Z-za vialikich vychodnych situacyja na biełaruska-polskaj miažy zastajecca napružanaj. Raskazvajem, kolki času idzie na pierasiačeńnie miažy na aŭto i aŭtobusie.
90 hadzin na aŭto
Pa stanie na 16 hadzin paniadziełka, vyjezdu ź Biełarusi ŭ Polšču ŭ adzinym dziejnym pasažyrskim punkcie propusku «Brest — Tarespal» čakajuć 1680 lehkavych aŭto i 95 aŭtobusaŭ.
Čałaviek, jaki siońnia kala 15-j hadziny pierasiek biełaruska-polskuju miažu na lehkavym aŭto, raskazaŭ, što ad momantu rehistracyi ŭ čarzie da zajezdu na punkt propusku ź biełaruskaha boku prajšło 86 hadzin. Z ulikam prachodžańnia miažy atrymałasia bolš za 90 hadzin.
Atrymlivajecca, što 28 krasavika miažu pierasiakajuć tyja, chto zaniaŭ čarhu 24-25 krasavika.
A voś u zvarotnym kirunku čarhi ciapier naadvarot niama.
Tyja, chto siońnia dniom viartaŭsia z Polščy ŭ Biełaruś, pierasiakali abiedźvie miažy za 1,5-2 hadziny.
Aŭtobusam tolki ź pierasadkami
Padarožnica, jakaja vyjechała z Hrodna ŭ niadzielu a 22-j viečara, u Polšču trapiła tolki a 14:30 paniadziełka. I heta dziakujučy tamu, što pa pryjeździe na miažu jana sa svajho aŭtobusa, jaki byŭ sotym u čarzie, pierasieła ŭ treci. Zapłaciła za heta 50 dalaraŭ.
U padarožnika ź Minska šlach da Polščy zaniaŭ na hadzinu bolš. Schiema takaja samaja. Aŭtobus byŭ 97-m u čarzie, ale čałavieku atrymałasia pierasieści ŭ treci ad šłahbaŭma.
Ahułam, pa nazirańniach ludziej, na prachodžańnie samoj miažy aŭtobusam sychodzić pa 12-15 hadzin.
Na zvarotnym šlachu čarhi z aŭtobusaŭ taksama niama.
Rakiroŭka kiroŭcaŭ
Niekatoryja padzialilisia cikavym nazirańniem, što polskija kiroŭcy aŭtobusaŭ u pikavyja dni nie chočuć jechać u Biełaruś, tamu mianiajucca ź biełaruskimi kiroŭcami.
Schiema pracuje tak: polski kiroŭca jedzie da Tarespala, dzie čakaje, pakul hranicu pierasiače aŭtobus, jaki jedzie ź Biełarusi. Biełarus pierasadžvajecca ŭ aŭtobus, jaki jedzie ŭ Biełaruś, a palak siadaje za styrno aŭtobusa, jakije jedzie dalej u Polšču.
Robiać jany heta dziela taho, kab potym pa niekalki dzion nie siadzieć u čarzie na vyjezd ź Biełarusi ŭ Polšču. Dziakujučy takoj schiemie, abodva kiroŭcy chutčej viartajucca dadomu.
Što na bałtyjskim kirunku?
Na litoŭskim kirunku napružanaść pačała spadać. Kali a poŭnačy 28 krasavika vyjezdu ź Biełarusi ŭ Litvu ŭ «Bieniakoniach» čakali kala 100 lehkavych mašyn, to paśla abiedu čarha źmienšyłasia da 30 mašyn.
A voś u «Kamiennym Łozie» ŭvieś dzień situacyja zastajecca stabilnaj. Ciaham nočy i dnia ŭ čarzie staić kala 70 lehkavych mašyn.
Čarhi z aŭtobusaŭ na vyjezd ź Biełarusi ŭ Litvu niama ŭ abodvuch punktach propusku.
Na łatvijskim kirunku z nočy 28 krasavika čarhi niama, jak z aŭtobusaŭ, tak i ź lehkavikoŭ.
Ciapier čytajuć
«Pračytajcie jaje historyju». Łukašenku daviałosia apraŭdvacca pierad Pucinym za hieorhijeŭskija stužki7
Kamientary
Łučšie už otpusk v druhoje vriemia vziať i nie tratiť po nieskolko sutok na hranicie