Navukoŭcy stvaryli «šarścistuju myš» z prykmietami mamanta. Mahčyma, praź niekalki hadoŭ adrodziać i vymierłaha hihanta
Kampanija, jakaja zajmajecca adradžeńniem źnikłych vidaŭ, pradstaviła hienietyčna madyfikavanych «šarścistych myšej», što, pavodle jaje pradstaŭnikoŭ, źjaŭlajecca važnym etapam na šlachu da viartańnia mamantaŭ.
Jak piša CNN, amierykanski startap Colossal Biosciences zajaŭlaje, što atrymanyja ŭ łabaratoryi z dapamohaj hiennaj inžynieryi puchnatyja hryzuny demanstrujuć rysy, padobnyja da tych, što dapamahali staražytnym prodkam słanoŭ supraćstajać choładu.
Zhodna ź infarmacyjaj Colossal Biosciences, u madyfikavanaj myšy źjavilisia charakternyja prykmiety šarścistaha mamanta: kučaravyja vusy, vałasataja, śvietłaja poŭść, jakaja vyrastaje ŭ try razy daŭžejšaj, čym u zvyčajnych łabaratornych myšej.
Colossal Biosciences — pryvatnaja kampanija z Dałasa (ZŠA), jakaja pracuje nad uznaŭleńniem mamantaŭ i inšych źnikłych vidaŭ. Jana śćviardžaje, što šarścistaja myš dazvolić pravieryć hipotezy pra toje, jak peŭnyja ŭčastki DNK upłyvajuć na fizičnyja charaktarystyki, jakija dapamahli mamantam, što vymierli kala 4000 hadoŭ tamu, adaptavacca da chałodnaha klimatu.
Vučonyja Colossal vyznačyli 10 hienietyčnych adroźnieńniaŭ pamiž mamantami i ich najbližejšymi sučasnymi svajakami — azijackimi słanami. Zatym jany znajšli padobnyja hieny ŭ łabaratornych myšej i źmianili ich, kab upłyvać na koler, daŭžyniu, taŭščyniu i strukturu šerści, uzrovień tłuščavych zapasaŭ u arhaniźmie.
U vyniku vučonyja adnačasova ŭnieśli vosiem hienietyčnych źmien u siem hienaŭ myšej, vykarystoŭvajučy pieradavyja technałohii redahavańnia DNK. Pra svajo dasiahnieńnie startap paviedamiŭ u papiarednim navukovym dakładzie, jaki pakul nie prajšoŭ recenzavańnie.
Niekatoryja ekśpierty ličać, što ekśpierymient uražvaje z techničnaha punktu hledžańnia, ale pakul nie dakazvaje, što źmienienyja myšy vałodajuć choładaŭstojlivaściu, jak mamanty. Inšyja padkreślivajuć, što chacia redahavańnie hienaŭ u myšej — važny krok, pieranieści hetyja viedy na słanoŭ našmat składaniej, bo pakul dakładna nieviadoma, jakija mienavita ŭčastki hienomu źjaŭlajucca krytyčna važnymi dla nabyćcia słanami charaktarystyk, nieabchodnych dla žyćcia za Palarnym kruham.
Kampanija Colossal Biosciences była zasnavana ŭ 2021 hodzie i ŭžo sabrała $435 miljonaŭ na prajekty pa adradžeńni mamantaŭ, ptuški doda i tasmanskaha tyhra.
Jaje padychod zasnavany na redahavańni hienaŭ bližejšych žyvych svajakoŭ vymierłych vidaŭ, kab stvaryć hibrydnych žyvioł, maksimalna padobnych da źnikłych. Colossal zajaŭlaŭ, što płanuje pradstavić pieršaje mamanciania ŭ 2028 hodzie.
Biełarus žyvie ŭ domie, jaki pabudavaŭ z sałomy, piasku i hliny. Pry hetym jon — adziny žychar vioski. Jak adčuvańni?7
Kamientary