U biełaruskaha teatra moža źjavicca svoj budynak u Varšavie. Dzie i jak padpisać pietycyju
Uvieś hety tydzień biełarusy Varšavy dzielacca zachoplenymi vodhukami pra śpiektakl «Płošča Pieramohi». Adnak nie ŭsie viedajuć, što svaju premjeru Kupałaŭcy rychtavali litaralna na kaleniach — biez ułasnaj sceny i pamiaškańnia dla repietycyj. Kali adbudziecca nastupny pakaz śpiektakla — nieviadoma. I nie fakt, što adbudziecca: niama placoŭki, piša «Budźma».
Vyrašać pytańnie prapanuje fundacyja INEXKULT na čale z Volhaj Kulikoŭskaj. Pry padtrymcy tvorčaha asiarodździa i šyrokich kołaŭ biełaruskaj publiki jana zapuściła pietycyju, u jakoj prosić vyłučyć pamiaškańnie na terytoryi Varšavy, dzie moh by vieści svaju dziejnaść Biełaruski teatr. Novaja prastora budzie adkrytaja dla ŭsich niezaležnych biełaruskich kalektyvaŭ.
«Heta budzie placoŭka dla raznastajnych inicyjatyŭ i dyskusij», — marać u INEXKULT. Miesca dla sustreč, imprez, adukacyi, navuki i volnaha času. Pamiaškańnie, dzie biełaruskija artysty i režysiory narešcie zmohuć spakojna stvarać svaje pastanoŭki:
«Majučy prastoru i pracujučy jak partniory, my zmožam bolš, ale, pierš za ŭsio, zmožam damaŭlacca mižsobku i zasiarodžvacca na tvorčych płanach»…
Inicyjatyvu ŭžo padtrymali viadomyja biełarusy:
«I — kali vy ŭ Varšavie — varta, možna i treba padpisać pietycyju ŭ padtrymku biełaruskaha teatru. Było b cudoŭna mieć u Varšavie taki teatr. Svoj», — padzialiŭsia dumkami piśmieńnik Alhierd Bacharevič.
«Nie pamiataju, kali apošni raz my tak imkliva rabili takija maštabnyja pastanoŭki jak «Płošča Pieramohi». Dy sprava nie ŭ chutkaści, a ŭ tym, što niahledziačy na hetuju chutkaść usio atrymałasia niabłaha, jak mnie padajecca. Voś kali b u nas było svajo ŭłasnaje pamiaškańnie, ź jakoha nie treba biehčy praź dźvie hadziny, svaja scena, chvalicca na hety kont nie daviałosia b. I śmiešna, i kryŭdna. Ale źjaviłasia dobraja inicyjatyva @inexkult. I ciapier jość nadzieja, što ŭsio atrymajecca z vašaj dapamohaj. Kali łaska, padpišycie pietycyju ab vyłučeńni pamiaškańnia, dzie zmoža mieścicca biełaruski teatr», — vykazałasia kupałaŭka Valancina Harcujeva.
Padpisać pietycyju možna budzie pierad usimi śpiektaklami INEX FEST u žniŭni, a taksama ŭ:
- Bar Karma crew Warsaw (Aleja 3 Maja 15, Warszawa)
- BackDoor Bar Warszawa (Chmielna 7/9, Warszawa)
- Teatr Powszechny Warszawa (Jana Zamoyskiego 20)
- Teatr TR Warszawa (Marszałkowska 8)
- Teatr WAM Warszawa (Zgrupowania AK «Kampinos» 15)
Akramia taho, kožny moža atrymać błank i samastojna źbirać podpisy. Na hety čas viadoma, što pietycyju padpisali ŭžo bolš za paŭtysiačy čałaviek. Zbor budzie doŭžycca da kanca žniŭnia i, mahčyma, praciahniecca ŭ vieraśni.
Ciapier čytajuć
«Adpuścicie, kali łaska, syna!» Amierykanca z amniezijaj, jaki nielehalna pryjechaŭ u Biełaruś, nie addajuć maci5
Kamientary