Dzie ciapier pracuje byłaja favarytka Łukašenki Maryja Vasilevič
21-hadovaja Maryja Vasilevič, za jakoj na konkursie pryhažości «Mis Biełaruś — 2018» Alaksandr Łukašenka naziraŭ asabista z hladackaj zali, na niejki čas stała jaho biazźmiennaj spadarožnicaj i favarytkaj № 1. Paśla 2020 hoda jana vypała ja zho najbližejšaha atačeńnia. Pra zarobki Maryi daviedalisia žurnalisty «Biuro».
Užo ŭ mai 2019 hoda Vasilevič patrapiła na błakitny ekran — stała suviadoŭcaj prahramy «Dobraj ranicy, Biełaruś!» na telekanale «Biełaruś 1». A ŭžo ŭ listapadzie — samaj maładoj deputatkaj taho sklikańnia ŭ Pałacie pradstaŭnikoŭ Nacyjanalnaha schodu.
Za čas svajho deputactva jana prałabiravała zakon «Ab adkaznym abychodžańni z žyviołami», jaki Pałata pradstaŭnikoŭ pryniała ŭ lutym 2024 hoda. Praca Maryi Vasilevič na pasadzie deputatki ŭ pieryjad sa śniežnia 2019 pa sakavik 2024 hoda abyšłasia dziaržbiudžetu sumarna ŭ 213 tysiač biełaruskich rubloŭ bruta.
Mandat Vasilevič skončyŭsia ŭ 2024 hodzie, i jana abviaściła, što bałatavacca na druhi termin nie budzie. Dziakujučy «Kibierpartyzanam» «Biuro» vyśvietliła, jak skłałasia dalejšaja karjera eks-deputatki.
U krasaviku 2024 hoda Vasilevič zarehistravała kampaniju «Amalem», jakaja budzie zajmacca aptovym handlem farmaceŭtyčnych, vieterynarnych, miedycynskich i artapiedyčnych tavaraŭ. Va ŭłasnaści byłoj pradstaŭnicy zakanadaŭčaj ułady 49% kampanii. 51% firmy zapisany na Alenu Kazak — asabistuju doktarku aniestezijołaha-reanimatołaha Łukašenki.
Žurnalist patelefanavaŭ Maryi Vasilevič, kab daviedacca, čamu eks-deputatka vyrašyła zaniacca farmaceŭtyčnym biznesam. U razmovie z «Biuro» Vasilevič admaŭlała svajo dačynieńnie da «Amalem»:
«Vy pamylajeciesia. U vas niedakładnyja źviestki».
Pytańnie, što źviazvaje Vasilevič z doktarkaj Łukašenki Alenaj Kazak, dziaŭčyna pakinuła biez adkazu.
U 2024 hodzie «Amalem», miarkujučy pa buchhałtarskaj spravazdačnaści, nie vioŭ faktyčnaj dziejnaści i prybytku nijakaha nie było. Adnak kampanija atrymała kredyt u 1,6 miljona biełaruskich rubloŭ.
Akramia taho, ź lipienia 2024 hoda Maryja Vasilevič ličycca viadučaj śpiecyjalistkaj pa kamiercyjnaj dziejnaści ŭ pryvatnaj kampanii «Lihmaton». Da žniŭnia 2024 hoda jaje kantralavali siemji tytuniovych mahnataŭ — Paŭła Tapuzidzisa i Viktara Piatroviča.
U studzieni byłaja deputatka Maryja Vasilevič pabrałasia šlubam z Alaksandram Žyłačam.
Ciapier čytajuć
U kadr znoŭ trapiła, jakim pamieram šryfta dla Łukašenki drukujuć vystupy, kab jon bačyŭ18
Kamientary