Prezident Francyi paśla sustrečy z prezidentam ZŠA Donaldam Trampam u Biełym domie zajaviŭ pra toje, što jon aptymistyčna nastrojeny adnosna mahčymaha zaviaršeńnia vajny va Ukrainie i nie vyklučyŭ — uśled za Trampam — što pieramirje moža być dasiahnuta ŭžo ŭ bližejšyja tydni. Pra heta jon skazaŭ u intervju Fox News.
U toj ža čas u hutarcy z žurnalistami pa vynikach vizitu Makron padkreśliŭ, što mir nie pavinien stać «kapitulacyjaj» Ukrainy, i zaklikaŭ prezidenta ZŠA być «aściarožnym» u pieramoŭnym pracesie, pakolki nieabchodna zabiaśpiečyć biaśpieku Ukrainy i ŭsioj Jeŭropy.
Niahledziačy na zruch u palitycy ZŠA z prychodam administracyi Trampa i rezkija zajavy, jakija hučać u apošnija dni z boku Trampa ŭ dačynieńni da ŭkrainskich i jeŭrapiejskich lidaraŭ – i krytyku ŭ adras prezidenta ZŠA z boku palitykaŭ krain JEZ — pieramovy Trampa i Makrona ŭ Vašynhtonie prachodzili ŭ ciopłaj atmaśfiery. Tramp vykazaŭ zhodu ź idejaj Francyi i Vialikabrytanii nakiravać va Ukrainu siły pa padtrymańni miru paśla zaviaršeńnia vajny i vykazaŭ zdahadku, što Uładzimir Pucin pahodzicca z hetym, choć raniej aficyjnaja Maskva takuju mahčymaść admaŭlała.
«Paśla pieramovaŭ z prezidentam Trampam ja ŭpeŭnieny, što jość šlach napierad», — skazaŭ Makron. Jon nazvaŭ sustreču z Trampam «stratehičnaj» i nacelenaj na rašeńni.
Pa słovach Makrona, pieršapačatkova pavinna być dasiahnuta pieramirje, a zatym pačacca pradmietnyja pieramovy ab kančatkovym mirnym pahadnieńni. Makron, adnak, adznačyŭ, što pieramirje pavinna być zasnavana na tryvałych harantyjach biaśpieki dla Ukrainy, pakolki raniej Rasija parušała damoŭlenaści.
«Dla mianie paśladoŭnaść mahła b być takoj — spačatku pieramovy pamiž ZŠA i Rasijaj, ZŠA i Ukrainaj… Zatym pieramirje. Jano moža być dasiahnuta ŭ bližejšyja tydni… Paśla hetaha iduć pieramovy ab harantyjach biaśpieki, terytoryjach, infrastruktury… Paśla hetaha-mirnaje pahadnieńnie», — skazaŭ Makron. Jon adznačyŭ, što mirnaje pahadnieńnie niemahčyma biez harantyj biaśpieki. Adnoj ź ich moža stać raźmiaščeńnie va Ukrainie jeŭrapiejskich miratvorčych sił — pry padtrymcy ZŠA.
Dyskusii pra heta, jak čakajecca, buduć praciahnutyja padčas vizitu ŭ Vašynhton premjer-ministra Vialikabrytanii Kira Starmiera.
Łukašenka: U 2020 hodzie kala Pałaca Niezaležnaści nie pakistancy biehali20
Kamientary