Na pieramovach u Saudaŭskaj Aravii ZŠA vyśvietlać, ci hatova Ukraina da miru
ZŠA padčas pieramovaŭ z ukrainskaj delehacyjaj u Saudaŭskaj Aravii ŭ aŭtorak płanujuć vyśvietlić, ci hatovy Kijeŭ pajści na sastupki Rasii dziela spynieńnia vajny, paviedamlaje Reuters sa spasyłkaj na dvuch amierykanskich čynoŭnikaŭ, jakija razmaŭlali na ŭmovach ananimnaści.
Amierykanskaja delehacyja taksama budzie «sačyć za prykmietami taho, što ŭkraincy surjozna nastrojeny na palapšeńnie adnosin» z administracyjaj prezidenta ZŠA Donalda Trampa paśla sprečki ŭ Biełym domie, skazaŭ adzin z surazmoŭcaŭ ahienctva.
Delehacyju ZŠA ŭznačalić dziaržsakratar Marka Rubia, ukrainskuju — kiraŭnik Ofisa prezidenta Andrej Jarmak. Čakajecca, što da Rubia dałučacca daradca Trampa pa nacyjanalnaj biaśpiecy Majk Uołc i śpiecyjalny pasłańnik na Blizkim Uschodzie Styŭ Uitkaf.
«Nielha kazać «ja chaču miru» i «ja admaŭlajusia iści na kampramis»», — skazaŭ Reuters adzin z amierykanskich čynoŭnikaŭ.
«My chočam ubačyć, ci zacikaŭleny ŭkraincy nie prosta ŭ miry, a ŭ realistyčnym miry, — zajaviła inšaja krynica. — Kali ich cikaviać tolki miežy 2014 abo 2022 hoda, heta ab niečym śviedčyć».
Prezident Ukrainy Uładzimir Zialenski ŭ paniadziełak praviadzie ŭ Saudaŭskaj Aravii pieramovy z naślednym pryncam Muchamiedam bin Sałmanam, paśla čaho ŭkrainskaja kamanda zastaniecca dla pieramovaŭ z amierykanskim bokam.
U viačernim zvarocie ŭ niadzielu Zialenski skazaŭ, što spadziajecca na vyniki pieramovaŭ jak pa nabližeńni miru, tak i pa praciahnieńni padtrymki z boku Vašynhtona.
Prezident ZŠA Donald Tramp zajaviŭ, što ZŠA amal adnavili abmien raźviedvalnymi danymi z Ukrainaj, paviedamlaje Reuters. Jon taksama skazaŭ, što čakaje dobrych vynikaŭ ad nastupnych pieramovaŭ amierykanskich i ŭkrainskich aficyjnych asob u Saudaŭskaj Aravii.
Adkazvajučy na pytańnie, ci razhladaje jon mahčymaść adnaŭleńnia abmienu infarmacyjaj, Tramp skazaŭ: «My amal zrabili heta. Voś-voś».
Z nahody pieramovaŭ u Saudaŭskaj Aravii jon zajaviŭ nastupnaje: «Ja vieru, što my dasiahniem vialikaha prahresu na hetym tydni».
Ciapier čytajuć
«Minimalny zarobak doktara ŭ Polščy bolšy, čym ja mieła ŭ biełaruskim pryvatnym centry». Doktarka Markiełava — pra pracu ŭ polskaj balnicy i vyrab naturalnaj kaśmietyki99
Kamientary