Žurnalisty vyśvietlili, jak redaktara Atlantic dadali ŭ čat ab udarach pa Jemienie. Jaho zbłytali z čynoŭnikam Trampa
Televizijnaja kampanija CBS News vyśvietliła, jakim čynam hałoŭny redaktar časopisa Atlantic Džef Hołdbierh trapiŭ u sakretny čat u miesiendžary Signal, dzie čynoŭniki administracyi Biełaha doma abmiarkoŭvali płany udaraŭ pa jemienskich chusitach, piša Bi-bi-si.
Jak skazana ŭ publikacyi, pamyłka, ździejśnienaja daradcam prezidenta ZŠA Majkam Uołcam i jakaja stała pryčynaj palityčnaha skandału, była źviazana z funkcyjaj smartfonaŭ, jakaja dazvalaje aŭtamatyčna zachoŭvać numar telefona taho ci inšaha kantaktu, kali jon prysutničaje ŭ tekście elektronnaha lista.
Niekalki infarmavanych ananimnych krynic paviedamili CBS News, što zaprašeńnie na ŭdzieł u sakretnym čacie, jakoje atrymaŭ Hołdbierh, na samoj spravie było pryznačana aficyjnamu pradstaŭniku Biełaha doma pa pytańniach nacyjanalnaj biaśpieki Brajanu Chjuzu. Minułaj vosieńniu telefon Uołtca prapanavaŭ zachavać nieviadomy numar, dasłany Chjuzam, jak telefonny numar samoha Chjuza.
Jak piša CBS News, paśla publikacyi skandalnaha artykuła ŭ Atlantic słužba techničnaj padtrymki prezidenckaj administracyi praviała rasśledavańnie incydentu i na minułym tydni paviedamiła pra jaho vyniki Trampu i inšym čynoŭnikam Biełaha doma.
U vyniku rasśledavańnia akazałasia, što nijakich pramych kantaktaŭ pamiž Uołcam i Hołdbierham, a taksama pamiž Hołdbierham i Chjuzam, nie było. Jak ža heta adbyłosia?
Kali vieryć publikacyi, va ŭsim vinavata — elektronnaje piśmo, jakoje Hołdbierh u kastryčniku minułaha hoda adpraviŭ u štab pieradvybarčaj kampanii Trampa. Jon paprasiŭ dać kamientar u suviazi z artykułam, źviazanym z Trampam i vajskoŭcami. Supracoŭniki štaba chacieli pastavić u kurs spravy členaŭ asiarodździa Trampa, u tym liku Uołca, jaki ŭ minułym słužyŭ u armii.
Pavodle źviestak dźviuch krynic, pahavaryŭšy z supracoŭnikam štaba Styvienam Čenham i inšymi, Chjuz skapiravaŭ tekst lista Hołdbierha (u im byŭ adras i telefon žurnalista) u novy email — i adpraviŭ jaho Uołcu.
Ale paśla hetaha mabilny telefon budučaha daradcy pa nacyjanalnaj biaśpiecy aŭtamatyčna prapanavaŭ zachavać numar Hołdbierha jak novy kantaktny numar Brajana Chjuza.
Prykmietna, što z taho času Uołc nieadnarazova telefanavaŭ Chjuzu i dasyłaŭ jamu paviedamleńni — i pry hetym usie jany traplali da pravilnaha adrasata, a nie da Hołdbierha. Sudziačy pa ŭsim, telefon nie błytaŭ dva numary da taho momantu, pakul Uołtc u sakaviku nie adpraviŭsia ŭ horad Džyda ŭ Saudaŭskaj Aravii.
Ale kali Uołc pasprabavaŭ dadać Chjuza ŭ toj samy čat u Signal, telefon adpraviŭ zaprašeńnie Hołdbierhu, padabraŭšy mienavita jaho numar u śpisie kantaktaŭ.
Signal, vierahodna, viedaŭ, što hety numar telefona nasamreč naležyć Hołdbierhu, bo ŭ čacie jon byŭ paznačany jak «JG» (to-bok Džef Hołdbierh). Adnak hetaha nie zaŭvažyŭ ni adzin z udzielnikaŭ čata trampaŭskaj kamandy ŭ halinie nacyjanalnaj biaśpieki, paviedamili CBS News niekalki krynic.
Pavodle źviestak adnaho z surazmoŭcaŭ, administracyja nie viedała, što Hołdbierh prysutničaŭ u sakretnym čacie, da taho momantu, pakul Atlantic nie paprasiŭ Bieły dom prakamientavać publikacyju — i heta adbyłosia ŭsiaho za paru hadzin da jaje zjaŭleńnia.
U niadzielu aficyjny pradstaŭnik Biełaha doma nie zmoh apieratyŭna adkazać na prośbu CBS News prakamientavać hetuju infarmacyju.
Pra funkcyju mabilnych telefonaŭ, jakaja pryviała da pamyłki, upieršyniu paviedamiła brytanskaja hazieta Guardian.
Ciapier čytajuć
«Adpuścicie, kali łaska, syna!» Amierykanca z amniezijaj, jaki nielehalna pryjechaŭ u Biełaruś, nie addajuć maci3
Kamientary
Trochi padrabiaźniej.
1. Brajan Chjuz zamiest pierasyłki paštovaha paviedamleńnia (forward) Hołdbierha prosta skapiravaŭ jaho całkam (copy paste), uklučajučy podpis u kancy. U podpisy byŭ i numar telefona Hołdbierha.
Takaja niekalki šyzafreničnaja zvyčka, kali vam prysyłajuć cytatu inšaha čałavieka, nijak nie adznačajučy, što heta mienavita cytata.
2. iPhone Uołca kali ŭbačyŭ piśmo ad Chjuza, prapanavaŭ adnavić kantakty Chjuza. Prahrama telefona nie mahła zdahadacca, što Chjuz prykłaŭ kantakty Hołdbierha jak svaje.
Uołc taksama nie padumaŭ i pahadziŭsia adnavić kantakty. Zaraz u Uołca 2 numary telefona, padpisanyja "Chjuz".
3. Kali Uołc dadavaŭ Chjuza ŭ hrupu, Signal uziaŭ druhi jaho telefon, jaki nasamreč telefon Hołdbierha. Čamu? Nie napisana, ale dapušču, što na sapraŭdnym telefonie Chjuza Signal jašče nie byŭ ustalavany, a ŭ Hołdbierha byŭ.
4. Nichto ŭ hrupie nie źviarnuŭ uvahu, što "Chjuz" padpisany jak "JG".
5. Bieły Dom raniej dazvoliŭ vykarystoŭvać Signal, tamu što nie było alternatyŭnaha sposabu dla kamunikacyi pamiž roznymi dziaržaŭnymi ahienctvami. Tak jak papiarednija administracyi nie raspracoŭvali alternatyvu, administracyja Trampa nibyta dazvoliła ŭ pierachodny pieryjad praciahvać karystacca Sihnałam zamiest zvyčajnych sms abo iMessage (? "regular text-message chains").