Jak u MUS viali śpis hiejaŭ siarod supracoŭnikaŭ i čamu siłaviki aryjentujucca na Rasiju
Bajpołaviec, padpałkoŭnik milicyi Stanisłaŭ Łupanosaŭ na kanale «Tok» raskazaŭ ab tym, chto ź siłavikoŭ chacieŭ by zaniać kresła Łukašenki, ab prarasijskich nastrojach i pošuku hiejaŭ u siłavych strukturach.
Čym abumoŭlena aryjentacyja siłavikoŭ na Rasiju
Na dumku Stanisłava Łupanosava, prarasijskija nastroi ŭ siłavych strukturach abumoŭleny tolki najaŭnaściu ŭ Rasii enierharesursaŭ. Tut niama nijakaj ideałohii.
«Heta kraina bieźlimitnych enierharesursaŭ. Heta adzinaje, što abumoŭlivaje prarasijskija nastroi. Pucinskaja ideałohija, toje, jak pabudavana rasijskaja sistema ŭłady, praca rasijskaha MUS zaŭsiody krytykavalisia ŭ našaj sistemie ŭnutranych spraŭ. Ich sistema zaŭsiody pracavała horš. U ich złačynnaść vyšejšaja. Tam zajzdrościć niama čamu. Tolki takija «pluški», jak mahčymaść raniej pajści na piensiju, bolšy jaje pamier»,
— adznačaje Łupanosaŭ.
Były supracoŭnik biełaruskich siłavych struktur nie pahadžajecca ź mierkavańniem, što dla mnohich biełaruskich siłavikoŭ Biełaruś nie źjaŭlajecca kaštoŭnaściu. Va ŭmovach abmiežavanaj infarmacyi jany ličać, što zmahajucca za Biełaruś:
«Niekatoryja siłaviki dumajuć, što ŭ siońniašnich umovach jany zmahajucca za Biełaruś. Jany ličać, što Biełaruś zastaniecca. Ciapier u krainie mocna abmiežavany prytok abjektyŭnaj infarmacyi. Takaja infarmacyja zakrytaja, pryznanaja ekstremisckaj. Ludzi bajacca heta čytać, tamu lepš jaje nie čytać. Tak spakojniej budzie, praściej».
Chto moža ŭziać uładu paśla adychodu Łukašenki
Stanisłaŭ Łupanosaŭ ličyć, što adychod Łukašenki budzie śviatam dla ŭsich. Ale siłaviki buduć bajacca lustracyi.
«Ja ŭpeŭnieny, što navat tyja siłaviki, jakija jamu słužać, buduć vielmi ŭdziačnyja, što jaho niama. Ale tyja, chto ŭčyniŭ złačynstvy, bajacca lustracyi. Jany ŭ pieršuju čarhu zacikaŭlenyja ŭ tym, kab Łukašenka zastaŭsia. Dumaju, kali jaho nie budzie, jany z krainy ŭciakuć»,
— miarkuje Stanisłaŭ Łupanosaŭ.
Na dumku byłoha supracoŭnika HUBAZiKa, paśla adychodu Łukašenki jaho kresła moža pasprabavać zachapić ciapierašni namieśnik ministra ŭnutranych spraŭ Mikałaj Karpiankoŭ: «Jon tak šalona nastrojeny. Bolš ni ŭ koha ja nie bačyŭ takoha zapału. U jaho jość ambicyi».
Kaho siłaviki bačać zamiest Łukašenki
Na dumku Łupanosava, biełaruskim siłavikam usio adno, chto budzie prezidentam:
«Mienavita značnaj masie siłavikoŭ usio adno, chto budzie, tolki nie Łukašenka. Ja dumaju, što Łukašenka zadzioŭb ich. Heta ŭ pieršuju čarhu tyčycca tych, chto pracuje na nižejšym i siarednim uzroŭniach. Nie na kamandnych pasadach. Bo toje, što jany robiać ciapier, — nie toje, dziela čaho jany pryjšli ŭ milicyju. Vučylisia jany nie dla hetaha».
Adkul hamafobija ŭ siłavych strukturach
Stanisłaŭ Łupanosaŭ adznačaje, što hamafobija šyroka ŭkaraniłasia ŭ MUS u paru, kali ministram byŭ Ihar Šunievič.
«Pry im pačali rabić upor na pošuk hiejaŭ. U apieratyŭnym płanie pačali ich šukać u sistemie MUS. Zrabili niejki admysłovy ŭlik. Skłali śpis. Niedzie jon jość»,
— zhadvaje były supracoŭnik siłavych struktur i adznačaje, što nie viedaje, jak jon vioŭsia i jakimi danymi papaŭniaŭsia.
Łupanosaŭ tłumačyć, što nikoha z tych, što patrapiŭ u śpis, nie zvalniali. «Heta elemient kampramatu, uździejańnia na čałavieka. Kali ty z nami, to z nami. I my viedajem, što ty hiej. Tak prama i mohuć skazać».
Hladzicie całkam:
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki11
Kamientary
V Hiermanii za 20 let družby s Rośsijej sformirovałoś 20 procientov nasielenija s ohladkoj na Rośsiju.
Idieołohičieskaja sostavlajuŝaja tam dołžna byť - russkaja ritorika i narrativy.