Daśviedčany dyzajnier hod šukaje pracu paŭsiul — voś jaho praniźlivy manałoh (darečy, jon nie vinavacić ŠI)

— Ujavicie sabie, što žyvie na śviecie UX/UI-dyzajnier pa imieni Siaržuk. U Sieržuka adukacyja hrafičnaha dyzajniera, 10-hadovy dośvied pracy ŭ prafiesii, ź jakich 6 hadoŭ — u jakaści UX/UI-dyzajniera.

Siarhiej sprabuje znajści pastajannuju fułtajm-pracu ŭ roli UX/UI— abo product-dyzajniera ŭžo bolš za hod — ale biezvynikova. Siarhiej maje dośvied — rabiŭ roznyja pradukty, pracavaŭ jak u bujnych IT-kampanijach, tak i ŭ startapach.

U Siarhieja jość partfolia i dobra składzienaje CV — i nul paśpiachova projdzienych sumoŭjaŭ. Kali pašancuje, zaprosiać parazmaŭlać pa videasuviazi, kali pašancuje krychu mienš — to ŭ pierapiscy. Ale ŭsio, jak zvyčajna, skončycca tym, što ŭ kampanii niama biudžetu na pazicyju, a jamu ŭsio roŭna prapanujuć vykanać testavaje.

Treba testavaje (choć u ciabie i kłasnaje partfolia)

Kab uładkavacca dyzajnieram, treba mieć partfolia, — bieź jaho ciabie navat razhladać nie buduć. A kab stvaryć partfolia, treba vydatkavać vielmi šmat času, bo partfolia UX/UI— abo product-dyzajniera pavinna ŭtrymlivać realnyja prajekty z apisanym pracesam raspracoŭki (case studies).

Ale pa niejkaj pryčynie ŭ mnohich kampanij u apisańni chajrynh-pracesu druhim abo trecim etapam staić… testavaje zadańnie.

Siarhiej vydatkavaŭ čas na stvareńnie partfolia z apisańniem prajektaŭ, a na sumoŭjach jaho zaŭsiody prosiać vykanać testavaje. Navošta ž tady tak karpieŭ nad partfolia?

Treba «bahataje» partfolia — ale ŭ miežach adnoj kampanii!

Rekrutary, praŭda, kažuć: kab spadabacca nam, treba ŭkazać u CV, što ŭ ciabie jość dośvied 5+ hadoŭ u praduktovaj kampanii abo startapie, a jašče — bahataje partfolia.

Siarhiej pracavaŭ u praduktovaj kampanii, jakaja za hod zapuściła adnu fiču dla aplikacyi. Bo praces stvareńnia i implemientacyi fičy — doŭhi i niaprosty, kali treba zrabić usio jakasna. Tamu i prajektaŭ u partfolia za hety pieryjad niašmat. Ale kaho heta chvaluje?!

Treba jak maha bolš (miortvych) prahram

A voś patrabavać ad kandydata dośvied pracy ŭ prahramie, jakaja ŭžo miortvaja, — heta tak, heta baza. InVision zakryli. Ale heta nie važna, usie ŭsio roŭna šukajuć jaje ŭ pieraliku. Tamu hałoŭnaje — dadać u CV jak maha bolš prahram: dla raspracoŭki, dyzajnu, animacyi. Bo heta vakansija na UX/UI— abo product-dyzajniera, a dyzajnier pavinien umieć usio, i jašče źvierchu JS, CSS, HTML…

Ale biudžetu niama

«A jaki biudžet na hetuju pazicyju?» — u pracesie intervju pytajecca Siarhiej, bo dla 80% vakansij uzrovień zarobku nie ŭkazany. «U nas niama biudžetu. Adšturchoŭvajemsia ad kandydata».

E-e-e, kali niama biudžetu, navošta vy šukajecie kandydata? «Niama biudžetu» ŭ pierakładzie z rekruckaj movy aznačaje, što płacić buduć vielmi mała.

Siarhiej nazyvaje viłku zarobku — i paśla tydnia abo dvuch čakańnia adkazu atrymlivaje albo prostuju admovu, albo admovu ŭ farmacie: «vašy čakańni pa zarobku nie supadajuć z našym biudžetam». A Siarhiej ž pavieryŭ, što biudžetu ŭ kampanii niama.

Šmatetapnyja sumoŭi, nierelevantnyja realnaj pracy

Kab ciabie zaprasili na pieršy etap intervju, treba zacikavić svaim partfolia i CV.

I paśla pieršaha etapu Siarhiej čakaje jašče try ci čatyry sumoŭi. Uvieś praces zaciahvajecca amal na dva miesiacy.

U adnoj polskaj kampanii na čaćviortym etapie (ź piaci) byŭ test na łohiku, viedańnie matematyki i fiziki, kampazicyi i koleraznaŭstva, a taksama techničnyja navyki. Ofier Siarhiej nie atrymaŭ, ale atrymaŭ vialiki list z padziakaj za vydatkavany čas.

Ci heta ok? Viadoma! Bo dla kampanii vielmi važna znajści taho samaha, adzinaha Siarhieja, jaki ŭmieje niestandartna myślić (što b heta ni aznačała), karystacca prahramami, što ŭžo zakrylisia, i pažadana za minimalnuju sumu.

Šmatlikija lid-dyzajniery na poźnich etapach pavodziać siabie tak, nibyta jany sami vynajšli dyzajn i biźnies. Techničnyja intervju časta zusim nie adpaviadajuć realnaj pracy — i adčuvajecca niedachop dośviedu ŭ praviadzieńni sumoŭjaŭ. Čamu Siarhieju na intervju kažuć, što jon kłasny i cudoŭna vykanaŭ techzadańnie ci adkazaŭ na pytańni, — a potym časta prosta źnikajuć i nie viartajucca?

A jašče ŭ Siarhieja byŭ cikavy dośvied: niejak na adnym z etapaŭ jamu treba było prahledzieć videa z 8 pytańniami — i na kamieru adkazać na hetyja pytańni. Na kožny adkaz advodziŭsia abmiežavany čas. Što samaje cikavaje — adkaz na kožnaje pytańnie možna było pierazapisvać kolki zaŭhodna razoŭ. U liście, dzie tłumačyŭsia taki padychod da pracesu najmu, havaryłasia, što taki farmat zručniejšy i praściejšy jak dla kampanii pry adbory kandydataŭ, tak i dla kandydataŭ, bo jany mohuć pierazapisvać adkaz stolki razoŭ, kolki spatrebicca dla idealnaha vyniku.

Ofis

Ach tak, i jašče abaviazkova… chadzić u ofis.

Statystyka

Uvieś praces najmu ŭ IT usio bolš nahadvaje vyprabavańnie z adnoj viadomaj sieryi knih i lubimaj miljonami sieryi hulniaŭ — u siarednim vyžyvajuć 3 z 10. Składajecca ŭražańnie: kali dyzajnier nie pracavaŭ u Google, AirBnB, Apple, Uber i inšych topavych kampanijach, to šancy znajści pracu mary ŭ jaho — 0,001%. Dobra, adkiniem mary — chacia b prosta znajści pracu, jakuju lubiš i ŭmieješ rabić.

Siarhiej daŭno pierastaŭ vieści statystyku svaich vodhukaŭ. Za hod jana dakładna pierajšła za 1000.

Pry hetym jon prajšoŭ 12 sumoŭjaŭ — i atrymaŭ tolki adnu prapanovu supracoŭnictva na 20 hadzin na tydzień na 3 miesiacy.

Znajomy Siarhieja skardzicca jamu, što ź lutaha ŭ jaho 347 vodhukaŭ, 5 sumoŭjaŭ — i 0 ofieraŭ. U Siarhieja za hod tolki admovaŭ kala 1000. Varta adznačyć, što byvała i tak, što Siarhiej padavaŭsia na adny i tyja ž vakansii niekalki razoŭ — jak tolki jany znoŭ adkryvalisia.

Testavych zadańniaŭ Siarhiej vykanaŭ niašmat — usiaho 4. I tolki dla tych kampanij, u jakija jon sapraŭdy vielmi chacieŭ patrapić (i tak, hetyja testavyja byli dobra składzienyja, plus jon zahadzia viedaŭ abo abmierkavaŭ zarobak).

Siarhiej žyvie ŭ Polščy, ale łakacyja, na žal, nie maje značeńnia. U jaho jość znajomyja, jakija sutykajucca z tym ža nie tolki ŭ Polščy, ale i ŭ Hiermanii i Hruzii.

Sam Siarhiej adpraŭlaje vodhuki paŭsiul, a nie tolki na vakansii ŭ Polščy, — addalenuju pracu prapanujuć i kampanii ź inšych krain. Kali Siarhiej bačyć, što padychodzić pad vakansiju, jon adpraŭlaje vodhuk, i tam, dzie nie padychodzić — taksama.

Heta ŭsio praz AI?

Kali b ja viedaŭ. Nie dumaju, što ŠI tut vinavaty. Chiba što, kali jon skanuje CV na najaŭnaść klučavych fraz i słoŭ. A heta, na maju dumku, daloka nie lepšy sposab adboru. Ja viedaju dastatkovuju kolkaść dyzajnieraŭ i bačyŭ šmat pastoŭ ad dyzajnieraŭ z prośbami ab dapamozie ŭ pošuku pracy.

ŠI nie zamienić dyzajnieraŭ, ale ciapier ŠI staŭ nieadjemnaj častkaj pracy. Ja sam rehularna karystajusia i Midjourney, i ChatGPT u svajoj pracy.

Ja sapraŭdy nie viedaju pryčyn admovaŭ. U mianie jość siabry — talenavityja dyzajniery z dośviedam, jany taksama nie mohuć znajści pracu.

Ja ŭzhadvaju, jak u 2018 hodzie ŭ Minsku ja pryjšoŭ uładkoŭvacca na pracu dyzajnieram interfiejsaŭ u bujnuju IT-kampaniju. Sumoŭje pravodziŭ lid dyzajnieraŭ razam z ejčaram, i mnie byli hatovyja adrazu prapanavać pracu. Adzinaja pryčyna, čamu naša supracoŭnictva nie adbyłosia, — jany pracavali ŭ Sketch, a ja ŭ Figma. Ale nijakich 5 etapaŭ, testavych, psichałahičnych testaŭ i inšaha. «Chočaš pracavać? Nam jakraz patrebny supracoŭnik». I ŭsio! I ŭsie ščaślivyja.

Čamu kampanii štomiesiac vykładvajuć vakansii, a kali ja pišu rekrutaru, što zacikaŭleny, to nie atrymlivaju nijakaha adkazu? 3 razy ja pisaŭ rekrutaru, i jana ni razu nie adkazała. Ale ž vakansija visić. I takich vypadkaŭ vielmi šmat.

Historyi pra toje, što ŭ rekrutaraŭ šmat pracy, i tamu jany nie adkazvajuć, na maju dumku, nie źjaŭlajucca apraŭdańniem. Bo heta ich praca. Ale ja mahu pamylacca.

A na što žyć?

Vy spytajecie, na što ž Siarhiej žyvie, — na źbieražeńni, jakija amal skončylisia. A jašče jon padpracoŭvaje kurjeram. Na rovary šmat nie raźviazieš, ale heta lepš, čym ničoha.

• 1
• 0
• 1
• 1
• 2
• 8
• 0
• 0