U Biełarusi zapuścili teściravańnie servisu anłajn-zakazu lekaŭ i BADaŭ
Płatformu apteka.by dla zamovy lekaŭ i BADaŭ pačali teściravać u Biełarusi. Kali ŭsio budzie narmalna, da siaredziny hoda raspracoŭščyki płanujuć vyvieści servis na poŭnuju mahutnaść, piša «Smartpriess».
Praz płatformu možna budzie vybrać nieabchodnyja preparaty, paraŭnać košty pa roznych kramach i zakazać dastaŭku ŭ bližejšuju partniorskuju apteku.
Śviatłana Staravojtava, kiraŭnica prajektu, raskazała, što servis dapamoža vyrašyć prablemu pošuku redkich lekaŭ.
«Siońnia navat bujnyja aptečnyja sietki nie mohuć prapanavać poŭny asartymient preparataŭ. Ludziam davodzicca šukać patrebnyja leki ŭ roznych kropkach, a časam jechać za imi ŭ inšy horad. Servis spraščaje hety praces: vy vybirajecie preparat na sajcie, paraŭnoŭvajecie ceny i zakazvajecie dastaŭku ŭ bližejšuju apteku», — patłumačyła jana.
Zaraz da płatformy padklučany 300 aptek pa ŭsioj krainie.
Teściravańnie apteka.by budzie doŭžycca try miesiacy, paśla da sajtu dadaduć bolš aptek i preparataŭ. U budučyni mahčyma bolš častaja dastaŭka lekaŭ na dom i stvareńnie infarmacyjnaha partała z aktualnaj infarmacyjaj ad vytvorcaŭ.
Zaraz u Biełarusi papularny taksama sajt tabletka.by. Praź jaho možna znachodzić, u jakich aptekach jość u najaŭnaści nieabchodnyja leki.
Ciapier čytajuć
«Minimalny zarobak doktara ŭ Polščy bolšy, čym ja mieła ŭ biełaruskim pryvatnym centry». Doktarka Markiełava — pra pracu ŭ polskaj balnicy i vyrab naturalnaj kaśmietyki99
Kamientary