«Zaleź nazad u svaju skrynku». Cpiecpradstaŭnik Trampa pa Ukrainie pastaviŭ na miesca kramloŭskaha miljardera Małafiejeva

Kanstancin Małafiejeŭ, rasijski pravasłaŭny aliharch, jaki znachodzicca pad sankcyjami Zachadu, zajaviŭ u intervju vydańniu Financial Times, što prezident Rasii Uładzimir Pucin z vysokaj vierahodnaściu adchilić mirny płan, prapanavany adstaŭnym amierykanskim hienierałam Kitam Kiełaham, jakoha niadaŭna Donald Tramp pryznačyŭ svaim śpiecpasłańnikam pa ŭrehulavańni kanfliktu va Ukrainie.

«Tramp zmoža zaviaršyć kanflikt va Ukrainie tolki ŭ vypadku, kali ZŠA admoviacca ad vykarystańnia sučasnaj dalnabojnaj zbroi, adchilać ukrainskaha prezidenta Uładzimira Zialenskaha ad ułady, a taksama arhanizujuć sustreču z Pucinym dla abmierkavańnia hłabalnaha paradku na samym vysokim uzroŭni, — zajaviŭ Małafiejeŭ, —

Tamu kali Kiełah pryjedzie ŭ Maskvu sa svaim płanam biez vyšejpieraličanych punktaŭ, my prymajem jaho i kažam jamu iści lesam, tamu što jon nam nie padabajecca. Na hetym pieramovy skončacca.

A kali ZŠA nie admoviacca ad padtrymki Ukrainy, Rasija moža vykarystać taktyčnuju jadziernuju zbroju. Budzie zona radyjacyi, kudy nichto nie stupić ciaham usiaho našaha žyćcia», — pryhraziŭ Małafiejeŭ u intervju vydańniu Financial Times, jakoje vyjšła 2 śniežnia.

Reakcyja Kita Kiełaha na słovy Małafiejeva nie prymusiła sabie doŭha čakać. U hety ž dzień śpiecpasłańnik Trampa padzialiŭsia ŭ tvitary frahmientam svajho vystupu ŭ efiry amierykanskaha telekanału Fox News, u jakim rezka adkazaŭ Małafiejevu.

«Jamu [Małafiejevu] lepš by zrazumieć, chto taki Donald Tramp, bo niedaaceńvać jaho — heta vialikaja pamyłka. Heta nie bačańnie Kita Kiełaha. My havorym pra bačańnie Złučanych Štataŭ i prezidenta Trampa. I jon spravicca z hetym [urehulavańniem vajny va Ukrainie], jak jon zaŭsiody z hetym spraŭlaŭsia.

Tamu moj adkaz jamu taki: zaleź nazad u svaju skrynku i lepš zrazumiej prezidenta Trampa, bo, vidavočna, ty jaho nie razumieješ, i, napeŭna, ty zusim nie razumieješ ZŠA», — adkazaŭ śpiecpasłańnik Trampa Kit Kiełah.

Thanks @SandraSmithFox @AmericaRpts for having me on today. Sandra always gets to the heart of an issue as she did at the close-underestimate President-elect Trump at your peril and never underestimate the United states of America. pic.twitter.com/oV7lJILpWs

— Keith Kellogg (@generalkellogg) December 2, 2024

Detali svajho mirnaha płanu Kiełah raniej vykłaŭ u svaim artykule dla America First Policy Institute u krasaviku hetaha hoda. Na pieršym etapie ŭrehulavańnia miarkujecca zamarozka linii frontu, spynieńnie ahniu i ŭviadzieńnie demilitaryzavanaj zony. Paśla čaho baki siaduć za stoł pieramovaŭ, a Rasija atrymaje abmiežavanaje źmiakčeńnie sankcyj. Poŭnaje źniaćcie mahčyma tolki paśla padpisańnia mirnaha pahadnieńnia, jakoje zadavolić Ukrainu.

Ukrainu nie buduć prasić admovicca ad akupavanych terytoryj, ale spatrebicca jaje zhoda na toje, što jana budzie damahacca viartańnia stračanych ziamiel «vyklučna dypłamatyčnym šlacham». Pry hetym Kiełah ličyć, što taki dypłamatyčny praryŭ, vierahodna, adbudziecca nie raniej, čym Uładzimir Pucin pakinie svaju pasadu.

Akramia taho, Kiełah prapanuje Ukrainie na niavyznačany termin admovicca ad ustupleńnia ŭ NATA ŭ abmien na «mirnaje pahadnieńnie z harantyjami biaśpieki». ZŠA pavinny zabiaśpiečyć Ukrainie mahčymaść «vieści pieramovy z pazicyi siły» i adnačasova danieści da Rasii infarmacyju pra nastupstvy nievykanańnia joju budučych umoŭ mirnaj damovy, havorycca ŭ dakumiencie.

Tak Vašynhton nibyta zmoža damahčysia dasiahnieńnia damoŭlenaści ab zakančeńni vajennych dziejańniaŭ na ŭmovach, jakija adpaviadajuć amierykanskim i ŭkrainskim intaresam.

• 19
• 1
• 4
• 2
• 1
• 0
• 1
• 1