«U jaho što, nie było čornaha kaściuma?» Trampa krytykujuć za prajaŭleńnie niepavahi na pachavańni Papy Franciška

Choć prezident Tramp byŭ nie adzinym hościem, chto parušyŭ pratakoł adnosna adzieńnia, mienavita jaho kamientatary abvinavacili ŭ «niepavazie».

Strohi dres-kod Vatykana praduhledžvaŭ dla hetaj padziei, kab mužčyny byli apranutyja ŭ ciomny kaścium (dapuskaŭsia ciomna-sini) z čornym halštukam. Abutak, vysokija škarpetki, palito i parasony taksama pavinny byli być čornaha koleru. Na pachavańni Papy na łackanach mužčynskich kaściumaŭ mahli być pryšpilenyja tolki adznaki Vatykana.

Žančyny, pavodle pratakołu, pavinny byli być apranutyja ŭ doŭhija čornyja sukienki, palčatki i vuali, abutak pavinien byŭ być z zakrytym nasočkam, a z upryhožvańniaŭ dazvalałasia tolki adna nizka.

Prezident Ukrainy Uładzimir Zialenski byŭ biez halštuka. A papiarednik Trampa na pasadzie prezidenta ZŠA — Džo Bajden — nadzieŭ sini halštuk. Astatnija suśvietnyja lidary byli apranutyja ŭ čornaje.

Tym nie mienš, premjerka Italii Džordža Miełoni taksama farmalna parušyła pratakoł, bo była ŭ čornym kaściumie sa štanami.

Mail adznačaje, što prezident ZŠA, siedziačy ŭ pieršym šerahu siarod socień pavažanych haściej i pradstaŭnikoŭ manaršych rodaŭ, vielmi vyłučaŭsia svaim kaściumam dastatkova jarkaha adcieńnia siniaha sa značkom amierykanskaha ściaha na łackanie pinžaka.

Pieršaja łedzi ZŠA, Miełanija Tramp, dzień naradžeńnia jakoj — 55-y — prypaŭ mienavita na 26 krasavika, siadzieła pobač z mužam, apranutaja ŭ kłasičnaje čornaje palito, a jaje hałavu pakryvała karunkavaja vual.

Abvinavačvańni ŭ nienaležnym adzieńni prezidenta Trampa hučać praz dva miesiacy paśla taho, jak prezidenta Zialenskaha abvinavacili ŭ «niepavazie», kali jon apranuŭ ciomny śvitšot na sustreču z Trampam u Biełym domie, nahadvaje Mail. Heta, jak adznačali tady ahladalniki, mahło stać padstavaj dla dalejšaha razdražnieńnia prezidenta Trampa, jakoje pierarasło ŭ histaryčnuju sprečku z ukrainskim lidaram u Avalnym kabiniecie.

Tady prezident Zialenski, jaki pierastaŭ nasić aficyjnyja kaściumy z pačatkam rasijskaha ŭvarvańnia, zajaviŭ, što znoŭ budzie ich nasić «paśla taho, jak hetaja vajna skončycca».

Niekatoryja kamientatary, uzhadvajučy sprečku ŭ Avalnym kabiniecie i pytańnie amierykanskaha žurnalista Brajana Hlena pra adsutnaść kaściuma ŭ Zialenskaha, zapytvalisia pra adzieńnie prezidenta Trampa: «U jaho što, niama čornaha kaściuma? Heta niepavaha».

Varyjacyi francuzskaj rassadki

Adnak adzieńnie stała nie adzinym parušeńniem pratakołu padčas pachavańnia Papy Franciška. Na inšaje parušeńnie, vidavočna, pajšoŭ sam Vatykan, kab prezident Zialenski apynuŭsia ŭ pieršym šerahu haściej cyrymonii — razam z prezidentam ZŠA Trampam, choć i praz 11 miescaŭ ad jaho, piša Telegraph.

Pavialičyć

Pavodle hetych pravił, prezident Ukrainy musiŭ by siadzieć dzieści ŭ trecim šerahu abo navat jašče dalej. Zamiest hetaha prezidentu Zialenskamu prapanavali miesca ŭ pieršym šerahu, — tam, dzie byŭ Tramp, prezident ZŠA, francuzskaja nazva jakich (États-Unis) pačynajecca na litaru «E».

U Vatykanie nie stali admaŭlać, što praviły pratakołu byli parušanyja.

«Miarkuju, im prapanavali volnaje miesca», — zajaviŭ pres-sakratar Vatykana Matea Bruni ŭ kamientary Telegraph.

Adnačasova, niahledziačy na toje, što Zialenski i Tramp siadzieli ŭ adnym šerahu, ich raździalali prezidenty Indyi, Vienhryi, Habona, prezident Francyi Emanuel Makron z žonkaj i prezident Finlandyi Alaksandr Stub.

Dalej za Trampam i jaho žonkaj siadzieŭ Ałar Karys, prezident Estonii, i karol Ispanii Filip z žonkaj.

Pobač ź Zialenskimi siadzieŭ prezident Irłandyi Majkł Chihins, što dadatkova śviedčyć pra toje, što na praviły pratakołu machnuli rukoj, kab ukrainski lidar atrymaŭ miesca ŭ pieršym šerahu.

Usie astatnija hości cyrymonii pachavańnia Papy Franciška atrymali miescy stroha pavodle pratakołu, a pieršy šerah pačynaŭsia z prezidenta Arhienciny Chaŭjera Mileja.

Prync Uiljam, jaki pradstaŭlaŭ svajho baćku, karala Karła III, siadzieŭ u trecim šerahu pobač z Ołafam Šolcam, kancleram Hiermanii, jaki nieŭzabavie pakinie svaju pasadu.

Heta nie pieršy vypadak, kali ałfavit pratakołu pryciahvaje ŭvahu da rassadki haściej padčas mižnarodnych padziej. U pryvatnaści, u listapadzie 2002 hoda «francuzskaja» rassadka ŭdzielnikaŭ samitu NATA ŭ Prazie dazvoliła adździalić tahačasnaha prezidenta Ukrainy Leanida Kučmu ad amierykanskaha i brytanskaha lidaraŭ — Džordža Buša-małodšaha i Toni Błera.

• 1
• 0
• 4
• 1
• 0
• 0
• 0
• 0