krainie i ŭžo padtrymlivaje Uzbrojenyja siły Ukrainy, u nas niama nijakich płanaŭ pa bujnamaštabnym razhortvańni», — zajaviŭ Sunak.
Napiaredadni brytanski ŭrad abvierh zajavu fiederalnaha kanclera Niamieččyny Ołafa Šolca ab tym, što brytanskija vajskoŭcy biaruć udzieł u zapuskach rakiet va Ukrainie. Łondan zajaviŭ, što zapusk kryłatych rakiet i praces vybaru celaŭ — sprava USU, a nie brytanskich vajskoŭcaŭ, jakija znachodziacca va Ukrainie.
Biełarus žyvie ŭ domie, jaki pabudavaŭ z sałomy, piasku i hliny. Pry hetym jon — adziny žychar vioski. Jak adčuvańni?7
Kamientary