Budavali biznes 11 hadoŭ, ale ŭsio zhareła: jak siamja ŭ Baranavičach padymaje z ruin spravu žyćcia
Pra bujny pažar u Baranavičach da hetaha času havorać u horadzie. Hareli cechi viadomaj miascovaj firmy «SonMarkiet». Za suchoj zvodkaj navin — vialikaja biada adnoj siamji, jakaja šmat hadoŭ budavała hety biznes. Ahoń źniščyŭ niekalki karpusoŭ z abstalavańniem i materyjałami. Ciapier Alaksandru i Śviatłanie Viktarovičam daviadziecca šmat što pačynać nanova. Ale jany nie apuskajuć ruki i dziakujuć nieabyjakavym biełarusam za dapamohu. Hetaja historyja pra toje, jak usie zhurtavalisia, kab padtrymać siamiejny biznes u bujnym rajcentry, piša «Točka».
Pažar tušyli niekalki hadzin
Ciapier na miescy niadaŭna adramantavanych karpusoŭ stajać tolki čornyja ścieny. Niešta ŭžo razabrali, častka pamiaškańniaŭ pojdzie pad znos. Budzie jašče ekśpiertyza, kab acanić acalełaje. Zatym užo buduć prystupać da budoŭli. Usio pa novaj.
Hetyja budynki byli va ŭłasnaści siamji Viktarovičaŭ — kupili try hady tamu na aŭkcyjonie za niemałuju canu. Bolš za hiektar ziamli, maštabny ramont — u płanach było stvaryć sučasnuju vytvorčaść paścielnaj bializny. Zastavałasia niašmat, tolki darabić fasady, kab zdać usio ŭ ekspłuatacyju i zastrachavać biznes.
U adnym z karpusoŭ 8 krasavika źnianacku pačaŭsia pažar.
Tušienije požara v proizvodstviennom zdanii OAO "SonMarkiet" v horodie Baranoviči. Vidieo: MČS Biełaruś pic.twitter.com/vIacpuRSmI
Nichto, na ščaście, nie paciarpieŭ. Ale straty surjoznyja.
«Ničoha nie zastałosia. Jakraz tolki zakupili vializnuju partyju syraviny, materyjałaŭ, elitnych tkanin», — uzdychaje Andrej Ćviatkoŭ, jon pracuje dyrektaram na hetym pradpryjemstvie.
Unutry čatyroch acalełych ścien staić vializnaje abstalavańnie, jakoje pieražyło pažar. Rabotniki havorać, što jaho navat realna adnavić.
«Savieckaja mašyna, mocnaja. Elektronika pahareła ŭsia, ale kanstrukcyja cełaja, jašče budzie pracavać», — aceńvaje straty Andrej.
Samaje darahoje abstalavańnie, jakoje vykarystoŭvajecca ŭ vytvorčaści koŭdraŭ, acaleła. Kali susiedni budynak hareŭ, rabotniki sami pastaralisia ŭsio maksimalna adsiul vynieści.
Pačynałasia ŭsio z adnoj mašynki
Śviatłana paznajomiłasia z Alaksandram Viktarovičam 11 hadoŭ tamu. Tady ŭ mužčyny ŭžo byŭ nievialiki biznes pa pašyvie paścielnaj bializny.
«Usio pačynałasia litaralna z pary rułonaŭ tkaniny i adnoj staroj šviejnaj mašynki za $100», — uspaminaje Alaksandr.
Mužčyna amal usio rabiŭ sam: jeździŭ kuplać tkaninu ŭ Rasiju, niašmat, paru rułonaŭ. Ich adšyvali, hatovyja kamplekty jon sam pradavaŭ na rynkach.
Hetuju spravu jon abraŭ nievypadkova: baćki taksama šyli, tolki zajmalisia kašulami. I jeździli ich pradavać u Polšču — było vyhadna.
Čas išoŭ, biznes raźvivaŭsia, pastupova pierajšli na opt. A paru hadoŭ tamu stali dumać i nad roźnicaj — chacieli, kab brend byŭ viadomy.
«Pieršuju kramu adkryli ŭ Baranavičach. Brali kredyt, zapuścilisia. Ciapier u nas 13 kram. U płanach u kožnym rehijonie źjavicca. Praŭda, ciapier krychu daviadziecca z hetym pačakać», — kaža Saša.
Pakul usio hareła, pajechaŭ u carkvu
Vytvorčaści doŭha byli raskidany pa roznych łakacyjach i navat haradach. Mara Alaksandra — usio heta sabrać u adnym miescy — kab i cechi, i składy, i ofis byli na adnoj vialikaj terytoryi. Da hetaha jon išoŭ niekalki hod.
I voś try hady tamu hetyja płany ŭvasobilisia, kali muž i žonka kupili pustyja budynki.
«Całkam usio madernizavali. U nas byŭ kruty dyzajn-prajekt, usio heta pavinna było vyhladać vielmi pryhoža. My chacieli, kab ludziam było kamfortna pracavać, dušu ŭkłali», — kaža Śviatłana Viktarovič.
Pastupova pieravieźli ŭsie linii. Što važna: prajšli ŭsie pravierki, u tym liku i pa pažarnaj biaśpiecy.
«Usio było novaje – i pravodka, i pažarnaja sihnalizacyja, i kacielnia novaja. Usio było dobra. Čakali nadvorja, kab darabić fasady i zdać u ekspłuatacyju, kab usio zastrachavać», — raspaviadaje Andrej Ćviatkoŭ.
Ab samym pažary ŭładalniki biznesu daviedalisia ranicaj. Alaksandr adrazu sieŭ u mašynu, ale pajechaŭ nie na pradpryjemstva, a ŭ carkvu.
«Pažar bačyŭsia zdalok. Było zrazumieła, što ŭsio surjozna. Ale mnie treba było ŭ carkvu. Ja maliŭ Boha, kab nichto nie paciarpieŭ. Kab daŭ nam sił pieražyć heta ŭsio biez usialakich «čamu?», a z pytańniem «dla čaho nam heta?» — kaža Alaksandr.
Darečy, pažar — heta nie pieršaje niaščaście ŭ biznesie Sašy i Śviety. Kali vytvorčaść raźmiaščałasia na cokalnym paviersie, zdaryŭsia surjozny patop.
«Nad nami była łaźnia. Usio zatapiła kipieniem, pa hrudzi vady było. Škodu nam nichto nie kampiensavaŭ. Mašynki adnavili, tkaninu vysušyli. Niejak pryjšli ŭ siabie. I voś tak z kožnaj niaŭdačaj šukali ŭžo niejkija novyja płoščy, nie ŭ cokali, a na pieršym paviersie», — kaža Śviatłana.
Sotni nieabyjakavych ludziej
Za razmovaj zdaloku naziraje Tajsan — kot-śpinalnik, jaki staŭ dušoj kalektyvu i zorkaj TikTok (u jaho 30 tys. padpisčykaŭ).
Tajsan chutka pierasoŭvajecca na łapach u admysłovym miašočku — jaho harderob taksama adšyvali tut. U jaho jość svaja pasada — «namieśnik dyrektara».
«My jaho znajšli kacianiom ź pierabitym chrybietnikam. Ź pieršaha razu nie zmahli złavić, vielmi pieražyvali, šukali. A jon potym sam zabraŭsia pad našu mašynu — z usich abraŭ nas. Z tych časoŭ užo čatyry hady žyvie z nami», — kaža Śviatłana.
Naohuł jana i jaje muž nikoli nie prachodzili mima biazdomnych žyvioł.
U karanavirus ich pradpryjemstva pa načach adšyvała valiki dla balnic — pa ŭsioj krainie ich razdavali. Dapamahali chvorym dzieciam, udzielničali ŭ zborach. I vierać, što zaraz da ich viartajecca heta zroblenaje dabro ŭ vyhladzie chvali padtrymki.
«U nas prosta ślozy na vačach. Kali my raskazali ab pažary, ludzi kinulisia skuplać našu pradukcyju. Padtrymaŭ i miascovy biznes: niechta pryvoziŭ nam abiedy, pakul my raźbirali pažaryšča, niechta prapanavaŭ vokny i dźviery nam u rasterminoŭku, adrazu», — havorać Saša i Śvieta.
Padklučylisia i sami rabotniki pradpryjemstva: usie ad buchhałtara da švačak taksama raźbirali nastupstvy pažaru.
«Tut ža ŭsio heta budavali sami, stolki sił ukłali. Dla ŭsioj kamandy heta było vialikaje hora. Sieli, pahavaryli: maŭlaŭ, što rabić budziem. A potym usie ŭzialisia za rydloŭki i kalaski i pajšli razhrabać usio. Vyrašyli, što nie budziem apuskać ruki», — kaža Saša.
Pakul pryčyny pažaru nie nazyvajucca — idzie śledstva. U płanach — adnavić usie paškodžanyja cechi, viarnucca da vytvorčaści. Padtrymać siamiejny biznes vy možacie, nabyvajučy jaho pradukcyju.
Ciapier čytajuć
«U takuju ž haleču, dy jašče i chałodnuju, pakistancy nie pajeduć». Biełarus piać tydniaŭ pravioŭ u Pakistanie — voś što jaho ŭraziła33
Kamientary