«Šerahi tvorčaj intelihiencyi ačyščajucca ad asob, jakija padryvali asnovy dziaržavy» — ministr kultury
Siońnia na svajo vyjaznoje pašyranaje pasiadžeńnie sabraŭsia prezidyum Savieta Respubliki, abraŭšy dla hetaha davoli niečakanaje miesca — minski Śviata-Jelisaviecinski manastyr. Temaj pasiadžeńnia było «hramadska-dziaržaŭnaje partniorstva ŭ zachavańni duchoŭna-maralnych kaštoŭnaściaŭ sučasnaha hramadstva», i pra heta znajšłosia što skazać i ministru kultury Anatolu Markieviču.
Pavodle słoŭ Markieviča, pahrozy pierad biełaruskim hramadstvam ciapier stajać takija ž, jak i 80 hadoŭ tamu, to-bok u časy Druhoj suśvietnaj vajny. I kab im efiektyŭna supraćstajać, «my pavinny pierš za ŭsio atrymać maralnuju pieramohu, zahartavać svoj duch, kab zachavać siabie i svaju krainu».
Dla hetaha patrebna vychoŭvać pieradusim u maładych biełarusaŭ patryjatyzm, asnovaj čaho źjaŭlajecca «luboŭ da bližniaha, da siamji, starych i dziaciej, pavaha da nacyjanalnaj historyi i movy, prytrymlivańnie tradycyj naroda». Ale nie ŭsie prajavy hetaha adnolkava karysnyja, bo, na dumku ministra, raniej časta było tak, što «za «novaje słova» ŭ mastactvie vydavalisia tvory, jakija adlustroŭvajuć ciomnyja baki žyćcia, jakija abudžajuć u čałavieku nizinnyja instynkty».
Chto aŭtary takich tvoraŭ, sumnievu niama — idejnyja apanienty ciapierašniaj ułady, pra što Markievič havoryć adkrytym tekstam:
«Usia hetaja duchoŭnaja atruta ŭlivałasia ŭ śviadomaść maładych ludziej z dapamohaj roznaha rodu art-prajektaŭ, halerej, kulturnych prastor, jakija finansavalisia psieŭdamiecenatami i zachodnimi fondami. Častka moładzi paddałasia hetamu razburalnamu ŭpłyvu i stała biazdumnaj, ale niebiaśpiečnaj pa svajoj razburalnaj sile zbrojaj u rukach zamiežnych lalkavodaŭ».
Tamu ciapier i viaducca represii ŭ tym liku suprać dziejačaŭ kultury, jakija nie ŭkładajucca ŭ prakrustaŭ łožak dziaržaŭnaj palityki:
«My vynieśli ŭroki z padziej 2020 hoda. Šerahi tvorčaj intelihiencyi ačyščajucca ad asob, jakija padryvali asnovy dziaržavy, što ich vyhadavała i karmiła».
Moładź ža, jakaja zastałasia ŭ rukach režymu, «my pastaralisia pieratvaryć z hledačoŭ u aktyŭnych udzielnikaŭ kulturnaha pracesu». Dziela taho ź lutaha hetaha hoda Minkultury sumiesna ź Minadukacyi realizuje prajekt «Uroki ŭ muziejach», školnikam dadziena prava adzin raz na miesiac biaspłatna naviedvać lubyja muziei krainy.
Dziakujučy hetamu, upeŭnieny Markievič, «my razburyli stereatyp ab tym, što biełarusy na praciahu stahodździaŭ byli šerym, łapatnym narodam, i ŭzmacnili ŭ moładzi pačućcio honaru za svaju krainu».
U takim styli Anatol Markievič vykazvajecca nie pieršy raz. Tak, hod tamu, 22 lutaha 2023 hoda, vystupajučy na pasiadžeńni kalehii Minkulta, jon vykazaŭ svaju pazicyju jašče bolš rezka i łakanična:
«Zdradnikam nie miesca na scenie, budź to śpiecmierapryjemstva abo kancert u ahraharadku».
Čytajcie taksama:
Ministr kultury pryznaŭ deficyt kadraŭ u biełaruskaj kultury. Z hetaj nahody sabrali cełuju naradu
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki11
Kamientary