Ažyŭ kalijny daŭhabud u Lubanskim rajonie, jaki budavaŭ Huceryjeŭ
Jak vyśvietliŭ Office Life, u kancy minułaha hoda paśla praciahłaha pierapynku adnavilisia pracy na ŭčastku Starobinskaha radovišča kalijnych solaŭ. Staŭka pakul zroblena na biełaruskija pradpryjemstvy. Chacia raniej kalijny kambinat u Lubanskim rajonie pačynali budavać zamiežnyja padradčyki.
U 2016 hodzie kampanija «Słaŭkalij», stvoranaja rasiejskim biźniesmienam Michaiłam Huceryjevym, pačała ŭźviadzieńnie Niežynskaha horna-abahačalnaha kambinata (HAK). U jakaści klučavych partnioraŭ nazyvalisia kitajskija ChinaState Energy Engineering i CITIC Construction, niamieckija Deilmann-Haniel i Herrenknecht.
Ahulny košt prajekta aceńvałasia ŭ $2 młrd, ź ich 1,4 młrd — kredyt Banka raźvićcia Kitaja. Pa ŭmovach kantraktu, budučaja pradukcyja «Słaŭkalija» pavinna była na praciahu 20 hadoŭ adhružacca ŭ KNR.
Adnak u 2021 hodzie paśla traplańnia Huceryjeva i kalijnaj śfiery Biełarusi pad zachodnija sankcyi finansavańnie prajektu spyniłasia.
U 2022 hodzie ŭ Biełarusi stvaryli dziaržpradpryjemstva «Niedra Niežin», jakoje stała pravapierajemnikam «Słaŭkalija». Praduhledžvałasia, što finansavańnie budzie ažyćciaŭlacca častkova za košt respublikanskaha biudžetu, ale asnoŭnaja častka srodkaŭ zastaniecca kredytnaj.
Uviesnu 2023 hoda pieršy vice-premjer Mikałaj Snapkoŭ pravioŭ naradu i zajaviŭ, što Niežynski HAK pavinny ŭvieści ŭ ekspłuatacyju da 1 červienia 2025 hoda. Na toj momant ahulnaja budaŭničaja hatoŭnaść abjekta aceńvałasia ŭ 39%. Tady ž daručyli adnavić dziejnaść siłami biełaruskich kampanij, jakija zajmalisia kalijnymi kambinatami ŭ Biełarusi, Rasiei dy inšych krainach.
U kancy 2023 hoda salihorskaje pradpryjemstva «Pasat» pačało budaŭnictva hałoŭnaha korpusa hałurhičnaj fabryki Niežynskaha HAK. Kampanija ŭźviadzie cechi suški i hranulacyi.
Akramia taho, u studzieni 2024 hoda na Niežynskim rudniku na haryzoncie −530 m pačaŭ pracu pieršy prachodčy kambajn «Tresta Šachtaśpiecbud».
«Biełharchimpram» pravioŭ abśledavańni i raspracavaŭ rašeńni pa dostupie ŭ rudnik i likvidacyi avaryjnaj situacyi ŭ klecievym šachtavym stvale. Heta ž kampanija stvaryła architekturny prajekt druhoj čarhi budaŭnictva HAKa.
Darečy, niadaŭna ŭrad Biełarusi vydaŭ «Biełharchimpramu» padatkovy kredyt u pamiery sumy PDV, jakaja padlahaje pieraličeńniu ŭ biudžet pa terminie vypłaty 22 studzienia 2024 hoda. Pahašać abaviazacielstvy treba z 1 lutaha pa 31 śniežnia 2024 hoda štomiesiac roŭnymi dolami.
Finansavyja ciažkaści ŭ pradpryjemstva ŭźnikli paśla ŭźviadzieńnia ŭ Turkmienistanie kalijnaha kambinata. «Biełharchimpram» zajaŭlaŭ, što jamu niedapłacili za vykananyja pracy $150 młn. «Turkmienchimija» nie zmahła ekspłuatavać kambinat i ŭsumniłasia ŭ jakaści rabot biełarusaŭ. U vyniku sprečka pierajšła ŭ mižnarodny arbitraž.
Ciapier čytajuć
«Adpuścicie, kali łaska, syna!» Amierykanca z amniezijaj, jaki nielehalna pryjechaŭ u Biełaruś, nie addajuć maci5
Kamientary