Jeŭrapiejcy prapanavali svoj płan, chočuć, kab ZŠA da jaho dałučylisia. Ale hatovyja «rychtavacca da horšaha»
U adroźnieńnie ad isteryčnaj atmaśfiery ŭ Avalnym kabiniecie 28 lutaha, sustreča ŭ Łankaster-chausie ŭ Łondanie prajšła ŭ vyklučna strymanaj tanalnaści. Zialenski siadzieŭ u hałavie stała, razam sa Starmieram, Makronam i Tuskam. Francyja prapanavała Rasii ŭ jakaści pieršaha kroku zaklučyć pieramirje na miesiac.
Jeŭrapiejskija lidary 2 sakavika byli vyklučna strymanyja ŭ zajavach i imknulisia ničym nie spravakavać Donalda Trampa. Ale ich pasłańnie było adnaznačnym: Jeŭropa budzie abaraniać Ukrainu ŭsimi dastupnymi srodkami i zaklikaje Vašynhton zachavać adzinstva ŭ hetym pytańni. Kali nie, «važna padrychtavacca da horšaha», jak skazała Ursuła fon der Lajen — heta značyć, Jeŭropa budzie supraćstajać Rasii ŭ adzinočku.
Pa vynikach ahučana minimum detalaŭ, ale jany pakazalnyja.
Kir Starmier uziaŭ na siabie rolu pieramoŭnika miž jeŭrapiejcami i Vašynhtonam. Jon nastojvaŭ, što ZŠA zastajucca nadziejnym sajuźnikam i namiaknuŭ, što razmaŭlaŭ z Trampam pra svaje płany.
Paśla samita Starmier sfarmulavaŭ čatyry pryncypovyja pazicyi krain Jeŭropy, z Ukrainaj i Brytanijaj uklučna: dapamohu Ukrainie ŭzmacnić, Ukraina maje być za stałom pieramovaŭ, mir maje być takim, kab Rasija bolš nie mahła napaści, dapamahać Ukrainie budzie «kaalicyja achvotnych».
Starmier zajaviŭ, što Brytanija hatovaja zadziejničać suchaputnyja i pavietranyja vojski dla apieracyi va Ukrainie.
Dla akazańnia dapamohi budzie sfarmiravanaja «kaalicyja achvotnych» — heta dazvolić paźbiehnuć sabatažu z boku trajanskich koniej typu Vienhryi Orbana.
Ursuła fon der Lajen zajaviła, što Jeŭrasajuz budzie ŭzbrojvacca farsiravanymi tempami.
Tusk nazvaŭ padziei 28 lutaha ŭ Biełym domie «nieprystojnym vidoviščam» i zajaviŭ, što «Jeŭropa pračnułasia».
A francuzski prezident Emanuel Makron ahučyŭ prapanovu Rasii zaklučyć pieramirje na adzin miesiac. Płan maje na ŭvazie «pieramirje ŭ pavietry, na mory i na enierhietyčnaj infrastruktury».
Pra heta paviedamlaje Le Figaro.
Makron skazaŭ, što nie vieryć u pahadnieńnie ab spynieńni ahniu, jakoje zaklučać miž saboj amierykancy j rasijanie. Jon pierakanany, što Uładzimir Pucin pierš za ŭsio budzie sprabavać pazbavić Ukrainu suvierenitetu, u pryvatnaści šlacham jaje demilitaryzacyi, piša vydańnie.
Jeŭrapiejcy prapanujuć svoj varyjant pieramirja, pry jakim možna kantralavać vykanańnie ŭmoŭ.
«Treba razumieć, što front siońnia — heta ekvivalent linii Paryž-Budapiešt [pa praciahłaści]. U vypadku ŭsieahulnaha spynieńnia ahniu było b vielmi składana pravieryć, ci vykonvajecca pieramirje pa ŭsioj linii frontu», — patłumačyŭ Makron. U toj ža čas vykanańnie pieramirja, prapanavanaha jeŭrapiejcami, było b lohka prakantralavać.
Premjer-ministr Vialikabrytanii Kir Starmier na pres-kanfierencyi pa vynikach samitu jeŭrapiejskich lidaraŭ pa Ukrainie ŭ Łondanie zajaviŭ, što Vialikabrytanija vydzielić Ukrainie 1,6 miljarda funtaŭ (1,94 miljarda jeŭra), kab zakupić bolš za piać tysiač rakiet supraćpavietranaj abarony. Jany buduć vyrablenyja ŭ Biełfaście (Paŭnočnaja Irłandyja), pieradaje The Guardian.
«Heta budzie mieć žyćciova važnaje značeńnie dla abarony krytyčna važnaj infrastruktury ciapier i ŭmacuje Ukrainu ŭ zabieśpiačeńni miru, kali jon nastupić, tamu što my pavinny vučycca na pamyłkach minułaha. My nie možam pahadzicca na takija słabyja pahadnieńni, jak minskija, jakija Rasija moža ź lohkaściu parušyć», — skazaŭ jon.
Starmiera spytali, ci moža jon vyklučyć kanflikt pamiž Vialikabrytanijaj i Rasijaj.
«Ja nie chaču kanfliktu va Ukrainie, u Jeŭropie i, viadoma, u Złučanym Karaleŭstvie. Ja chaču stabilnaści ŭ Złučanym Karaleŭstvie.
Kab zabiaśpiečyć hetuju stabilnaść, treba być upeŭnienymi, što my zmožam abaranić pahadnieńnie va Ukrainie, tamu što naša historyja vučyć nas tamu, što kali ŭ Jeŭropie ŭźniknie kanflikt, jon dakacicca i da našych bierahoŭ», — adkazaŭ brytanski premjer.
Jon nie pahadziŭsia, što ZŠA zaraz «nienadziejny sajuźnik». «Jany byli nadziejnym sajuźnikam na praciahu mnohich dziesiacihodździaŭ i praciahvajuć im zastavacca».
Adkazvajučy na pytańnie pra reakcyju ZŠA na toje, što jon prapanuje, Starmier namiaknuŭ, što jon abmiarkoŭvaŭ heta z Trampam padčas ich učorašniaj telefonnaj razmovy.
Starmier adznačyŭ, što na samicie ŭ Łondanie ŭzhadnili čatyry važnyja kroki:
Praciahvać akazvać Ukrainie vajennuju dapamohu, pakul idzie vajna, i ŭzmacnić ekanamičny cisk na Rasiju.
Luby tryvały mir pavinien zabiaśpiečyć suvierenitet i biaśpieku Ukrainy, i Ukraina pavinna być za stałom pieramoŭ.
U vypadku zaklučeńnia mirnaha pahadnieńnia jeŭrapiejskija lidary buduć imknucca praduchilić luboje ŭvarvańnie Rasii va Ukrainu ŭ budučyni.
Budzie stvorana «kaalicyja achvotnych» dla abarony Ukrainy i zabieśpiačeńnia miru ŭ krainie.
Kiraŭnica Jeŭrakamisii Ursuła fon der Lajen zajaviła, što ciapier vielmi važna pavialičyć vydatki na abaronu.
«Važna padrychtavacca da horšaha».
Finalnym akordam stała sustreča Uładzimira Zialenskaha z karalom Karłam III. Jana prajšła vyklučna pavažliva, nichto prezidenta Ukrainy nie buliŭ za vajskovy dres-kod.
Ciapier čytajuć
«U takuju ž haleču, dy jašče i chałodnuju, pakistancy nie pajeduć». Biełarus piać tydniaŭ pravioŭ u Pakistanie — voś što jaho ŭraziła33
Kamientary
Budzie stvorana «kaalicyja achvotnych» dla abarony Ukrainy
Za tri hoda nie sozdali a tut. Chotia dobrovolnych .. V summie ničieho nie riešili ni k čiemu nie prišli. Poobnimali Zielenskoho, rassłabiliś. Čto i triebovałoś ožidať.