Što budzie ź biełaruskimi sekandami paśla zabarony Jeŭrasajuza na ŭvoz adzieńnia? Spytali ŭ ich
Niadaŭna Jeŭrasajuz pryniaŭ novy pakiet sankcyj. Siarod ich — zabarona na pastaŭku ź ES adzieńnia, jakoje było va ŭžyvańni. Ci paŭpłyvaje heta na pracu kram z sekand-chendam?
Čytačka «Našaj Nivy» jak zaniepakojenaja pakupnica źviarnułasia ŭ niekalki biełaruskich sekand-chendaŭ.
U adnoj z najbujniejšych sietak, jakija handlujuć u Biełarusi sekand-chendam, — «Ekanom Sici» — zapeŭnili, što kramy praciahnuć pracavać u zvyčajnym režymie. Ciapier jakraz pastupaje vosieński asartymient. Prykładna taki ž adkaz dali ŭ inšaj bujnoj sietcy kram — «Moda Maks».
U «Happy Hand» supakoili, što ŭ ich ničoha nie źmienicca, novyja pastupleńni tavaru buduć, i paraili hladzieć hrafik zavozu ŭ ich sacyjalnych sietkach.
U «Barashek family» skazali, što vyjście jość zaŭsiody, a «zavozy, kaniešnie ž, buduć».
U «Best buy» adkazali, što nijak nie mohuć prakamientavać navinu pra sankcyi.
U «Dvuch janotach» byli strymanyja ŭ prahnozach. Skazali, što pakul novyja pastupleńni płanujucca, a što budzie dalej, pakaža čas.
Adkul voziać tavar bujnyja sietki sekand-chendaŭ? «Moda Maks» śćviardžaje, što adzieńnie z Anhlii. «Ekanom Sici» piša, što pradaje «adzieńnie i abutak ź Jeŭropy». Toje samaje ŭ sietki «Miehachend».
Sietka staličnych sekandaŭ «Adzieńnie» śćviardžaje na sajcie: «Našy pastaŭščyki — heta najbujniejšyja fabryki pa pierapracoŭcy adzieńnia, sabranaha ŭ samych zamožnych krainach Jeŭropy — Niderłandach, Niamieččynie, Vialikabrytanii, Italii».
Partał Office Life, spasyłajučysia na svaje krynicy ŭ rytejle, piša, što
ŭvieś tavar sekand-chend, jaki siońnia ŭvoziać u Biełaruś, niezaležna ad krainy pachodžańnia idzie praź Jeŭrasajuz. Da 1 kastryčnika jon jašče budzie pastupać, bo jość pierachodny pieryjad i zachoŭvajucca raniej padpisanyja kantrakty. Što budzie dalej — nieviadoma. Ułaśniki biznesu buduć imknucca zachavać biznes, adnak hatovych stratehij na hety kont pakul niama.
Pavodle ekśpiertnych acenak, dola tavaraŭ sekand-chend u ahulnym abjomie spažyvańnia adzieńnia składaje kala 35%, piša BiełTA. U roźnicu ich pradavali kala 2,8 tys. handlovych abjektaŭ, u tym liku internet-kramy. Biełstat paličyŭ, što kožny hod u Biełaruś uvozicca sekandu na sumu kala $60—80 młn.
Ciapier čytajuć
«U takuju ž haleču, dy jašče i chałodnuju, pakistancy nie pajeduć». Biełarus piać tydniaŭ pravioŭ u Pakistanie — voś što jaho ŭraziła27
Kamientary