U Biełarusi pakažuć «Minecraft u kino» — film bje rekordy pa suśvietnych zborach

Novy film stvorany pa matyvach lehiendarnaj videahulni Minecraft. Heta historyja pra trochmierny śviet, stvorany z kuboŭ, dzie hieroj moža stvarać ź ich roznyja budynki, jak u Lego. Minecraft nie maje kankretnaha siužetu i daje hulcu svabodu tvorčaści: naprykład, možna daśledavać kubičny śviet ci zmahacca z vorahami.

Kali sama hulnia vam nieznajomaja, film vy ŭsio roŭna zrazumiejecie. Za toje, kab raskryć suśviet Minecraft, adkazvaje Styŭ — charyzmatyčny taŭstun u vykanańni akciora Džeka Błeka. U dziacinstvie jon maryŭ pracavać šachcioram, ale voś biada — dziaciej na šachtu ŭ jaho haradku nie puskali. 

Tamu Styvu daviałosia pajści ŭ klerki, pakul da jaho nie viarnulisia dziciačyja pamknieńni. Ščaślivy źbieh abstavinaŭ dapamoh Styvu adkryć dla siabie śviet Minecraft, dzie mahčyma ŭsio. Kab źbierahčy jaho ad vorahaŭ, daviałosia schavać mahičny artefakt, ale vypadkova jon trapiŭ u ruki Hareta «Śmieciara» Harysana (Džejsan Mamaa) — byłoha čempijona pa videahulniach, jaki apynuŭsia na miažy bankructva.

Pavialičyć

U kampaniju da Harysana prybivajecca padletak Hienry — jašče adzin stereatypny nikčemnik, ź jakoha ździekujucca i adnakłaśniki, i navat nastaŭniki. Razam z Natali, to-bok siastroj Hienry, i ich ryełtarkaj Don hieroi vypadkova traplajuć u śviet Minecraft. Ich misija — razam sa Styvam vyratavać novy śviet ad vorahaŭ-pihlinaŭ i znajści šlach viarnucca dachaty. 

«Minecraft u kino» atrymaŭ vielmi roznuju acenku ad krytykaŭ i hledačoŭ.

Pieršyja pastavilisia da stužki chaładnavata — naprykład, na sajcie-ahrahatary recenzij Rotten Tomatoes film maje rejtynh uchvaleńnia ŭsiaho 48%, a samu stužku nazyvajuć nudnaj i dziciačaj.

Tym časam hledačy ŭ zachapleńni. Pa danych na 8 krasavika «Minecraft u kino» prynios svaim stvaralnikam šalonyja 336 miljonaŭ dalaraŭ u mižnarodnym prakacie, pry tym što biudžet samoha filma składaje 150 miljonaŭ dalaraŭ.

Paraŭnajcie heta z dysnejeŭskaj «Biełaśniežkaj», jakaja vyjšła na paru tydniaŭ raniej i ličyłasia bolš pierśpiektyŭnaj: na tuju stužku vydatkavali prykładna 250 miljonaŭ dalaraŭ, a sabrać u prakacie atrymałasia tolki kala 170 miljonaŭ dalaraŭ.

Pavialičyć

Čym tak čaplaje «Minecraft u kino»? Heta fajna zroblenaja dla svajho žanru lohkaja i humarnaja kamiedyja, chacia jaje siužet i moža padacca znajomym. Nie ŭpieršyniu nam pakazvajuć, jak kinahieroi traplajuć u kampjutarnuju hulniu, zhadajcie chacia b film «Džumandžy».

Ale «Minecraft u kino» zrobleny tak tvorča, što, zdajecca, trochi banalnaści možna i daravać. Šmat u čym heta zasłuha Džeka Błeka i Džejsana Mamaa. Addanaść hetych dvuch akcioraŭ i chimija pamiž imi dapamahli ŭdychnuć žyćcio ŭ hetuju historyju.

Pavialičyć

U filmie bahata kampjutarnaj hrafiki — cełyja harady i lasy ŭ styli majnkrafta, pa jakich hulajuć hieroi.

«Minecraft u kino», kaniečnie, zacikavić fanataŭ hulni, i zrazumieła, što zbolšaha na jaho ŭ kino iduć dzieci. Kali vy hulali ŭ Minecraft, znojdziecie dla siabie ŭ filmie šmat paschałak: naprykład, ratavalnaje viadro vady ci vahanietki, što apynulisia ŭ centry sapraŭdnaj pahoni. Ledź nie samaja znakamitaja paschałka — kuryny žakiej (zombi viercham na kurycy), ad jakoha šalejuć dzieci ŭ amierykanskich kinateatrach.

Hetaja jarkaja i śmiešnaja stužka pasuje i dla siamiejnaha prahladu, hałoŭnaje — stavicca da jaje z toj ža lohkaściu, ź jakoj jana zroblenaja.

• 5
• 1
• 1
• 0
• 0
• 0
• 0
• 0