Chto taki Kit Kiełah, ad mierkavańnia jakoha zaležyć los miru va Ukrainie
Za plačyma 80-hadovaha hienierała — vojny va Vjetnamie i Piersidskim zalivie, kamandavańnie siłami śpiecyjalnych apieracyj u Jeŭropie, praca ŭ adnoj ź viadučych suśvietnych IT-kampanij i paśpiachovaja palityčnaja karjera.
Kit Kiełah naradziŭsia 12 maja 1944 hoda na vajennaj avijabazie ŭ Dejtanie (štat Ahajo) u siamji vajennaha. Jaho baćka słužyŭ u Vajenna-pavietranych siłach ZŠA, tamu siamja časta pierajazdžała.
Paśla zakančeńnia škoły ŭ Łonh-Bič (Kalifornija) Kiełah atrymaŭ stupień bakałaŭra palitałohii va Univiersitecie Santa-Kłary ŭ 1966 hodzie. Paralelna z vučobaj małady čałaviek prajšoŭ padrychtoŭku ŭ Korpusie padrychtoŭki aficeraŭ zapasu (ROTC). Paźniej, u 1976 hodzie, Kiełah atrymaŭ stupień mahistra mižnarodnych adnosin va Univiersitecie Kanzasa.
Vajennaja karjera
U 1967 hodzie Kiełah pačaŭ słužbu ŭ vojsku ZŠA. Paśla prachodžańnia bazavaj padrychtoŭki i škoły rejndžaraŭ jon byŭ pryznačany ŭ 101-ju pavietrana-desantnuju dyviziju i nakiravany ŭ Vjetnam, dzie kamandavaŭ raźviedvalnym uzvodam.
U nastupnyja hady Kiełah praciahnuŭ słužbu jak aficer sił śpiecyjalnych apieracyj. Jon byŭ instruktaram padrychtoŭki śpiecnaza dla armii Kambodžy (1971-1972), udzielničaŭ u apieracyjach ZŠA ŭ Hrenadzie (1983), Panamie (1989-1990) i ŭ Piersidskim zalivie («Bura ŭ pustyni», 1990-1991).
Paźniej jon zaniaŭ pasadu kamandujučaha Kamandavańniem sił śpiecyjalnych apieracyj u Jeŭropie (SOCEUR), a ŭ 1996 hodzie ŭznačaliŭ 82-ju pavietrana-desantnuju dyviziju — adno z samych elitnych i bajazdolnych złučeńniaŭ armii ZŠA. Pad jaho kamandavańniem dyvizija vykonvała apieracyi ŭ Bośnii i Kosava, a taksama ŭdzielničała ŭ vučeńniach NATA ŭ Kazachstanie i Uźbiekistanie.
Paśla hetaha Kiełah pierajšoŭ na słužbu ŭ Ministerstva abarony ZŠA, dzie zaniaŭ adnu z klučavych pazicyj, źviazanuju z zabieśpiačeńniem pracy sistem suviazi i kaardynacyjaj vajennych apieracyj na hłabalnym uzroŭni — dyrektara pa kamandavańni, kiravańni, kamunikacyjam i kampjutarnym technałohijam u Abjadnanym kamitecie načalnikaŭ štaboŭ.
U momant teraktaŭ 11 vieraśnia 2001 hoda, kali rejs 77 kampanii American Airlines urezaŭsia ŭ zachodniaje kryło Pientahona, Kiełah znachodziŭsia na svaim pastu i ŭziaŭ na siabie kiraŭnictva alternatyŭnym kamandnym punktam u kompleksie Raven Rock Mountain (RRMC) — zvyšsakretnym padziemnym bunkiery, pryznačanym dla pracy vyšejšaha vajskovaha kiraŭnictva.
Ad Oracle da Biełaha doma
Paśla vychadu ŭ adstaŭku ŭ 2003 hodzie Kit Kiełah pačaŭ karjeru ŭ hramadskim siektary, dałučyŭšysia da bujnoj technałahičnaj kampanii Oracle, dzie jon pracavaŭ daradcam pa pytańniach unutranaj biaśpieki.
Adnak užo ŭ śniežni taho ž hoda jon staŭ hałoŭnym apieracyjnym dyrektaram Časovaj kaalicyjnaj administracyi Iraka, stvoranaj paśla źviaržeńnia režymu Sadama Chusejna, faktyčna kiraŭnikom (administrataram) hetaj krainy.
Paśla zaviaršeńnia misii ŭ Iraku Kiełah praciahnuŭ pracu ŭ pryvatnym siektary, zajmajučy kirujučyja pasady ŭ kampanijach, jakija śpiecyjalizujucca na vajennych technałohijach i abaronnych kantraktach.
U 2016 hodzie Kiełah dałučyŭsia da pieradvybarnaj kampanii Donalda Trampa ŭ jakaści daradcy pa źniešniaj palitycy.
Paśla pieramohi Trampa jon byŭ pryznačany vykanaŭčym sakratarom i kiraŭnikom aparata Savieta nacyjanalnaj biaśpieki ZŠA. U krasaviku 2018 hoda Kiełah zaniaŭ pasadu daradcy pa nacyjanalnaj biaśpiecy vice-prezidenta Majka Piensa.
U 2019 hodzie, kali Kanhres ZŠA raspačaŭ praces impičmientu prezidentu Donaldu Trampu, Kit Kiełah zaniaŭ žorstkuju pratrampaŭskuju pazicyju i aktyŭna vystupaŭ u jaho abaronu. Impičmient byŭ inicyjavany ŭ suviazi z abvinavačvańniami ŭ cisku na Ukrainu z metaj atrymańnia kampramatu na syna Džo Bajdena Chantera.
Padčas słuchańniaŭ u Kanhresie Kiełah zajaviŭ, što «nie pačuŭ ničoha drennaha ci nienaležnaha» ŭ razmovie Trampa ź Zialenskim, padčas jakoj jon prysutničaŭ.
U pieryjad prezidenctva Džo Bajdena Kiełah zajmaŭ pasadu sustaršyni kansiervatyŭnaha analityčnaha Centra amierykanskaj biaśpieki ŭ Instytucie palityki «Amieryka pierš za ŭsio».
Śpiecyjalny pasłańnik pa pytańniach Ukrainy i Rasii
U sakaviku 2022 hoda paśla pačatku poŭnamaštabnaj vajny Rasii va Ukrainie Kiełah zaklikaŭ da akazańnia padtrymki Kijevu:
«Davajcie damo Ukrainie šaniec pieramahčy. <…> Kitajcy źviernuć na heta ŭvahu. Paŭnočnyja karejcy źviernuć na heta ŭvahu. Irancy źviernuć na heta ŭvahu. Ja liču, što ŭ vas jość šaniec raz u žyćci pierazahruzić suśvietnuju arenu».
Hienierał niekalki razoŭ pabyvaŭ va Ukrainie. Tak u pačatku 2023 hoda jon naviedaŭ Buču, Adesu i pryfrantavyja Charkaŭ i Izium.
U červieni 2024 hoda Kiełah prapanavaŭ Trampu padrabiazny mirny płan pa spynieńni vajny Rasii va Ukrainie.
27 listapada 2024 hoda, paśla pieravybrańnia Donalda Trampa na pasadu prezidenta, Kiełah byŭ pryznačany śpiecyjalnym pasłańnikam pa pytańniach Ukrainy i Rasii.
U hetaj roli jon adkazvaje za dypłamatyčnyja namahańni pa ŭrehulavańni kanfliktu pamiž dźviuma krainami, prapanoŭvajučy stratehii, nakiravanyja na dasiahnieńnie miru i stabilnaści ŭ rehijonie.
Pa infarmacyi The Wall Street Journal, Tramp z samaha pačatku pastaviŭ pierad Kiełaham zadaču damahčysia ŭrehulavańnia kanfliktu za 100 dzion.
Kiełah nie prymaŭ udzieł u pieramovach pamiž ZŠA i Rasijaj u Er-Ryjadzie. Siońnia jon prybyŭ ź vizitam va Ukrainu.
Kit Kiełah žanaty, u jaho troje dziaciej. Jaho dačka Miehan Mobs — kiraŭnik dabračynnaj arhanizacyi R.T. Weatherman Foundation i nieadnarazova byvała va Ukrainie.
Daradcy Trampa padali płan spynieńnia vajny Rasii suprać Ukrainy
Śpiecpradstaŭnik ZŠA pa Rasii i Ukrainie prybyŭ u Kijeŭ
Kiełah: Nichto nie budzie naviazvać Ukrainie mirnaje pahadnieńnie
Cichanoŭskaja sustrełasia z Kiełaham u kułuarach kanfierencyi ŭ Miunchienie
Śpiecpradstaŭnik Trampa Kit Kiełah nie bačyć Jeŭropy za stałom mirnych pieramoŭ
Kamientary