Nie «Patreonam» adzinym: źjaviŭsia sajt, dzie možna padtrymać hrošami inicyjatyvy tvorčych biełarusaŭ. Užo ciapier tam źbirajuć na pierakład «Hrafa Monte-Krysta», knihu Alaksandra Čarnuchi i nie tolki.
17 lipienia pačała pracavać płatforma Gronka — resurs, dzie možna padtrymać finansava cikavyja prajekty biełarusaŭ ci zapytać dapamohu na realizacyju svajoj idei. Stvaralniki Gronka — techničnaja kamanda Paŭła Libiera i ananimnyja entuzijasty.
Aŭtary płatformy padkreślivajuć, što na joj biełarusy zmohuć znajści finansavańnie pad ideju biez pasiarednikaŭ, składanych zajavak i niezrazumiełych kryteraŭ. Płatforma nie spahaniaje kamisii ni z kreataraŭ, ni sa sponsaraŭ, ale ž kamisiju ŭ 3-5% źbiraje płaciežny siervis Stripe, praź jaki adbyvajucca danaty. Gronka taksama nie źbiraje asabistyja danyja kreataraŭ i sponsaraŭ, ale kali čałaviek choča atrymać uznaharodu za danat, jaho elektronny adras mohuć pieradać kreataru.
Ciapier na płatformie pradstaŭlenyja piać prajektaŭ, i ŭ bolšaści ź ich praduhledžanyja padarunki dla sponsaraŭ. Možna zadanacić, naprykład, na vydańnie zbornika apaviadańniaŭ «Hvałt» ad piśmieńnika Alaksandra Čarnuchi, dzie daśledujecca pryroda dyktatury i defarmacyja asoby pad jaje upłyvam, i atrymać bonusy — ad asobnika knihi da cišotki ź ilustracyjaj da jaje. Abo padtrymać publikacyju biełaruskaha pierakłada «Hrafa Monte-Krysta» i atrymać, akramia asobnika ramana, źnižku na knihi vydaviectva «Januškievič».
Karystalniki za miežami Biełarusi mohuć trapić na płatformu pa adrasie gronka.org, biełarusy ŭnutry krainy — pa spasyłcy storage.googleapis.com. Pakul što zadanacić na Gronka z terytoryi Biełarusi niemahčyma — płaciažy adklučanyja ź mierkavańniaŭ biaśpieki. Taksama siervis nie prymaje danaty ź biełaruskich i rasijskich kartak.
«Naša Niva» — bastyjon biełaruščyny
PADTRYMAĆCiapier čytajuć
«Minimalny zarobak doktara ŭ Polščy bolšy, čym ja mieła ŭ biełaruskim pryvatnym centry». Doktarka Markiełava — pra pracu ŭ polskaj balnicy i vyrab naturalnaj kaśmietyki99
Kamientary
U hetaj krainie chtości pracuje ŭvohule???
Čamu nie Hronka?